First Thessalonians 1:1-10
1 Me, Paul, wey dey with Sil·va′nus* and Timothy, de write to the congregation for Thes·sa·lo′ni·ca wey dey as one with God our Papa and the Lord Jesus Christ:
Make the special favor and peace from God dey with una.
2 We de always thank God when we mention all of una for our prayer,
3 because we de always remember una for front of our God and Papa for the work wey una faith de move una to do, for the hard work wey una love de move una to do, and how una de endure because of the hope wey una get for our Lord Jesus Christ.
4 My brothers wey God love, we know say God choose una,
5 because the good news wey we preach to una no be only with mouth, but na still with power and holy spirit, and we really dey sure about the message. When we dey with una, una know the kind men wey we show say we be because of una.
6 And una follow our example and the example of the Lord, as una accept the word with the joy wey holy spirit de give, even when una face plenty suffer,
7 sotey una become example for all the people wey believe the message for Mac·e·do′ni·a and for A·cha′ia.
8 The truth na say, no be only say una don preach the word of Jehovah for Mac·e·do′ni·a and A·cha′ia, but una faith for God don still spread go every corner sotey we no need to talk anything again.
9 Them continue to talk about the first time wey we meet una and how una leave una idols and start to follow God, so that una fit be slave for the true God wey dey alive.
10 And una still de wait for im Son Jesus, from heaven, wey e bring back to life and wey go save us from the punishment wey de come.
Footnotes
^ Them still de call-am Silas.
