Matthew 28:1-20
28 After the Sabbath, when day don de break for the first day of the week, Mary Mag′da·lene and the other Mary come look the grave.
2 And see! ground don shake well-well because the angel of Jehovah come down from heaven, roll the stone comot and sitdown ontop-am.
3 Im body de shine like thunder light, and im cloth white like snow.
4 Because of the kind fear wey catch the watchmen as them see-am, them start to shake, them come be like people wey don die.
5 But the angel tell the women say: “Make una no fear, because I know say una de find Jesus wey them kill for pole.
6 E no dey here, because God don bring-am back to life, just as e* talk. Make una come, and see the place wey them be put im dead body.
7 So make una go quick-quick and tell im disciples say God don bring-am back to life, because e de first una go Gal′i·lee. Una go see-am for there. See! I don tell una.”
8 So, quick-quick, them comot from the place wey the grave dey with fear but them happy no be small. Them come run go tell im disciples.
9 And see! Jesus meet them and tell them say: “I greet una o!” Them come meet-am, hold im leg and bow down for-am.
10 Then Jesus tell them say: “Make una no fear, make una go tell my brothers, so that them go go Gal′i·lee and them go see me for there.”
11 As them de go, some of the soldiers enter the city and tell the chief priests everything wey happen.
12 After the chief priests and the elders don gather together and discuss the matter, them come give the soldiers plenty pieces of silver,
13 and tell them say: “Make una talk say, ‘E disciples come for night and thief-am comot when we de sleep.’
14 And if the governor hear this one, we go follow-am talk,* make una no worry.”
15 So them collect the pieces of silver and do wetin them tell them, and na this story them don spread among the Jew people from that time come reach today.
16 But the 11 disciples go the mountain for Gal′i·lee, the place wey Jesus don arrange say them go meet.
17 When them see-am, them bow down for-am, but some among them come de doubt.
18 Jesus come near them and tell them say: “Them don give me all the authority for heaven and for earth,
19 So, make una go, and make people from all the nations my disciples, make una baptize them for the name of the Papa, the Son and the holy spirit,
20 make una teach them to do all the things wey I don command una, and see! I dey with una all the days go reach the last days of the world.”*
Footnotes
^ This one na, Jesus.
^ Or “we go convince-am.”
^ Or “go reach when the system of things don de end.” Check the part, Meaning of Words.
