One day wey only Eve dey the garden, one snake come dey talk to am. The snake sey: ‘Na true sey God no let una chop from all the tree wey dey the garden?’ Eve answer am sey: ‘We fit chop from all the tree wey dey the garden apart from one. If we chop from that tree, we go die.’ The snake tell am sey: ‘You no go die. Even self, if you chop from that tree, you go be like God.’ You think sey na true the snake talk? For where! That one na big lie. But Eve believe am. The more Eve dey look the tree, the more the tree dey enter im eye. E come chop from the fruit and still give Adam. Adam know sey if dem chop the fruit, dem go die. But e still chop am.

Later that day, Jehovah come ask Adam and Eve sey why dem chop the fruit. Eve sey na snake, Adam sey na Eve. As e be sey Adam and Eve no obey Jehovah, e pursue dem comot for the garden. God come put angel and one sword with fire for the place wey them dey pass enter the garden, make dem for no enter again.

Jehovah sey e go still punish the person wey lie for Eve. No be the snake really talk to Eve o! Jehovah no make snake to dey talk. Na one bad angel make am be like sey the snake dey talk. E do am to deceive Eve. That angel na Satan the Devil. E no go tey, Jehovah go destroy Satan so that e no go fit dey deceive people to dey do bad things again.