Revelation 6:1-17
-
The Lamb open the first six seal (1-17)
-
The person wey sitdown ontop white horse and de win e enemies (1, 2)
-
The person wey de ride the horse wey e color be like fire go comot peace (3, 4)
-
The person wey de ride the black horse go make hunger dey (5, 6)
-
The name of the person wey de ride the horse wey e color don fade na Death (7, 8)
-
The people wey them kill dey under the altar (9-11)
-
Ground shake open well-well (12-17)
-
6 And I see when the Lamb open one of the seven seal, and I hear as one of the four cherubs de talk with voice wey be like thunder say: “Come!”
2 And I see one white horse and the person wey sitdown ontop-am hold bow, and them give-am crown, and e comot go de win im enemies until e win finish.
3 When e open the second seal, I hear as the second cherub talk say: “Come!”
4 Then another horse come out, and the color of this horse be like fire, and them give the person wey sitdown ontop-am big sword and power to comot peace from the earth so that people go de kill each other anyhow.
5 When e open the third seal, I hear as the third cherub talk say: “Come!” And I see one black horse, and the person wey sitdown ontop-am hold scale wey get two sides, for im hand.
6 And I hear wetin be like person voice for the center of the four cherubs wey talk say: “Sell one quart* of wheat for one de·narʹi·us* and three quarts of barley for one de·narʹi·us, but no let anything happen to the olive oil and the wine.
7 When e open the fourth seal, I hear the voice of the fourth cherub as e talk say: “Come!”
8 And I see one horse wey the color don fade, and the name of the person wey sitdown ontop-am na Death. And Grave* just de follow-am for back. And them give them authority to control one quarter* of the earth, make them fit kill people with long sword, hunger, serious sickness, and with wicked animals for the earth.
9 When e open the fifth seal, wetin I see under the altar na the souls* of the people wey them kill because of the word of God and because of the preaching work wey them don do.
10 And them de shout with loud voice say: “The Lord Wey High Pass, you wey be the holy and true God, how long you go wait before you judge and pay back the people wey dey this earth because of our blood wey them troway?”
11 And them give each of them long white cloth, and tell them say make them still rest small until the number of the other slaves like them wey be their brothers, wey them go soon kill the way them kill them, go complete.
12 And I see when e open the sixth seal, and ground shake open well-well; the sun come black like sackcloth wey them use hair* make, and the whole moon come be like blood,
13 and the stars wey dey heaven come fall for the earth just like when fig fruit wey never ripe de fall comot from fig tree when strong breeze de blow.
14 And heaven comot like scroll wey them de fold, and them comot all the mountain and all the island from where them dey before.
15 Then the kings for the earth, the people wey get high position and the ones wey de control army, rich people, strong people, all the slaves, and all the free people come de hide theirself for caves and for the rocks wey dey the mountains.
16 And them come de tell the mountains and the rocks say: “Make una cover us and hide us from the face of the Person wey sitdown ontop the throne and as the Lamb de really vex,
17 because the great day wey them go show say them de really vex don reach, and who go fit stand?”
Footnotes
^ Or “kilo.”
^ This one na, silver coin wey Rome people de use pay person for one day work.
^ Or “Hades.” Check the part, Meaning of Words.
^ One quarter na one part out of four parts.
^ This one fit de talk about their blood, wey de represent their life wey them pour for the altar. Check the part, Meaning of Words.
^ This one fit be goat hair.
