Jezebel born one pikin wey wicked like am, dem dey call the pikin Athaliah. Athaliah marry Judah king. When the king die, e pikin start to dey rule. But as the pikin die, Athaliah come make imself ruler for Judah. E try to kill anybody for the family wey suppose be king. E even kill any of im grand pikin wey e hand reach. Everybody come dey fear am.

High Priest Jehoiada and im wife Jehosheba, know sey wetin Athaliah dey do no good. Dem put their life for danger to save one of Athaliah grand pikin wey dem dey call Jehoash. Dem train am for temple.

When Jehoash reach seven years, Jehoiada gather all the Levite and the oga of all the bodyguard, and tell dem sey: ‘Make una guard the temple door, make una no let anybody enter.’ Na im Jehoiada put crown for Jehoash head and make am Judah king. People wey dey Judah come dey shout sey: ‘Make the king live forever!’

Athaliah hear as people dey shout, na im e enter the temple. As e see the king, e shout sey: ‘Na plan work! Na plan work!’ The oga of the bodyguard come carry Athaliah comot go kill am. But what of the bad bad things wey e don make people dey do for Judah?

Jehoiada make dem promise Jehovah sey na only im dem go worship. Jehoiada tell dem make dem scatter all the juju temple and pieces all the juju. E choose priest and Levite wey go dey work for the temple make people fit worship Jehovah well again. E choose people wey go dey guard the temple make bad people for no enter. Im and the oga of the bodyguard come carry Jehoash go the palace and put am for im throne. Everybody for Judah come dey happy. Last last, dem fit serve Jehovah well because wicked Athaliah and juju worship no dey again. You no think sey the strong mind wey Jehoiada get help many people?