Acts 24:1-27
24 After five days, the high priest An·a·ni′as come with some elders and one lawyer wey im name na Ter·tul′lus, and them tell the governor wetin them get against Paul.
2 When them call Ter·tul′lus, e start to talk against Paul say:
“We de see say we really de enjoy peace because of you and say good things de happen for our nation because you be person wey de really think before you do something.
3 Everytime and for everywhere too we de talk this one, and de really thank you no be small, the Great One Felix.
4 But so that I no go continue to take your time, I de beg you make you use your kind heart listen to us small.
5 We don see say this man de make trouble,* e de make people among all the Jew people for the earth to fight against government, and e de lead one group wey them de call the Naz·a·renes.
6 E still try to make the temple no dey holy, so we catch-am.
7 *——
8 When you check this man well by yourself, you go see say all this things wey we talk say e do na true.”
9 So the Jew people still join de talk against Paul, de talk say this things na true.
10 When the governor nod im head for Paul to talk, Paul talk say:
“I really know say this nation don get you as judge for many years, so I really happy as I want talk to defend myself.
11 If you check-am, you go see say na true say e never pass 12 days since I go up to worship for Jerusalem,
12 and them no see me de argue with anybody for the temple or de gather people to cause trouble whether na for the synagogues or for the whole city.
13 And them no fit prove-am to you say the things wey them de talk against me now na true.
14 But I agree say I de follow the way wey people de call new group, and na for this way I de do holy work for the God of my papa-papa them, as I believe all the things wey dey inside the Law and the things wey the Prophets write.
15 And I get hope for God, the same hope wey this men still get, say people wey don die go come back to life, people wey do the correct thing for God eye and people wey no do the correct thing for God eye.
16 Because of this one, I de always try my best make I continue to get clean* conscience for front of God and people.
17 Now after many years, I come so that I go fit give gifts to help poor people for my nation and to do sacrifice them.
18 As I de handle this things, them see me for the temple say I dey clean as the Law of Moses talk, but I no dey with people or de cause trouble. But some Jew people from Asia be dey there
19 wey suppose dey here for your front to talk against me if them really get anything against me.
20 Or make the men for here talk by theirself the bad thing wey them see say I do as I stand for front of the San′he·drin.
21 The only thing wey them fit talk against me na say, when I stand among them I tell them say: ‘Them de judge me today because I get the hope say people wey don die go come back to life!’”
22 But because Felix really know things about this Way, e shift the case and talk say: “Anytime wey Lys′i·as the army commander come, I go make my decision for this una case.”
23 And e command the army officer say make them still keep the man for prison but make them give-am freedom to do some things, and say make them allow im people to care for the things wey e need.
24 After some days, Felix come with im wife Dru·sil′la, wey be Jew person and e talk say make them call Paul, and e listen to-am as e de talk about wetin e mean to believe Christ Jesus.
25 But as Paul talk about wetin correct for God eye, how person fit control imself, and the judgment wey de come, Felix start to really fear and e talk say: “Comot for here first, but when I get chance I go call you again.”
26 For the same time, e de hope say Paul go give-am money. Because of that one, e de call Paul plenty times and talk with-am.
27 But when two years don pass, Porcius Festus take over from Felix; and because Felix want make the Jew people like-am, e leave Paul under arrest.
Footnotes
^ For Greek na, “this man na sickness wey de spread.”
^ This verse no dey for the first-first manuscripts, so e be like say e no be part of God Word.
^ Or “good.”
