Revelation 12:1-17
12 Then one big sign appear for heaven: Na one woman wey wear sun like cloth and moon dey under im leg, and crown wey them make with 12 stars dey im head,
2 and e get belle, and e de cry, de shout because of serious pain as e want born.
3 Another sign appear for heaven. See! Na one big dragon wey get red color like fire, and e get seven head and ten horn, and seven crown dey ontop the seven head;
4 and e use im tail drag one part out of three parts of the stars for heaven and throw them come the earth, and the dragon continue to stand for the front of the woman wey go soon born, so that when e born, e go just swallow the pikin.
5 The woman come born boy, wey go use iron rod rule all the nations. And them carry im pikin quick-quick go meet God wey sitdown for im throne.
6 The woman come run go wilderness, and for there e get place wey God don prepare for-am, and them go de give-am food for there for 1,260 days.
7 And war start for heaven: Miʹcha·el* and im angels fight with the dragon and the dragon and im angels fight with them too,
8 but them no win* and them no get place to stay for heaven again.
9 So them throw the big dragon come down, the first-first snake, the one wey them de call Devil and Satan, wey de deceive the whole world. Them throw-am come this earth, and them throw im angels come down with-am.
10 I come hear one loud voice for heaven wey talk say:
“Our God don save people, e don show im power, im Kingdom don start to rule and im Christ don start to use im authority, because them don throw the person wey de accuse our brothers go down, wey de accuse them day and night for front of our God!
11 And them win-am because of the blood of the Lamb and because of the message wey them announce, and them no fear to lose their souls* even when them face death.
12 Because of this one, make heavens and una wey de live for there happy! But trouble go dey for the earth and for the sea, because the Devil don come down come meet una, and e de vex well-well, because e know say the time wey e get small.”
13 Now when the dragon see say them don throw-am come the earth, e come de cause trouble for the woman wey born the boy pikin.
14 But them give the woman the two wings of the big eagle so that e go fly go im place for the wilderness, where them go give-am food for one time, and times and half time, for where the snake no go see-am.
15 And the snake pour water wey be like river from im mouth follow the woman, so that the water go swallow-am.
16 But the earth help the woman, the earth open im mouth and swallow the river wey the dragon don pour from im mouth.
17 So the dragon vex for the woman no be small, e come comot go fight war with the children of the woman wey remain,* wey de obey the commandments of God and wey get the work to tell people the truth about Jesus.
Footnotes
^ E mean “Who Be Like God?”
^ Or e fit be, “but them win-am [this one na, the dragon].”
^ Or “lives.” Check the part, Meaning of Words.
^ For Greek na, “the remaining ones of the woman seed.”
