Jehovah don promise sey: ‘I go dry all the water wey dey comot from una eye. Una no go feel pain, sick or die again. Una go forget all this bad bad things.’

When Jehovah make Adam and Eve, e put dem for the garden of Eden make dem enjoy life. Jehovah want make dem worship am and born pikin full the earth. Dem no do wetin God tell dem, but that one no change wetin God get for mind. For this book, we don learn sey anything wey God talk must happen. God Kingdom go bring better better things come this earth, as e promise Abraham.

E no go tey, Satan and im demon, and all the bad bad people go die. People wey dey alive go worship Jehovah. Nobody go sick or die. Everyday we go wake up with strong body and we go dey happy. The earth go fine well well. Better house and food go dey for everybody. People go love theirself. Nobody go dey cause wahala. We and all the animal go be friend. Animal no go dey fear us and we no go fear any animal, even lion.

We go happy well well when Jehovah go bring people wey don die come back to life. We go welcome people wey don die tey tey like Abel, Noah, Abraham, Sarah, Moses, Ruth, Esther and David. Dem go join hand with us make the earth paradise. Better better work go dey.

Jehovah want make you enter paradise. You go come know many many things about Jehovah wey you never know before. So make we near Jehovah, and make we no stop to be im friend.