First Peter 5:1-14
5 So, since I be elder like una, and I don take my eye see the suffer wey Christ suffer, and say I go join una get the glory wey them go reveal to people, I de beg* una wey be elders say:
2 Like shepherd, make una care for God sheep wey e don put for una hand, as una de work as overseers,* make una no do-am like say them de force una, make una do-am with all una heart as God want-am; make una no do-am because una want gain something for unaself, but make e be wetin una want really do;
3 no be say una go de do as if una be oga of the people wey be God property, instead, make una be example for the sheep.
4 And when the main shepherd don come,* una go get the wonderful crown wey no de fade.
5 For the same way, una wey be young men, make una de put unaself under the old men.* But make to de carry body down for each other be like cloth wey all of una de wear for body, because God dey against people wey de carry body up,* but e de give special favor to people wey de carry body down.
6 So make una carry body down and dey under the powerful hand of God so that e go raise una up when time reach.
7 And make una throw everything wey de worry una give-am, because e de care about una.
8 Make una use una sense well and dey careful! Una enemy wey be the Devil, de waka up and down like lion wey de make loud noise, de find person wey e go chop.
9 But make una no gree for-am, make una get strong faith as una know say na the same kind of suffer una brothers for the whole world de suffer too.
10 But after una don suffer for some time, the God wey all special favor de come from, wey call una to dey as one with Christ and to give una honor forever, go finish una training. E go make una no shake, e go make una strong, and e go make una really stand well.
11 Na im get the power forever. Amen.
12 Na Sil·va′nus* wey I see as brother wey hold God tight, help me write this short letter to una, to encourage una and to make una dey sure say na the real special favor of God be this. Make una hold-am tight.
13 The woman* for Babylon, wey God don choose like una, de greet una, and Mark, my pikin, de greet una too.
14 Make una greet each other with kiss of love.
Make all of una wey dey as one with Christ get peace.
Footnotes
^ Or “encourage.”
^ Or “as una de sofri care for them.”
^ For Greek na, “when people don see the main shepherd clear.”
^ Or “the elders.”
^ Or “people wey de think say them better pass other people.”
^ E name still be Silas.
^ This one fit be congregation.
