1. How we fit know the things wey e go happen for future?

AS YOU de watch news for television or listen for radio, you don ever wonder say, ‘Things fit bad pass as e dey so?’ As plenty bad-bad things de happen, e de make some people think say this world go soon end. Na true? We fit know the future? Yes. Even if we no fit know the things wey e go happen for future, Jehovah know. And for Bible, e don tell us how our life and this earth go be.​—Isaiah 46:10; James 4:14.

2, 3. Wetin the disciples of Jesus be want know, and how Jesus answer them?

² When Bible talk about the end of this world, wetin e mean? No be the end of this earth, but na the end for wicked people. Jesus be teach people say the Kingdom of God go rule this earth. (Luke 4:43) The disciples of Jesus be want know when the Kingdom go come, so they ask Jesus say: “Na which time all this things go happen, and wetin go show say you don come and the end for this world don near?” (Matthew 24:3) Jesus no tell them any date, but e tell them the things wey e go happen before this world go end. The things wey Jesus talk don de happen now.

³ For this chapter, we go learn things wey e go show us say we don really near the end of this world. We go first learn about one war wey e happen for heaven. This one go help us understand why bad things plenty for this earth.

4, 5. (a) Wetin happen for heaven after Jesus start de rule as King? (b) As Revelation 12:12 talk, wetin go happen for this earth after they troway Satan come down?

⁴ For Chapter 8, we learn say for 1914, Jesus start de rule as King for heaven. (Daniel 7:13, 14) The book of Revelation talk the thing wey e happen: “War come start for heaven: Michael [wey e be Jesus] and e angel them fight with the dragon [Satan], and the dragon and e angel them fight too.” * Jesus win the war, and e troway Satan and e demons for this earth. Just think how the angels go de happy! But what about the people for earth? Bible talk say trouble go plenty for the earth. Why? Because Satan de over vex, and “e know say na small time e get.”​—Revelation 12:7, 9, 12.

⁵ Satan de do everything wey e fit do to cause trouble for this earth. E de over vex because e know say small time, e end go come. Make we see the things wey Jesus talk say they go happen for the last days.​—Check Endnote 24.

6, 7. Wetin we fit talk about war and hunger for this our time?

⁶ War. Jesus talk say: “Nation go fight nation, and kingdom go fight kingdom.” (Matthew 24:7) They don kill plenty people for war for this our time pass any other time. One report from Worldwatch Institute show say since 1914, they don kill people wey they pass 100 million for war. People wey they die for  war from the year 1900 go reach year 2000, plenty pass people wey they don kill for all the war before the year 1900. Just think about the pain and other things wey people de suffer because of war!

⁷ Hunger. Jesus talk say: “Food no go plenty.” (Matthew 24:7) People de produce food now pass any other time, but still, plenty people no de chop belleful. Why? Because they no get money to buy food, or to buy land wey they go use plant the thing wey they go chop. People wey them de suffer from serious poverty plenty pass one billion. World Health Organization talk say plenty-plenty children de die every year, because they no get correct food wey go make them strong.

8, 9. Wetin show say the things wey Jesus talk about ground wey e de shake and sickness don de happen?

⁸ Ground de shake de open. Jesus don talk-am before say: “Ground go de shake de open.” (Luke 21:11) Every year, we de see say for different-different  place, ground de shake de open. From the year 1900, ground don shake and kill people wey they pass two million. Even as science don make machine wey e go de show them anytime wey ground want shake, plenty people still de die.

⁹ Sickness. Jesus still talk say “sickness go plenty.” Bad-bad sickness go spread and e go kill plenty people. (Luke 21:11) Na true say doctors fit cure plenty sickness, but some still dey wey they no fit cure. Even one report talk say every year, people wey de die because of sickness like tuberculosis, malaria, and cholera, plenty reach millions. No be only that one, doctors don see some 30 new sickness, and some of them no get cure.

10. Na how the things wey 2 Timothy 3:1-5 talk de happen now?

¹⁰ For 2 Timothy 3:1-5, Bible talk say: “For last days, things go really hard to handle.”  Apostle Paul talk how people go de behave for the last days. E talk say people

• go love only theirself

• go like money

• no go de obey their papa and mama

• no go de do as they talk

• no go love their family

• no go fit control theirself

• go quick de vex and they go like de fight

• go like enjoyment instead of God

• go de pretend say them de serve God, but they no de do wetin God talk

11. As Psalm 92:7 talk, wetin go happen for wicked people?

¹¹ Plenty people for your place de behave like this? Na so plenty people for the whole world de behave. Small time, God go do something. E promise us say: “When wicked people de grow like grass and when things de waka fine for them, know say small time God go destroy them forever.”​—Psalm 92:7.

12, 13. Wetin Jehovah don teach us for this last days?

¹² Bible talk say for the last days, pain and suffer go full this earth. But e still talk say good things go happen.

¹³ People go understand Bible. Prophet Daniel talk something wey e go happen for last days. E talk say: “The truth go dey for everywhere.” (Daniel 12:4) For people wey they love God, e go help them understand Bible pass as they be understand-am before. Since 1914, Jehovah don really de do this one. For example, e don teach us how e name dey important and the things wey e want do for this earth. E still teach us the truth about the ransom, wetin de happen when we die, and how e go wake people wey they don die. We don learn say na only the Kingdom of God fit solve all our problem. We don still learn about the thing wey e fit really make us dey happy, and how we go fit live the kind life wey e go make God happy. But wetin we go do with all this things wey we don learn? Another thing wey Bible talk go give us the answer.​—Check Endnotes 21 and 25.

14. Which people de preach the good news about the Kingdom, and na for which place them de preach-am?

¹⁴ People go de preach for the whole world. Jesus be talk about the last days say: “They go preach the good news about the Kingdom for everywhere for this earth.” (Matthew 24:3, 14) Now, we de preach the good news for 240 different country and for language wey e pass 900. Yes, Jehovah Witness them “from different-different country and place,” de help  people understand wetin be the Kingdom and wetin that Kingdom go do for people. (Revelation 7:9) They no de pay them for this work. Even as plenty people de hate and de suffer them, nothing fit stop their preaching work. Na so Jesus talk say e go happen.​—Luke 21:17.

15. (a) You believe say we de live for the last days? Why? (b) Wetin go happen for people wey they obey Jehovah and the ones wey they no obey?

¹⁵ You believe say na the last days we dey? Plenty things wey Bible talk don de happen now. Small time, Jehovah go stop this preaching work and “the end” go come. (Matthew 24:14) Which time the end go come? Na for Armageddon. Na that time God go remove all wicked things. Jehovah go use Jesus and the angels destroy anybody wey e no obey them. (2 Thessalonians 1:6-9) After that one, Satan and the demons no go de deceive people again. What about the people wey de obey God and support the Kingdom? They go see how God go do all the things wey e don promise.​—Revelation 20:1-3; 21:3-5.

16. As the end don de near, wetin you need to do?

¹⁶ This world wey Satan de rule go soon end. So e dey important make we de ask ourself say, ‘Wetin I need to do?’ Jehovah want make you learn plenty things from Bible. No play with your study. (John 17:3) Every week, Jehovah Witness them de get meeting wey e fit help you understand Bible. Try de go their meeting every time. (Read Hebrews 10:24, 25.) If you learn say some things dey wey you need to  change, no fear to change them. Because if you do so, you and Jehovah go come be tight friend.​—James 4:8.

17. Why plenty people go surprise when the end go come?

¹⁷ Apostle Paul talk say they go destroy all wicked people for time wey they no expect-am, “just as thief de come for night.” (1 Thessalonians 5:2) Jesus talk say plenty people no go believe the things wey e show say we de live for last days. E talk say: “Just as e be dey for the time of Noah, na so e go be when the Son of man go come. That time before the heavy rain fall, people de chop and drink, men de marry, and them de give their women out for marriage, until that day wey Noah enter the ark, and they no even notice-am until the heavy rain come and destroy all of them. Na so e go still happen when the Son of man go dey around.”​—Matthew 24:37-39.

18. Which warning Jesus give us?

¹⁸ Jesus warn us say make we no allow “too much food and drink and problems for life” draw us comot for God side. E talk say the end go come quick-quick, “like trap,” and “e go come meet everybody for the whole earth.” E still talk say: “No sleep, and de beg God for prayer everytime so that you go fit escape from all this things because they must happen, and you go fit stand for the front of the Son of man.” (Luke 21:34-36) Why e good make we follow this thing wey Jesus talk? Because small time, they go destroy this world wey Satan de control. And na only people wey them de do the thing wey Jehovah and Jesus want, go save and stay forever for the new world.​—John 3:16; 2 Peter 3:13.