Second Corinthians 13:1-14
13 This one na the third time wey I de come meet una. “From wetin two or three people talk,* this one must confirm say everything wey happen na true.”
2 Even though say I no dey around now, e just be like say I dey around the second time. And before time, I de warn people wey don sin before and all the rest say, if at all say I come again, I no go fail to correct them,
3 since una de find proof say Christ, wey no dey weak for una but wey dey strong among una, de really use me talk.
4 Because true-true, them kill-am ontop the pole when e dey weak, but e dey alive because of the power of God. The truth na say we dey weak with-am too, but we go live together with-am because of the power of God for una life.
5 Make una continue to test whether una dey for the faith. Make una continue to prove the kind person wey una be. Or una no know say Jesus Christ na one with una? If no be so, God don reject una.
6 I really hope say una go know say God no reject us.
7 Now we de pray to God say make una no do any bad thing. We no de do this one make we be like people wey God don accept, but na make una fit de do wetin dey fine even if we fit be like people wey God don reject.
8 We no fit do anything against the truth, but na only to support the truth.
9 We really de happy anytime wey we dey weak but una dey powerful. And this one na wetin we de pray for, say make una get help to dey the correct way again.
10 Na the reason why I de write this things when I no dey around, so that when I dey around, I no go dey harsh as I de use the authority wey the Lord don give me, to encourage and no be to scatter.
11 So my brothers, make una continue to de happy, de accept help to dey the correct way, to get comfort, to agree for the way una de think, to de do wetin go bring peace; and the God of love and peace go dey with una.
12 Make una greet each other with holy kiss.
13 All the holy ones say make I greet una.
14 Make the special favor of the Lord Jesus Christ and the love of God and the holy spirit wey all of us together de gain from dey with una.
Footnotes
^ For Greek na, “From the mouth of two or three people.”
