Luke 13:1-35
-
Repent or die (1-5)
-
Example of the fig tree wey no produce fruit (6-9)
-
For Sabbath day, e heal one woman wey im body bend (10-17)
-
Example of the mustard seed and the yeast (18-21)
-
Person need to really struggle to pass the small door enter (22-30)
-
Herod, “that fox” (31-33)
-
Jesus sorry for Jerusalem (34, 35)
13 For that time, some people wey be dey there come tell-am about the Gal′i·lee people wey Pilate mix their blood with their sacrifice.
2 E come answer them say: “Una think say the sin of this Gal′i·lee people plenty pass the sin of all the other Gal′i·lee people, na im make this things happen to them?
3 I de tell una say, no, but if una no repent them go destroy all of una like them too.
4 Or those 18 people wey the tall house for Si·lo′am fall ontop and kill them, una think say na them do bad pass all the other people wey de live for Jerusalem?
5 I de tell una say, no, but if una no repent, all of una go die like them.”
6 Then e talk one example say: “One man plant fig tree for im vine farm, and e come check-am whether e go see fruits but e no see anyone.
7 E come tell the person wey de work for the vine farm say, ‘E don reach three years wey I don de look for fruit ontop this fig tree but I never see anyone. Cut-am down! Why e go just de grow for ground when e no de bear any fruit?’
8 E come answer-am say, ‘Oga, leave-am for another one year, make I dig-am round and put manure.
9 If e produce fruit after I don do that one, e go good, but if e no produce, then you fit cut-am down.’”
10 Now Jesus come de teach for one of the synagogues for Sabbath day.
11 And see! one woman be dey there wey one wicked spirit don de make-am sick* for 18 years, the woman body bend and e no fit stand straight at all.
12 When Jesus see-am, e come tell-am say: “Woman, I don free you from your sickness.”
13 E come put im hand ontop the woman, na so the woman just stand straight at once and start to praise God.
14 But the leader for the synagogue vex no be small because Jesus cure the woman for Sabbath day, e come tell the plenty people say: “Na six days them suppose use work, so make una come make them cure una for those days, no be for Sabbath day.”
15 But the Lord answer-am say: “Pretenders, each of una no de loose una bull or donkey from where una tie-am put and carry-am go where e go drink water for Sabbath day?
16 So this woman wey be Abraham pikin and wey Satan don tie for 18 years, e bad to release-am from this prison for Sabbath day?”
17 When e talk this one, all the people wey dey against-am start to shame, but all the plenty people start to happy because of all the wonderful things wey e do.
18 So e talk say: “Wetin the Kingdom of God be like, and wetin I fit use compare-am?
19 E be like mustard seed wey one man plant for im garden, then e grow and turn to tree, and the birds wey de fly for up build house for im branch them.”
20 E come still talk say: “Wetin I fit use compare the Kingdom of God?
21 E be like yeast wey one woman mix with three big containers* of flour until everything rise.”
22 As Jesus de go Jerusalem, e move from city to city and from village to village de teach people.
23 One man come ask-am say: “Lord, the people wey them go save go small?” Jesus come tell them say:
24 “Make una really struggle to pass the small door enter, because I de tell una say many people go want enter but them no go fit.
25 When the person wey get the house get up and lock the door, una go stand outside de knock the door and de talk say, ‘Lord, open door for us.’ But e go answer una say: ‘I no know where una come from.’
26 Then una go start to talk say, ‘We be de chop and drink with you and you be de teach people for our streets wey plenty people de pass.’
27 But e go tell una say, ‘I no know where una come from, make una comot from my front, all of una wey de do things wey God hate!’
28 Na there una go dey, de cry and de grind una teeth, when una go see Abraham, Isaac, Jacob, and all the prophets as them dey for God Kingdom, but una, na outside them troway una.
29 Another thing be say, people go come from east and west and from north and south, and them go sitdown for table for the Kingdom of God.
30 And see! e get some people wey be last wey go be first, and e get people wey be first wey go be last.”
31 For that same time, some of the Pharisee people come and tell-am say: “Comot from here, because Herod want kill you.”
32 E come tell them say: “Make una go tell that fox* say, ‘See! I de pursue demons comot and de heal people today and tomorrow, and I go finish for the third day.’
33 But anyhow e be, I must continue today, tomorrow and the next day, because e no fit happen* say make them kill prophet for outside Jerusalem.
34 Jerusalem, Jerusalem, wey de kill the prophets and de stone the people wey them send come meet-am, I try many times to fit gather your children together, the way fowl de gather im children under im wings, but una no want-am.
35 See! Them don leave una house for una. I de tell una say, una no go ever see me until una go talk say: ‘The person wey de come with Jehovah name na person wey them don bless!’”
Footnotes
^ Or “wey get spirit wey de make part of person body no work well.”
^ For Greek na, “seah measures.” One seah na the same thing as 7.33 L (6.66 dry qt).
^ Fox na animal wey be like dog, and na cunning-cunning animal e be.
^ Or “them no fit think-am.”
