Second Timothy 4:1-22
4 For front of God and Christ Jesus, wey go judge people wey dey alive and wey don die, and wey go show imself clear and come for im Kingdom, I de give you this serious command say:
2 Preach the word, no waste time do-am, whether for good time or for hard time. De correct people, de warn them, de encourage them, and as you de do this one, make you really dey patient and de really teach for better way.
3 Time de come when them go tire for the correct teaching,* but because of wetin them want, them go find teachers for theirself wey go tell them wetin go sweet them for ear.*
4 Them go stop to listen to the truth and them go start to listen to lie-lie story.
5 But you, make your mind dey clear for everything, de endure hard condition, do the work of person wey de preach* and de do your work well.
6 Them don already de pour me like wine wey them de use for offering. And the time wey I go dey free from this body don really near.
7 I don fight the fine fight, I don run the race finish, and I don stand well for the faith.
8 From this time, the Lord wey de judge for the correct way don keep crown for me. This crown na for people wey de do the correct thing. E go give-am to me as reward when that day reach. And e no go give only me, but e go still give everybody wey de really wait for the time wey e go show imself clear.
9 Try your best to come meet me, no waste time.
10 Deʹmas don leave me because e love the world of our time,* and e don go Thes·sa·lo·niʹca, Cresʹcens don go Ga·laʹti·a, Titus don go Dal·maʹtia.
11 Na only Luke dey with me. Make Mark follow you come because e go really help me for the work.
12 But I don send Tychʹi·cus go Ephʹe·sus.
13 When you de come, make you bring the dress* wey I leave with Carpus for Troʹas, and the scrolls,* especially the ones wey them make with animal skin.*
14 Alexander wey im work na to use copper make things, don do me plenty bad things. Jehovah go pay-am back for the things wey e do.
15 You too, make you protect yourself from-am because e don really dey against our message no be small.
16 For my first case when I defend myself, nobody come support me, but all of them leave me. Make God no hold them for this thing wey them do.
17 But the Lord stand near me, and e give me power, so that e fit use me preach the good news well, and people for all the nations go fit hear-am. And the Lord save me from the mouth of the lion.
18 The Lord go save me from every wicked work and e go protect me make I fit come im Kingdom for heaven. Make e get the honor forever and ever. Amen.
19 Make you greet Prisʹca and Aqʹui·la for me and people wey dey the house of On·e·siphʹo·rus.
20 E·rasʹtus stay for Corinth, but I leave Trophʹi·mus for Mi·leʹtus because e no well.
21 Try your best to come before the cold season start.
Eu·buʹlus say make I greet you. Puʹdens, Liʹnus, Clauʹdi·a and all the brothers still say make I greet you.
22 Make the Lord dey with you because of the good heart* wey you show. Make im special favor dey with una.
Footnotes
^ Or “the teaching wey good for person; the teaching wey get gain.”
^ Or “wetin them want hear.”
^ Or “continue to preach the good news.”
^ Or “system of things of our time.” Check the part, Meaning of Words.
^ This one na, dress wey them de wear for cold.
^ Or “books.”
^ This one na, the leather scrolls.
^ For Greek na, “the spirit.”
