Romans 2:1-29
2 O my brother, so no matter who you be, you no get any excuse if you judge person. When you judge another person, you de condemn yourself, because you wey de judge de do the same things.
2 Now we know say God go judge people wey continue to do this kind things and im judgment agree with truth.
3 But O my brother, as you de judge people wey continue to do this kind things and you still de do them, you think say you go fit escape the judgment from God?
4 Or you de see-am as nothing, the plenty ways wey God de show say e dey kind and e de bear something* and e dey patient, because you no know say as God dey kind, e de try to help you make you repent?
5 But because you dey stubborn and your heart no want repent, you de gather punishment for yourself for the day wey God go vex and wey e go show say e de judge for the correct way.
6 And e go pay each person back for the things wey e do:
7 e go give life wey no go end to people wey de try to get honor and praise and body wey no de rotten, as them de try to endure to do work wey good;
8 but for people wey like to quarrel and wey no de obey the truth, but de obey bad thing, God go punish and vex for them.
9 Everybody* wey de do bad thing go suffer and get problem, first for Jew people and then for Greek people.
10 But everybody wey de do good thing, e go get honor and praise and peace, first for Jew people and then for Greek people.
11 Because God no de do partial.
12 And everybody wey sin wey no dey under law go still die, even though say e no dey under law. But everybody wey sin wey dey under law, na law them go use judge-am.
13 No be the people wey de hear the law, God de see as righteous people, but na the people wey de do wetin dey inside the law, God de talk say them dey righteous.
14 When people of the nations wey no get law de do the things wey the law talk by theirself, even though say this people no get law, them be law for theirself.
15 And them be the people wey de show say them write the things wey dey inside the law for their heart, as their conscience de agree with them, and for* their own mind, them de know whether them do bad thing or even good thing.
16 This one go happen for the day when God go use Christ Jesus judge people for the things wey them de hide, and this one na part of the good news wey I de preach.
17 If, now, you be Jew person for name, and you trust the law and de boast about your friendship with God,
18 and you know wetin e want and accept the things wey really get value, because them don teach* you from the Law,
19 and you dey sure say na you de guide blind people, you be light for people wey dey darkness,
20 you be person wey de correct people wey dey foolish, you de teach young children, and you understand the main teaching* and the truth wey dey the Law—
21 but you wey de teach another person, you no de teach yourself? You wey de preach say, “No thief,” you de thief?
22 You wey de talk say, “No sleep with person wey no be your husband or wife,” you de sleep with person wey no be your husband or wife? You wey hate idols, you de thief from temples?
23 You wey de boast about law, you de bring shame to God as you de break the Law?
24 Just as them don write-am say, “People de talk bad about the name of God for the nations because of una.”
25 The truth be say, to circumcise get gain, only if you de follow the law; but if you de break the law, e go just be like say you never circumcise, even though say you don circumcise.
26 So, if person wey no circumcise de do the correct things for God eye as the Law talk, God go see the person as person wey don circumcise, even though say e never circumcise, no be so?
27 And as the person wey no circumcise for flesh de obey the Law, e go judge you wey de break the law even though say you get the law wey them don write and you don circumcise.
28 To be Jew no be about who person be for outside, and to circumcise no be something about the outside, about the flesh.
29 But person na Jew because of who e be for inside, and na im heart e circumcise with spirit and no be with the law wey them write. That person de get im praise from God, no be from people.
Footnotes
^ Or “e de allow things wey vex-am.”
^ Or “The soul of everybody.”
^ For Greek na, “between.”
^ Or “them don use mouth teach.”
^ Or “you get the shape of the teaching.”
