Titus 2:1-15
2 But you, make you continue to talk things wey agree with correct teaching.*
2 Make the old men de behave well, dey serious, de reason well, get strong faith, get strong love, and de endure well.
3 For the same way, make old women de behave for way wey go show say them de fear God, make them no de lie to spoil the name of another person, make them no be slave to too much wine, make them be people wey de teach good things,
4 so that them go fit advice* the young women to love their husbands, to love their children,
5 to de reason well, to live clean life, de work for house,* dey good, dey under their own husbands, so that people no go talk bad about the word of God.
6 For the same way, continue to advice the young men make them de reason well.
7 For everything, make you de show better example with the good things wey you de do. De teach wetin dey pure* and really dey serious as you de do-am.
8 De use good words* wey people no go fit condemn, so that shame go catch people wey dey against us as them no get any bad thing to talk about us.
9 For everything, make slaves dey under their oga,* de try to make them happy, no de talk back as them de talk,
10 no de thief from them. But make them de show say their masters fit really trust them, so that for everything, them go fit make the teaching of God our Savior, de fine more-more.
11 God don show im special favor, and this one de save different kind of people.
12 This one de train us to reject things wey God hate and things wey people for the world want and to live for way wey show say we de reason well and de do the correct thing and de serve God with all our heart for this world of our time.*
13 Make we de do this one as we de wait for the hope wey de make us happy and how our powerful God and Jesus Christ our Savior, go show the kind honor wey them get.
14 And Jesus Christ give im life to free us* from all kind of things wey dey against law and to clean one group of people for imself. This people wey be im own special people de use all their heart to do good things.
15 Make you continue to talk this things, de encourage* and de correct people with all the right wey you get. No allow anybody treat you like say you be nothing.
Footnotes
^ Or “with teaching wey good for person; with teaching wey get gain.”
^ Or “fit bring back the sense of; train.”
^ Or “de take care of their house.”
^ Or e fit be, “de teach for clean way.”
^ Or “use words wey good for person; use words wey get gain.”
^ Or “masters.”
^ Or “this system of things of our time.” Check the part, Meaning of Words.
^ For Greek na, “as price to buy us back.”
^ Or “advice.”
