Acts 20:1-38
20 When the riot don come down, Paul call the disciples. And after e don encourage them and tell them bye-bye, e start to travel to Mac·e·do′ni·a.
2 After e don go through those areas and e don encourage the people for there with many words, e reach Greece.
3 E dey there for three months, but because of the plan wey the Jew people get against-am when e want enter ship go Syria, e decide say e go go back through Mac·e·do′ni·a.
4 People wey follow-am na Sop′a·ter the son of Pyr′rhus from Be·roe′a, Ar·is·tar′chus and Se·cun′dus from Thes·sa·lo′ni·ca, Ga′ius from Der′be, Timothy, and from Asia, Tych′i·cus and Troph′i·mus.
5 This men first go, and de wait for us for Tro′as.
6 But we enter ship and travel from Phi·lip′pi after the Festival of Bread Wey No Get Yeast. And before five days end, we come meet them for Tro′as, and we dey there for seven days.
7 For the first day of the week, when we gather together to chop, Paul start to talk to them since e go leave them the next day; and e talk sotey midnight reach.
8 And some lamps dey for the room for up where we gather together.
9 One young man wey im name na Eu′ty·chus sitdown for the window and deep sleep catch-am as Paul continue to talk, and the sleep carry-am go. So, e fall from the third story of the house and when them reach there, e don die.
10 But Paul go downstairs, e put imself ontop the young man and embrace-am and talk say: “Make una stop to worry, because e dey alive.”*
11 Then e go upstairs and start to take food* and chop. E continue to talk for some time until day break, and then e comot.
12 So them take the boy comot as e dey alive, and their mind really come down no be small.
13 So we first reach the ship and enter go As′sos, but Paul don decide to use leg go there. We be plan to carry Paul for there just as e tell us.
14 So when e reach where we dey for As′sos, we carry-am for ship and go Mit·y·le′ne.
15 And as we enter ship from there the next day, we reach near Chi′os. But the day after that day, we stop small for Sa′mos. And the next day, we reach Mi·le′tus.
16 Paul don decide to enter ship pass Eph′e·sus so that e no go spend any time for Asia, because e de hurry to go Jerusalem for the day wey them de do the Festival of Pentecost, if e go fit.
17 But from Mi·le′tus e send message go Eph′e·sus and tell the elders for the congregation make them come.
18 When them reach where e dey, e tell them say: “Una really know how I behave among una from the first day wey I enter Asia.
19 I work for the Lord as slave and I really de carry body down* as I de do this one with tears and the problems wey I face because of the things wey the Jew people plan against me.
20 And I no stop to tell una any of the things wey una go gain from* or to teach una for public and from house to house.
21 But I really preach to Jew people and Greek people well, say make them repent and turn follow God and get faith for our Lord Jesus.
22 And now see! as the spirit de move me, I de travel go Jerusalem even though say I no know wetin go happen to me for there.
23 Except say from city to city, the holy spirit continue to warn me say prison and suffer-suffer de wait for me.
24 But I no take my own life* as something wey dey important to me,* as long as say I complete the race and the work wey the Lord Jesus don give me, to really preach the good news well about the special favor of God.
25 “And now see! I know say nobody among una wey I preach about the Kingdom to, go ever see my face again.
26 So I call una make una see-am today say my hand clean from the blood of everybody,
27 because I no hide anything from una, I tell una all the things wey God want.*
28 Make una watch unaself and all the sheep wey the holy spirit don appoint una as overseers among them, to care for the congregation of God, wey e buy with the blood of im own Son.
29 I know say after I don go, wicked wolf them* go enter among una and them no go treat the sheep with care,
30 and from among una, men go come out and talk bend-bend things to draw the disciples to follow them.
31 “So make una continue to dey awake and get-am for mind say for three years, day and night, I no ever stop to advice each of una with tears.
32 And now I give una to God and to the message about im special favor. And this message fit make una dey strong and give una the thing wey God de give all the people wey e don choose to be holy ones.
33 I never get long throat for silver or gold or cloth of any person.
34 Una know say this my hand don work for the things wey I need, and the things wey the people wey dey with me need.
35 I don show una for everything say when una de work hard like this, una must support people wey dey weak and must continue to remember the things wey the Lord Jesus talk when e talk say: ‘Na when person de give e go happy pass when e de receive.’”
36 And when e don talk this things finish, e kneel down with all of them and pray.
37 True-true, all of them cry no be small and them embrace Paul and sofri kiss-am,
38 because e really pain them as e tell them say them no go see im face again. Then them escort-am go the ship.
Footnotes
^ Or “because im soul dey inside-am.”
^ For Greek na, “and break the bread.”
^ Or “dey humble for mind.”
^ Or “wey good for una.”
^ Or “soul.”
^ Or “wey get any value for me at all.”
^ Or “everything wey God get for mind.”
^ Wolf na wicked bush animal wey de chop other animals.
