Colossians 4:1-18
4 Una wey be masters, make una de treat una slaves for the way wey correct for God eye and no do them partial, as una know say una still get Master for heaven.
2 Make una no tire to pray, make una continue to dey awake for the prayer, and de thank God as una de do-am.
3 For the same way, make una still de pray for us, say make God open door for the word* so that we go fit tell people the holy secret about Christ, wey make me dey for prison.
4 And de pray say make I fit tell people about-am for clear way, the way I suppose do-am.
5 Make una de use sense do things with people for outside and de use una time well.*
6 Make the things wey una de talk de always sweet, like say una put salt, so that una go know how una suppose answer each person.
7 Tych′i·cus my dear brother wey be faithful servant and wey be slave like me for the Lord, go tell una all the news about me.
8 I de send-am to una so that una go fit know how we dey and so that e go fit give una heart comfort.
9 E de come with O·nes′i·mus, wey be my faithful and dear brother, and wey come from una place. Them go tell una everything wey de happen for here.
10 Ar·is·tar′chus wey dey prison with me say make I greet una, and Mark wey be the cousin of Bar′na·bas still talk say make I greet una. (Na this Mark una receive direction about, say make una welcome-am if e come una side),
11 and Jesus wey them de call Justus, de greet una. This people dey among people wey them circumcise. Na only this ones de work together with me for the Kingdom of God and them don really comfort me.*
12 Ep′a·phras wey be slave of Christ Jesus, wey come from una place, de greet una. E de always try hard to pray for una, so that at last, una go stand strong as mature people and really dey sure about everything wey God want.
13 I de tell una true-true about-am say, e de really work hard for una and for people wey dey La·o·di·ce′a and Hi·e·rap′o·lis.
14 Luke wey be our dear doctor, say make I greet una and De′mas still say make I greet una.
15 Help me greet the brothers for La·o·di·ce′a and still greet Nym′pha our sister, and the congregation for im house.
16 And when them don read this letter for una, make una arrange make them still read-am for the congregation for La·o·di·ce′a and make una still read the one from La·o·di·ce′a.
17 Another thing be say, make you tell Ar·chip′pus say: “Put your mind for the work wey you don accept as person wey de follow the Lord, so that you go fit do-am well.”
18 Na me Paul de write this letter with my own hand, to greet una. Make una continue to remember me as I dey for prison. Make the special favor of God dey with una.
Footnotes
^ Or “give us chance to preach the word.”
^ For Greek na, “de buy time for something.”
^ Or “them don help me to dey strong.”
