Revelation 15:1-8
15 And I see another big and wonderful sign for heaven, na seven angels wey de bring seven punishment. Na this ones be the last ones because after them don happen, the vex wey God de vex go end.
2 And I see something wey resemble sea wey be like glass wey them mix with fire, and the people wey don win the big wicked animal and im image and the number of im name, be stand near the sea wey be like glass, and them hold harps* of God.
3 And them de sing the song of Moses wey be the slave of God and the song of the Lamb, de talk say:
“Jehovah God, the Almighty, na big-big and wonderful things you de do. You wey be the everlasting King, you de always do things for correct way and we fit trust the way you de do them.*
4 Who no go really fear you, and praise your name, Jehovah? Because na only you no de ever leave your people. All the nations go come your front and worship you, because them don see say you de judge for correct way.”
5 After this one, I see as them open the holy place of the tent for heaven, this na the place wey them keep the things wey God don talk,
6 and the seven angels wey de bring the seven punishment come out from the holy place, them wear clean linen cloth wey de shine, and them tie gold cloth wey be like belt around their chest.
7 One of the four cherubs* give the seven angels seven gold bowls and wetin full inside them na the vex wey God de vex, the God wey de live forever and ever.
8 And smoke full the holy place because of the glory of God and because of im power and nobody fit enter the holy place until the seven punishment wey the seven angels bring don complete.
Footnotes
^ This one na, something wey be like guitar wey them de use play music for olden days, but e different from the guitar wey people de use today.
^ For Greek na, “your ways dey righteous and true.”
^ Or “four living creatures.” Cherubs na angels wey get authority well-well.
