First Thessalonians 3:1-13
3 So when we no fit bear-am again, we see say e better make we stay alone for Athens;
2 and we send Timothy, our brother and servant of God,* wey de preach the good news about the Christ, to make una strong and to comfort una, so that una go stand well for una faith.
3 This one go help so that all this suffer no go shake any of una. Una know say we no go fit run from this kind suffer.*
4 When we dey with una, we de tell una before e happen say we go suffer, and na so e happen just as una know.
5 Because of this one, when I no fit bear-am again, I send Timothy to check how una faith be, whether somehow, Devil* fit don tempt una and our hard work fit be like waste of time.
6 But now, Timothy don come back to us from una place, and e don tell us the good news about una faith and love, say e de always sweet una anytime una remember us, and say e de hungry una to see us the same way wey we de feel about una.
7 Because of that one, my brothers, for all our suffer and problem,* we don get comfort because of una and the faith wey una de show.
8 We go dey strong again* because una continue to stand well as people wey de follow the Lord.
9 But how we fit show say we de thank God for una because of the plenty joy wey una de make us get for front of our God?
10 Day and night, we de really beg God with all our heart as we fit, to see una face-to-face and to give una wetin una need for una faith.
11 Now, make God our Papa and our Lord Jesus open way for us to come meet una.
12 Apart from that one, make the Lord help una to love each other and everybody more-more, just as we really love una.
13 With that one, e fit make una heart strong and holy with nothing bad to talk about una for front of our God and Papa, when our Lord Jesus go dey around with all im holy ones.
Footnotes
^ Or e fit be, “and person wey de work with God.”
^ Or “say this things must happen to us.”
^ For Greek na, “the Person Wey De Tempt.”
^ For Greek na, “when we no get wetin we need.”
^ For Greek na, “we go continue to live.”
