Hebrews 13:1-25
13 Make una continue to love each other like brothers.
2 Make una no forget to welcome people.* Because of this one, some people don care for angels and them no even know.
3 Make una de remember people wey dey for prison* like say una dey prison with them. And still remember people wey them no de treat well, since una still dey for the same body.*
4 Make all of una honor marriage and make the marriage bed dey pure, because God go judge people wey de do sex wey no clean* and people wey don marry wey de sleep with another person.
5 Make the way una de live una life show say una no like money too much and make una dey okay with the things wey una get now. Because e don talk say: “I no go ever leave you, and I no go ever abandon you.”
6 So that we fit get strong heart and talk say: “Na Jehovah de help me, I no go fear. Wetin person fit do me?”
7 Make una de remember the people wey de guide una,* wey don tell una the word of God, and as una de take time de look the good result of their character, make una de follow their example of faith.
8 Jesus Christ na the same yesterday, today, and forever.
9 Make una no allow them deceive una with different-different teaching wey no be the same with the one wey we know. Because e better for special favor to make the heart strong, instead of food* wey no de benefit the people wey de see-am as really important thing.
10 We get altar wey people wey de do holy work for the tent no get right to chop from there.
11 Because na outside the camp them de burn the body of the animals wey the high priest de take their blood enter the holy place as sin offering.
12 So Jesus still suffer outside the gate of the city, so that e go make the people dey holy with im own blood.
13 So, make we go meet-am outside the camp and carry the shame wey e carry,
14 because we no get city wey continue to dey for here. Instead, we de use all our heart wait for the one wey de come.
15 Make we de always praise God through Jesus as sacrifice wey we de give God, wey be the fruit wey our mouth de produce. We de do this one when we de talk about the name of God for public.
16 Apart from that one, make una no forget to do good and to share wetin una get with people, because God de really like this kind sacrifice them.
17 Make una de obey people wey de guide una* and de put unaself under them, because them de always care for una* as people wey go answer for wetin them do, so that them go fit do this one with joy and no be with pain, because this kind thing no go good for una at all.
18 Make una continue to pray for us, because we trust say we get good conscience* as we want make our way dey straight for everything.
19 But I de really encourage una to pray so that I go quick come back to una.
20 Now make the God of peace, wey bring the great shepherd of the sheep wey be our Lord Jesus come back to life, with the blood of the agreement wey de last forever,
21 give una every good thing wey una need to do wetin e want. Make e use Jesus Christ move una to do wetin e really like. Make God get the honor forever and ever. Amen.
22 Now my brothers, I de advice una make una sofri listen to this word wey I write to encourage una, because na short letter I don write to una.
23 I want make una know say them don free our brother Timothy, if e quick come, I go come with-am to see una.
24 Make una greet all the people wey de guide* una and all the holy ones. People for Italy say make I greet una.
25 Make the special favor of God dey with all of una.
Footnotes
^ Or “dey kind to strangers.”
^ For Greek na, “people wey them chain.”
^ Or e fit be, “as if una de suffer with them.”
^ Check the part, Meaning of Words.
^ Or “people wey dey front among una.”
^ This one na, laws about food.
^ Or “people wey dey front among una.”
^ Or “una soul.”
^ Or “conscience wey de talk true.”
^ Or “people wey dey front among una.”
