Acts 18:1-28
18 After this one, e comot from Athens and e come Corinth.
2 And e see one Jew person wey im name na Aq′ui·la wey them born for Pon′tus. And e just come from Italy with im wife Pris·cil′la, because Claudius command all the Jew people say make them comot from Rome. So Paul go meet them,
3 and because e de do the same handwork with them, e stay for their house and work with them, and their work na to make tent.
4 Paul go give talk* for the synagogue for every Sabbath day and e go make Jew people and Greek people believe.
5 But when Silas and Timothy come from Mac·e·do′ni·a, Paul start to really busy de teach people the word, de preach to Jew people to prove say na Jesus be the Christ.
6 But when the people continue to dey against-am and de insult-am, e shake im cloth and tell them say: “Make una blood dey una own head. My hand clean. From now go, I de go meet the people of the nations.”
7 So e comot from there* and go the house of one man wey im name na Titius Justus, wey de worship God, and wey im house near the synagogue.
8 But Cris′pus, wey be the leader for the synagogue and everybody for im house believe the good news and follow the Lord. And many Corinth people wey hear start to believe too, and them baptize them.
9 Apart from that one, for night, the Lord tell Paul for vision say: “Make you no fear. Instead, make you continue to talk and make you no keep quiet,
10 because I dey with you, and nobody go attack you to wound you; because I get many people for this city.”
11 So e stay there for one year and six months, de teach the people the word of God.
12 When Gal′li·o be governor* of A·cha′ia, Jew people join hand together attack Paul and carry-am go the judgment seat,
13 de talk say: “This man de make people worship God for way wey dey against the law.”
14 But as Paul want talk, Gal′li·o come tell the Jew people say: “O Jew people, if to say this man really do one bad thing, or e do one serious thing against the law, I for get reason to sofri listen to una.
15 But if na matter about wetin person talk or names, or una own law, make una go settle-am by unaself. I no want be judge for this kind things.”
16 So e drive them comot from the judgment seat.
17 So all of them hold Sos′the·nes, wey be the leader for the synagogue, and start to beat-am for front of the judgment seat, but Gal′li·o no want put mouth for this things at all.
18 But after Paul don stay plenty more days for there, e tell the brothers bye-bye and enter ship go Syria, and Pris·cil′la and Aq′ui·la follow-am. And for Cen′chre·ae, Paul cut im hair short because of the promise wey e make to God.
19 So them reach Eph′e·sus, and e leave them for there; but e enter the synagogue and start to reason with Jew people.
20 Even though say them continue to beg-am say make e still stay, e no gree stay.
21 But e tell them bye-bye and still tell them say: “I go come see una again, if na wetin Jehovah want.” Then e enter ship from Eph′e·sus
22 and come down to Caes·a·re′a. And e go up* go greet the congregation, then go down to Antioch.
23 After e don stay there for some time, e comot from there and start to go different-different place for the whole of Ga·la′ti·a and Phryg′i·a, de make the faith of all the disciples strong.
24 Now one Jew person wey im name na A·pol′los, come Eph′e·sus. The man na Alexandria person, e know how to talk well, and e really know God Word.
25 Them don teach* this man about the way of Jehovah. And as the spirit de move-am, e de talk and teach the correct things about Jesus, but na only the baptism of John e sabi.
26 So e start to talk for the synagogue and e no fear. And when Pris·cil′la and Aq′ui·la hear wetin e de talk, them draw-am near body and explain the correct thing about the way of God to-am more-more.
27 Another thing be say, because e want cross go A·cha′ia, the brothers come write to the disciples, de beg them say make them welcome-am well. So when e reach there, e really help the people wey the special favor of God don make them believe the good news.
28 Because for public, e use all im heart prove-am say wetin Jew people de talk no correct, and e show them from the Word of God say na Jesus be the Christ.
Footnotes
^ Or “E go reason with them.”
^ This one na, the synagogue.
^ Or “proconsul.” This one na, governor for one of the area wey Rome be de rule.
^ E be like say na Jerusalem e go.
^ Or “don use mouth teach.”
