Galatians 6:1-18
6 My brothers, even if person make mistake before e know-am, make una wey the spirit de guide well* try to sofri help this kind person to dey the correct way. But make you watch yourself so that something no go tempt you.
2 Make una continue to help each other when problem dey,* and for this way una de obey the law of Christ.
3 If anybody think say e be something when e no be anything, e de deceive imself.
4 But make each person check the things wey e de do, and then e go get reason to de happy with wetin e don do, and no be to compare imself with another person.
5 Because each person go carry im own load.*
6 Another thing be say, make anybody wey them de teach* the word, share every good thing with the person wey de teach-am* the word.
7 Make una no deceive unaself: God no be person wey them fit fool. Anything wey person de plant na wetin e go still harvest.
8 Because the person wey de follow* wetin im body want go get* death* from im body, but the person wey de follow* wetin the spirit want, go get* life wey no go end from the spirit.
9 So make we no stop to do wetin dey fine, because when the time reach, we go get the reward* if we no tire.*
10 So as far as we get the chance,* make we do good* for everybody, but especially for people wey dey the same faith with us.
11 See the kind big-big letters wey I don use write to una with my own hand.
12 All the people wey want do wetin go make other people de praise them for who them be* na the people wey de try to force una to circumcise. But them de only do this one as them no want suffer because of the torture pole* of Christ.
13 Even the people wey them de circumcise no de obey the Law, but them want make una circumcise so that them go get reason to boast about una.*
14 But make I no ever boast, unless na about the torture pole* of our Lord Jesus Christ. To me, the world don die* through Jesus, but to the world, na me don die.
15 Whether person circumcise or e no circumcise, this one no mean anything, but the thing wey dey important na say e don be new person wey God make.
16 As for all the people wey de really follow* this thing wey I talk to guide the way them de behave, make peace and mercy dey with them, yes, make e dey with the Israel of God.
17 From now, make nobody make trouble for me, because I get the marks for my body wey show say I be slave of Jesus.
18 My brothers, make the special favor of our Lord Jesus Christ dey with una because of the good heart* wey una show. Amen.
Footnotes
^ Or “wey really qualify.”
^ Or “to carry the heavy load of each other.”
^ Or “im load wey e suppose carry.”
^ Or “de use mouth teach.”
^ Or “de use mouth teach-am.”
^ For Greek na, “plant.”
^ For Greek na, “harvest.”
^ For Greek na, “wetin rotten.”
^ For Greek na, “plant.”
^ For Greek na, “harvest.”
^ Or “we go harvest.”
^ Or “stop.”
^ For Greek na, “the correct time.”
^ Or “do work wey good.”
^ For Greek na, “for the flesh.”
^ Check the part, Meaning of Words.
^ For Greek na, “about una flesh.”
^ Check the part, Meaning of Words.
^ Or “don die ontop the pole.”
^ Or “wey de waka well for.”
^ For Greek na, “with the spirit.”
