Mark 13:1-37
13 As e de comot from the temple, one of im disciples tell-am say: “Teacher! See as the stones and the buildings fine reach!”
2 But Jesus tell-am say: “You see this big buildings? Them no go ever leave one stone make e remain ontop another stone. Them go fall all of them down.”
3 As e sitdown for Mount of Olives for where e de see the temple, Peter, James, John and Andrew ask-am, when e dey alone with them, say:
4 “Tell us when this things go happen, and wetin go be the sign wey go show say the end of all this things don de reach?”
5 So Jesus start to tell them say: “Make una dey careful so that nobody go deceive una.
6 Plenty people go use my name come, de talk say, ‘Na me be the person,’ and them go deceive plenty people.
7 Another thing be say, when una hear when them de fight war and news about war, make una no fear; this things must happen, but the end never come.
8 “Because nation go de fight nation, and kingdom go de fight kingdom, ground go de shake open for different-different place, and food no go too dey. This things na the beginning of things wey go cause serious pain.
9 “As for una, make una dey careful. People go carry una go their courts, and them go beat una for synagogues, and carry una go stand for front of governors and kings because of me, so that una go tell them wetin una believe.
10 Apart from that one, for all the nations, them must preach the good news first.
11 And when them de carry una go, make una no come de overworry about wetin una go talk, but any word wey them give una that time, make una talk-am, because no be una de talk, but na the holy spirit.
12 Another thing be say, brother go bring brother come make them kill-am, and papa go bring pikin, and children go stand up and dey against their papa and mama, and go make people kill them.
13 And everybody go hate una because of my name, but the person wey don endure* reach the end, them go save-am.
14 “But when una see the useless dirty thing wey de destroy things wey stand for where e no suppose dey, (make the person wey de read-am* use deep sense), then make people wey dey for Ju·de′a start to run go the mountains.
15 Make person wey dey ontop house no come down or enter inside to take anything from im house;
16 and make the person wey dey for farm no come back to come collect the things wey e leave, like the cloth wey e de wear ontop.
17 That time, women wey get belle and the ones wey get small baby go suffer!
18 Make una continue to pray say make e no fall for time wey cold dey,
19 because those days go be days of trouble, the kind one wey never dey before, from the time wey God start to make things come reach that time, and e no go dey again.
20 The truth be say, if to say Jehovah no reduce the days, nobody go survive, but because of the people wey e don choose, e don reduce the days.
21 “That time too, if anybody tell una say, ‘See! The Christ dey here,’ or, ‘See! E dey there,’ make una no believe-am.
22 Because lie-lie Christs and lie-lie prophets go come and them go do miracles and wonderful things to deceive, if possible, even the people wey God don choose.
23 So, make una open una eye well, because I don tell una everything before them go happen.
24 “But for that time, after that trouble, the sun go dark and moon no go bring light,
25 and the stars go de fall from heaven, and the powerful things for heaven go shake.
26 And that time, them go see the Son of man wey de come for the clouds with plenty power and honor.
27 And that time, e go send im angels go and them go gather the people wey e don choose together from all direction for the earth,* from the end of the earth go reach the end of heaven.
28 “Now make una learn from this example of fig tree: Once small-small branch start to come out and produce leaves, una go know say dry season don near.
29 Na so e still be for una, when una see as this things de happen, make una know say e don near, e dey for front of the door.
30 True-true, I de tell una say this generation no go ever comot until all this things happen.
31 Heaven and earth go comot, but the things wey I talk no go ever fail.
32 “As for that day or the hour, nobody know when e go come, whether the angels for heaven or the Son, but na the Papa.
33 Make una continue to de look and make una continue to dey awake, because una no know when the time wey them don fix go be.
34 E just be like one man wey want travel go another country, wey leave im house and give im slave them authority to take care of the house, and give each one im work, and e command the person wey de watch the door say make e continue to de watch.
35 So make una continue to watch, because una no know when the oga of the house de come, whether na for evening, or for midnight, or before daybreak* or for early morning,
36 so that when e come for the time wey una no de expect, e no go see say una de sleep.
37 But wetin I de tell una, I de tell everybody, say: Make una continue to de watch.”
Footnotes
^ Or “wey de endure.”
^ This one na, the prophecy of Daniel.
^ For Greek na, “from the four winds of.”
^ For Greek na, “when cock de crow.”
