Revelation 14:1-20
14 Then I see the Lamb wey stand ontop Mount Zion, and 144,000 people dey with-am, and them write im name and the name of im Papa put for front of their head.
2 And I hear one sound wey de come from heaven, wey be like the sound of plenty water and like the sound of loud thunder; and the sound wey I hear be like people wey de sing and them de play their harp* as them de sing.
3 And them de sing song wey be like new song for front of the throne and front of the four cherubs* and the elders, and nobody fit learn that song apart from the 144,000 people wey them buy from the earth.
4 This na the people wey no spoil theirself with women; the truth be say, na virgins them be, na them be the people wey continue to follow the Lamb no matter where e go. Them buy them from among people for the earth as firstfruits wey them carry give God and the Lamb,
5 and lie-lie no dey their mouth; them no get any stain.
6 And I see another angel wey de fly for up, and e de announce everlasting good news to people wey de stay for the earth, to every nation and tribe and language* and skin color.*
7 E de talk with loud voice say: “Make una fear God and give-am glory, because the hour wey e go take judge people don reach, so make una worship the Person wey make the heaven and the earth and the sea and the different-different place* wey water de come from.”
8 Another angel, the second one come follow-am, and e de talk say: “E don fall! Babylon the Great don fall, the woman wey make all the nations drink the wine of im sex wey no clean* wey de hungry-am well-well!”
9 Another angel, the third one, come follow them and e de talk with loud voice say: “If anybody worship the big wicked animal and im image, e come collect mark for front of im head or im hand,
10 e go still drink the wine of God, wey be the vex wey God de vex. God go pour this wine wey e no mix with anything, for the cup wey im serious vex dey, and them go suffer this person with fire and sulfur for front of the holy angels and for front of the Lamb.
11 And the smoke from the fire wey them take de suffer them go de go up forever and ever, and day and night, them no go rest, those people wey worship the big wicked animal and im image and anybody wey collect the mark of im name.
12 Na because of this one, the holy ones need to endure, those people wey de obey the commandments of God and wey hold the faith wey them put for Jesus tight.”*
13 And I hear one voice from heaven wey talk say: “Write say: From now go, the people wey dey as one with the Lord before them die, go happy. Yes, the spirit de talk say, make them rest from their hard work, because the things wey them do de follow them.”*
14 Then I see white cloud, and the person wey sitdown ontop the cloud be like son of man, and gold crown dey im head, and e hold sharp farm knife* for hand.
15 Then another angel come out from the holy place of the temple, and e use loud voice tell the person wey sitdown ontop the cloud say: “Carry your farm knife and use-am harvest because the time* to harvest don reach, as the things wey them plant for the earth don really ripe.”
16 The person wey sitdown ontop the cloud come stretch im farm knife put for the earth and harvest the things wey dey for the earth.
17 Another angel still come out from the holy place of the temple wey dey heaven, and e hold sharp farm knife too.
18 And another angel still come out from the altar and e get authority to control the fire. E come use loud voice tell the angel wey hold the sharp farm knife say: “Carry your sharp farm knife and use-am gather the different-different bunch of vine wey dey the earth, because the vine fruits don ripe.”
19 The angel come stretch im farm knife put for the earth and use-am gather the vine of the earth, e come pour-am inside the big place wey them de make wine, wey be the vex wey God de vex.
20 Them match the fruit for the place wey them de make wine wey dey outside the city, and blood come out from the place wey them de make wine, and the blood high reach the rope wey them take tie the mouth of the horse them, and the place wey e flow go far reach about 296 kilometer.*
Footnotes
^ This one na, something wey be like guitar wey them de use play music for olden days, but e different from the guitar wey people de use today.
^ Or “living creatures.” Cherubs na angels wey get authority well-well.
^ Or “tongue.”
^ Or “and people.”
^ Or “springs.”
^ The Greek word na, por·neiʹa. Check the part, Meaning of Words.
^ For Greek na, “hold the faith of Jesus tight.”
^ Or “de go with them.”
^ Or “sickle.” This one na, one long knife wey curve wey them de use harvest things.
^ Or “hour.”
^ For Greek na, “1,600 stadium.” One stadium na 185 m (606.95 ft).
