Revelation 20:1-15
20 And I see one angel wey de come down from heaven, wey hold the key of the abyss* and one big chain for im hand.
2 E catch the dragon, the first-first snake, the one wey be Devil and Satan, and e tie-am for 1,000 years.
3 And e throw-am put for inside the abyss,* lock-am inside and put seal ontop, so that e no go fit deceive the nations again, until the 1,000 years don end. After this one, them must release-am for small time.
4 And I see different-different throne, and them give the people wey sitdown ontop them the authority to judge. Yes, I see the souls of the people wey them kill because them talk the truth about Jesus, and because them talk about God, and the people wey no worship the big wicked animal or im image and wey no collect the mark for front of their head and for their hand. And them come back to life, and them rule as kings with Christ for 1,000 years.
5 (The rest of the people wey die no come back to life until the 1,000 years don end.) This na the first resurrection.
6 Anybody wey come back to life for the first resurrection go happy and na holy person; the second death no get power to do them anything. Instead, them go be priests of God and Christ, and them go rule as kings with-am* for the 1,000 years.
7 As soon as the 1,000 years don end, them go release Satan from im prison,
8 and e go comot go deceive those nations wey dey the four corners of the earth, Gog and Maʹgog, to gather them together for the war. This people plenty like sand-sand for sea.
9 And them go everywhere for the earth and surround the camp wey the holy ones dey and the city wey God love. But fire come down from heaven and burn them finish.
10 And them throw the Devil wey be de deceive them put inside the lake of fire and sulfur, the place wey the big wicked animal and the lie-lie prophet already dey, and them go suffer them* day and night forever and ever.
11 And I see one big white throne, and I still see the Person wey sitdown ontop-am. Earth and heaven run comot from im front, and them no see them again.
12 And I see the people wey don die, big and small, as them stand for front of the throne, and the person wey sitdown ontop the throne open different-different scrolls. But e still open another scroll; that one na the scroll of life. And e use the things wey them write inside the scrolls judge the people wey don die, according to wetin them do.
13 And the sea bring out people wey don die inside-am, and death and Grave* bring out people wey don die inside them, and them judge them according to wetin them do.
14 And them throw death and Grave* inside the lake of fire. This lake of fire mean the second death.
15 Another thing be say, anybody wey them no see im name for the book of life, them troway-am inside the lake of fire.
Footnotes
^ Check the part, Meaning of Words.
^ Check the part, Meaning of Words.
^ This one na, Christ.
^ Or “put them for prison.”
^ Or “Hades.” Check the part, Meaning of Words.
^ Or “Hades.” Check the part, Meaning of Words.
