Revelation 22:1-21
22 And e show me one river wey the water de give life, wey clear like crystal, wey de flow come out from the throne of God and the Lamb
2 and de flow go down go the middle of im main street. Trees wey de give life dey the two side of the river and them de produce fruit 12 times every year, and their fruit de come out every month, and the leaf them for the trees na to heal the nations.
3 And no curse go dey for the city again. Instead, the throne of God and the throne of the Lamb go dey for the city, and im slaves go worship-am;*
4 them go see im face and im name go dey for front of their head.
5 Another thing be say, night no go dey again and them no go need light from lamp or light from sun, because Jehovah God go shine light ontop them and them go rule as kings forever and ever.
6 E tell me say: “This words na wetin people fit trust and na true, yes, Jehovah, the God wey use im spirit direct the prophets, don send im angel to show im slaves the things wey must happen soon.
7 See! I de come quick-quick. Anybody wey de follow the words of the prophecy wey dey inside this scroll, go happy.”
8 Na me, John, be the person wey hear and see this things. When I hear and see them, I kneel down face ground for front of the angel wey don de show me this things, to worship-am.
9 But e tell me say: “No try-am! No do that kind thing! I be ordinary slave like you and your brothers wey be the prophets, and like the people wey de do the things wey them write inside this scroll. Worship God.”
10 E still tell me say: “No keep the words of the prophecy wey dey inside this scroll as secret, because the time wey them fix don near.
11 Make the person wey de do bad continue to do bad, and make the person wey de do rotten things continue to do rotten things, but make the person wey de do wetin correct for God eye continue to do wetin correct, and make the person wey dey holy continue to dey holy.
12 “‘See! I de come quick-quick, and wetin I go use pay people dey with me, to pay each person according to wetin e don do.
13 Na me be the Alʹpha and the O·meʹga,* the first and the last, the beginning and the end.
14 People wey wash their cloths go happy because them go get the right to go the place wey the trees of life dey and them go allow them pass the gates enter inside the city.
15 But the dogs,* and people wey de do things with demons, and people wey de put hand for sex wey no clean,* and people wey de kill other people, and people wey de worship idols, and everybody wey like lie-lie and de lie, go dey outside the city.’
16 “‘Me, Jesus, send my angel say make e tell una the truth about this things, so that the congregations go fit gain. Na me be the root and the pikin of David and the morning star wey de shine well-well.’”
17 And the spirit and the bride continue to talk say, “Come!” and make anybody wey de hear talk say, “Come!” and make anybody wey im throat dry come, and make anybody wey want, come take water wey de give life for free.
18 “I de tell everybody wey de hear the words of the prophecy wey dey inside this scroll say: If anybody add join this things, God go add the punishment wey them write inside this scroll for-am,
19 and if anybody comot anything from the things wey dey inside the scroll of this prophecy, God go comot the person part from the trees of life and from the holy city, wey be the things wey them write about inside this scroll.
20 “The person wey de talk say this things na true, talk say, ‘Yes, I de come quick-quick.’”
“Amen! Make you come, Lord Jesus.”
21 Make the special favor of the Lord Jesus dey with the holy ones.
Footnotes
^ Or “go do holy work for-am.”
^ Or “the A and the Z.” Alpha and Omega na the first and the last letters for Greek alphabet.
^ This one na, people wey de do things wey really rotten for God eye.
^ Check the part, Meaning of Words.
