As Jezebel hear wetin happen to Baal prophet, e come dey vex well well. E come send people go tell Elijah sey: ‘Tomorrow, you go die like Baal prophet.’ As Elijah hear am, e start to dey fear. Na im e run go desert. E come pray sey: ‘Jehovah, I no fit again. Just kill me.’ E come start to dey sleep because e don tire well well.

One angel wake am up, come sofri tell am sey: ‘Get up make you chop.’ Elijah come see one round bread for top of stone. E still see jug of water. E come chop and drink and start to dey sleep again. The angel come wake am again and tell am sey: ‘Chop o! You need power for this waka.’ Elijah come chop again. E come travel for 40 days and 40 night until e reach the mountain wey dey Horeb. As e reach there, e enter one hole go sleep. Jehovah come tell am sey: ‘Elijah, wetin you dey do for here?’ E answer Jehovah sey: ‘Israel people no gree do wetin dem promise you. Dem don scatter your altar and kill your prophet. Now, dem dey try to kill me.’

Jehovah tell am sey: ‘Go stand for the mountain.’ One strong breeze first blow pass the hole. Ground come shake and fire come down. The last thing wey e hear na low voice. E come cover im face with im coat and stand for outside the hole. Jehovah come ask am wetin make am run comot. E talk sey: ‘Na only me remain.’ But Jehovah tell am sey: ‘No be only you dey. I still get 7,000 people for Israel wey worship me. Go make Elisha prophet, make e take over from you.’ Na once e go do wetin Jehovah tell am. You no think sey Jehovah go help you if you dey do wetin e want? Yes o! E go help you well well. Make we see something wey happen that time when rain no fall.