Our Christian Brothers and Sisters:

As people wey dey worship Jehovah, we love Bible. We believe sey wetin Bible talk about things wey don happen na true. We still believe sey Bible dey help us for our life and e dey show us sey Jehovah love us well well. (Psalm 119:105; Luke 1:3; 1 John 4:19) E dey sweet us to help other people know the truth wey dey inside Bible. Na im make we happy to release this book. The title na “Lesson Wey You Fit Learn From Bible.” Make we tell una some things about this book.

Many things wey dey this book na for children. But we fit still use am help other people wey want learn Bible. And as e be sey Bible na for everybody, we know sey everybody go gain from the lesson wey dey this book wey go make us happy well well.

This book tell us about our first papa and mama from when God make things come reach our time, and na Bible all the lesson come from. We don make sure sey the story wey dey this book dey simple and clear. We still do everything wey we fit do to write am as e take happen.

This book no be just story story about Bible o! Wetin we write and the picture wey we use go make Bible story be like real life. E go still make us know how dem feel that time.

This book go help us see sey, Bible na book wey talk about people​—people wey obey Jehovah and people wey no obey am. And the book go help us learn from their example. (Romans 15:4; 1 Corinthians 10:⁠6) The book get 14 part.  Before we start any part, we go see wetin dey some of the lesson wey we want learn.

If you be papa or mama, you and your pikin fit read one lesson and talk about the picture. Una fit still read the Bible portion wey that lesson come from. Help your pikin see how the Bible portion wey una read take support wetin e read for the book. You fit still do am like that if you dey use the book teach other people about Bible.

We dey pray sey this book go help people wey get better mind learn from Bible and do wetin dem dey learn. The book go help dem whether dem young or old. This one go come make dem worship Jehovah as one family.