Matthew 15:1-39
15 Then some Pharisee people and scribes come from Jerusalem come meet Jesus, de ask-am say:
2 “Why your disciples no de follow our papa-papa them tradition? For example, them no de wash* their hand before them chop.”
3 So e answer them say: “Why una no de follow the commandment of God because of una tradition?
4 For example, God talk say, ‘Honor your papa and your mama,’ and, ‘Make them kill anybody wey curse* im papa or mama.’
5 But una talk say, ‘Anybody wey tell im papa or mama say: “The things wey I get wey I for use help you, I don give-am to God as gift,”
6 e no need to honor im papa at all.’ Na so una don make the word of God dey useless because of una tradition.
7 Una wey de pretend, the thing wey Isaiah talk about una na really true when e talk say:
8 ‘This people de talk say them de honor me, but their heart no dey with me at all.
9 The worship wey them de worship me dey useless, because the things wey them de teach na commands from men.’”
10 Then e call all the people wey dey there say make them come, and e tell them say: “Make una listen so that una go understand wetin I de talk:
11 No be wetin de enter inside person mouth de spoil the person, but na wetin de come out from the person mouth de spoil-am.”
12 Then im disciples come meet-am and tell-am say: “You know say wetin you talk make the Pharisee people vex?”
13 Then e answer them say: “Every plant wey my Papa for heaven no plant, them go uproot-am.
14 No mind them. Them be blind people wey de lead other people. If blind man de lead blind man, the two of them go fall inside pit.”
15 Peter come tell-am say: “Explain that example wey you use before to us.”
16 So e talk say: “Una never still understand too?
17 Una no know say anything wey de enter person mouth, de pass enter im belle and from there enter inside soakaway?
18 But anything wey de come out from person mouth, na from im heart, and na this things de spoil person.
19 For example, na the heart wicked thinking de come from, wey de make people kill other people, sleep with who them no marry, put hand for sex wey no clean,* de thief, de talk lie against other people, de talk bad things against God.
20 Na this things de spoil person, but to chop food with hand wey them no wash no de spoil person.”
21 When Jesus comot from there, e go Tyre and Si′don area.
22 For there, one Phoe·ni′cian woman from that area come meet-am and de cry de beg-am with loud voice say: “Lord, Son of David, pity me. Demon dey my daughter body and e de suffer-am no be small.”
23 But e no answer the woman. So im disciples come de beg-am say: “Tell this woman make e go, because e just de cry de follow us.”
24 E come talk say: “Na the people wey be like sheep wey don lost for the house of Israel them send me come meet, no be other people.”
25 But the woman come kneel down for im front,* de beg-am say: “Lord, help me!”
26 E come answer-am say: “E no good to carry the children bread and throw-am give small-small dogs.”
27 The woman come talk say: “Na true, Lord, but the small-small dogs still de chop from the pieces wey de fall from the table of the people wey get them.”
28 Then Jesus come tell-am say: “This woman, you get faith no be small, make e happen to you as you want.” And from that very time, the daughter come well.
29 As Jesus comot from there, e come go near the Sea of Gal′i·lee, and after e don climb go the mountain, e come sitdown for there.
30 Then plenty-plenty people come meet-am, and them bring people wey no fit waka, people wey some part of their body don condemn, people wey blind, people wey no fit talk, and plenty other people wey de sick, and them put all of them for im front, and e cure them.
31 So the people surprise no be small as them see say people wey no fit talk de talk, people wey some part of their body don condemn don well, and people wey no fit waka de waka, blind people de see, and them come de praise the God of Israel.
32 But Jesus call im disciples and tell them say: “I de pity for all this people, because e don reach three days wey them dey here with me and them never chop anything. I no want tell them make them go as them de hungry* so, because them fit faint for road.”
33 But the disciples come ask-am say: “Where we fit see bread wey go reach all this plenty people, for this place wey people no dey?”
34 So Jesus come ask them say: “How many bread una get?” Them talk say: “Na seven, and some small-small fish wey no plenty.”
35 So after e tell the plenty people to sitdown for ground,
36 e collect the seven bread and the fish, and after e don thank God, e break them, and start to give the disciples, and the disciples come de share-am give the people.
37 And all the people chop belleful. And them gather the pieces wey remain, and e full seven big baskets.
38 So the people wey chop the food na 4,000 men, but them no count the women and the small children join.
39 At last, after e don tell the people say make them de go, e come enter boat go Mag′a·dan area.
Footnotes
^ This one na, to wash their hand the way Jew people their tradition talk.
^ Or “talk bad about.”
^ This na the plural of the Greek word, por·nei′a. Check the part, Meaning of Words.
^ Or “bow down to-am.”
^ Or “fast.”
