Titus 3:1-15
3 Make you continue to remind them to dey under governments and people wey dey high position and de obey them, to dey ready to do every good thing,
2 no de talk bad things about anybody, no de quarrel-quarrel, but make them de accept the ideas of* other people, de always show say them dey gentle with everybody.
3 Because e get the time wey we too no get sense, we no de obey, them deceive us, we be slaves to different-different things wey our body want and bad things wey we want enjoy, we continue to do bad-bad things and get bad belle, we rotten, and de hate one another.
4 But when God our Savior show say e dey kind, and say e love people,
5 (because of im own mercy, no be because of any correct thing wey we don do for im eye), e save us as e clean* us to give us life and as e use holy spirit to make us new.
6 E use Jesus Christ our Savior to pour plenty of this spirit ontop us,*
7 so that after God don talk say we dey righteous because of im special favor, we fit inherit life wey no go end wey agree with our hope.
8 This things na true, and I want make you continue to talk about this matter more-more, so that people wey don believe God fit de put their mind to continue to do wetin good. This things dey good and people go gain from them.
9 But no get anything to do with foolish argument and things wey them don write about family history, and quarrel-quarrel, and fight-fight about the Law, because gain no dey this things and them dey useless.
10 If any person de support lie-lie group, reject the person after you don warn* the person first time and second time,
11 because you know say this kind person don leave the correct road and e de sin and the things wey e de do don judge-am.
12 When I send Arʹte·mas or Tychʹi·cus to you, make you do your best to come meet me for Ni·copʹo·lis, because na there I don decide to stay for the cold season.
13 Try prepare things for Zeʹnas wey sabi the Law well-well, and A·polʹlos, so that them go get everything wey them need for their journey.
14 But make our people still learn how them fit continue to do good things, make them fit help when need really dey, so that them no go stop to do good thing.*
15 Everybody wey dey with me say make I greet you. Help me greet the brothers wey love us.
Make the special favor of God dey with all of una.
Footnotes
^ Or “de use sense do things with.”
^ For Greek na, “bath.”
^ Or “to open hand give us this spirit.”
^ Or “advice.”
^ For Greek na, “stop to produce fruit.”
