Mark 11:1-33
11 Now when them don de near Jerusalem, them reach Mount of Olives where Beth′pha·ge and Beth′a·ny dey. E come send two of im disciples
2 and tell them say: “Make una go inside that village wey una de see so, and as soon as una enter inside, una go see small donkey* wey them tie, wey nobody don ever sitdown ontop. Make una loose-am and bring-am come here.
3 And if anybody ask una say, ‘Why una de do this thing?’ make una talk say, ‘The Lord need-am and e go bring-am back quick-quick.’”
4 So them go, and them see the small donkey* for corner of one street wey them tie for outside for front of one door, them come loose-am.
5 But some of the people wey stand there come de ask them say: “Why una de loose the small donkey?”*
6 Them tell them exactly wetin Jesus talk, and them let them go.
7 So them bring the small donkey* come give Jesus, and them put their cloths* ontop-am, and e sitdown ontop.
8 Another thing be say, plenty people spread their cloths* for road, but other people cut leaf from bush.
9 And the plenty people wey dey im front, and the ones wey de come from back continue to shout say: “We de pray say make you save-am! The person wey de come with Jehovah name na person wey them don bless!
10 Them don bless the Kingdom wey de come, wey be the Kingdom of our papa David! We de pray say make you save-am, you wey dey for heaven!”
11 E come enter Jerusalem and go inside the temple, and e look everything round. But because time don go well-well, e comot go Beth′a·ny with the 12 apostles.
12 The next day, as them de comot from Beth′a·ny, e come de hungry.
13 From far, e come see one fig tree wey get leaves, and e go check whether e go see anything ontop-am. But as e reach there, e no see anything for the tree apart from leaf, because no be the season wey fig de produce.
14 So e tell the tree say: “Make nobody ever chop fruit from you again.” And im disciples be de listen.
15 Them come reach Jerusalem. For there, e enter inside the temple, and start to pursue the people wey de sell and buy things for the temple. And e turn the table of people wey de change money upside down, and the bench of people wey de sell dove,
16 and e no gree make anybody carry anything pass the temple.
17 And e come de teach them, de tell them say: “Them no write-am say, ‘Them go call my house, house of prayer for all the nations’? But una don turn-am to where thief people de hide.”
18 And the chief priests and the scribes* hear wetin happen, and them start to find how them go kill-am; because them de fear-am, as e be say the way e de teach de surprise all the people no be small.
19 When evening don de reach, them comot from the city.
20 But when them de pass for early morning, them see say the whole fig tree, even the root don die.
21 Peter remember-am and tell Jesus say: “Rabbi, see! the fig tree wey you curse don die.”
22 As e talk this one, Jesus come tell them say: “Make una put faith for God.
23 True-true I de tell una say, anybody wey tell this mountain say, ‘Comot from here and fall inside sea,’ and e no doubt for im heart, but e get faith say wetin e talk go happen, e go happen as e talk-am.
24 Na im make I de tell una say, everything wey una de pray and de beg for, make una get faith say una don get them, and una go get them.
25 And when una stand de pray, make una forgive anything wey anybody do una, so that una Papa wey dey heaven go still forgive una, una sins.”
26 *——
27 Then, them come Jerusalem again, and as e de waka for the temple, the chief priests and the scribes and the elders come
28 and ask-am say: “Which right you get to do this things? Or who send you to do this things?”
29 Jesus tell them say: “I go ask una one question. Make una answer me, then I go tell una where I get the right to do this things.
30 Na from where John get the right to baptize people, na from heaven or na from people? Make una answer me.”
31 So them come de talk to each other say: “If we talk say, ‘Na from heaven,’ e go talk say, ‘So why una no believe-am?’
32 But we no fit even try talk-am say, ‘Na from people o.’” Them talk this one because them de fear the people, because all of them believe say na prophet John really be.
33 So them answer Jesus say: “We no know.” Jesus come tell them say: “I no go tell una where I get the right wey I take de do this things too.”
Footnotes
^ Or “donkey pikin.”
^ Or “donkey pikin.”
^ Or “donkey pikin.”
^ Or “donkey pikin.”
^ Or “the cloths wey them de wear ontop.”
^ Or “the cloths wey them de wear ontop.”
^ Check the part, Meaning of Words.
^ This verse no dey for the first-first manuscripts, so e be like say e no be part of God Word.
