First Timothy 2:1-15
2 So, the first thing wey I de encourage you to do na say, make you de really beg God for help, de pray, de beg God for other people and de thank God for all kind of people.
2 Make you de pray for kings and all the people wey dey for high position,* so that we go fit get peace and de live quiet life as we de serve God with all our heart and dey serious for everything.
3 God wey be our Savior, de see this one as fine thing and e accept-am.
4 The thing wey e want for all kind of people na to save them and make them come know the correct teaching.
5 Na one God dey, and na one middleman dey between God and men, and this man na Christ Jesus.
6 E give imself as the exact price to free everybody.* Na this one people go talk about when the time reach.
7 So that I go fit talk about this one, God don choose me to preach and to be apostle. Na true I de talk, I no de lie. E don choose me to teach people wey no know God about faith and truth.
8 So for every place, I want make men wey hold God tight* de pray, but no be with vex or argument.
9 Make the women make theirself fine with the way them de dress well,* to show say them no de overdo things and them de reason well.* Make them no de overdo different-different hairstyle, and de wear too much gold or fine-fine stones, or cloth wey overcost,
10 but make the way them de do-am fit women wey talk say them de worship God, and the good things wey them de do go make them fine.
11 Make women dey quiet* when them de learn and show say them really put theirself down.
12 I no give woman right to teach or to show say e get control over man, but make e continue to dey quiet.*
13 Na Adam God first make, then after, e make Eve.
14 And no be Adam them deceive, but na the woman them really deceive and e come be person wey break law.
15 But since woman de born pikin, e go dey safe, as long as e* continue to get faith, de show love, dey holy and de show say e de reason well.*
Footnotes
^ Or “for authority.”
^ Or “all kind of people.”
^ For Greek na, “men wey de raise holy hands up.”
^ Or “fine for way wey show respect.”
^ Or “de think well; them get sense.”
^ Or “no talk; calm.”
^ Or “continue to dey calm; no de talk.”
^ For Greek na, “them.”
^ Or “de think well; e get sense.”
