1, 2. Give example of people wey they be friend of Jehovah?

NA WHICH kind person you want as your friend? Na person wey wuna understand each other. You like the person and the fine character wey e get.

² Jehovah God choose some people make they be e friend. One of them na Abraham. (Isaiah 41:8; James 2:23) Jehovah still like David. E talk say David na the kind person wey e want. (Acts 13:22) And God see prophet Daniel as special person.​—Daniel 9:23.

3. Wetin make Abraham, David, and Daniel be friend of Jehovah?

³ How Abraham, David, and Daniel come be friend of Jehovah? Jehovah be tell Abraham say: “You don listen to my voice.” (Genesis 22:18) If person de put body down and de obey God, e go be friend with God. Even all the people for one country fit be friend of God. Jehovah be tell the people for Israel say: “Obey my voice, and I go be wuna God, and wuna go be my people.” (Jeremiah 7:23) So you must obey God if you want make e be your friend.

4, 5. How Jehovah de protect e friends?

⁴ Bible tell us say Jehovah de find ways “so that e go show e power for people wey them de serve him with all their heart.” (2 Chronicles 16:9) For Psalm 32:8, Jehovah promise e friends say: “I go give you understanding  and I go teach you the way wey you go follow. I go advice you as my eye go dey on you.”

⁵ One strong enemy no want make we be friend with God. But Jehovah want protect us. (Read Psalm 55:22.) Because we be friend of God, we de serve God with all our heart. Even for time wey things hard for us, we still de hold Jehovah tight. And we get the kind trust wey David get for God. David talk about Jehovah say: “Because e dey my right hand side, nothing go ever shake me.” (Psalm 16:8; 63:8) Which things Satan de do to make us no be friend with God?

6. Wetin Satan talk about people?

⁶ For Chapter 11, we be learn say Satan de talk bad about Jehovah. E talk say Jehovah de lie. And e still talk say na bad thing Jehovah do as e no allow Adam and Eve decide good and bad thing by theirself. The book of Job tell us the bad things wey Satan de talk about people wey they want be friend with God. Satan talk say this people no really love God. E talk say them de serve God because of the things wey they want gain. Satan even talk say e fit make anybody stop to serve God. Make we see wetin we fit learn from Job and how Jehovah protect Job.

7, 8. (a) Na who be Job? (b) Wetin Satan talk about Job?

⁷ Who be Job? Job na one good man wey be live for this earth about 3,600 years ago. Jehovah talk say for that time, no man be like Job for this earth. Job get respect for God, and e hate bad things. (Job 1:8) Job na really friend of God.

 ⁸ Satan be talk say Job de serve Jehovah because of the things wey e want gain. Satan tell Jehovah say: “No be you put fence wey e de protect Job, e house and all the things wey e get? You don bless the work wey e de do, and e animals don plenty for the whole land. But, make things change, stretch your hand, destroy everything wey e get, and see if e no go curse you for your front.”​—Job 1:10, 11.

9. Wetin Jehovah allow Satan make e do?

⁹ Satan talk say Job de only serve Jehovah because of the things wey e de get from Jehovah. E still talk say e fit make Job stop to serve Jehovah. Jehovah no agree with Satan. But Jehovah allow Satan make e test Job. Na this one go show whether Job really de serve Jehovah because of love.

10. How Satan attack Job, and wetin Job do?

¹⁰ The first thing wey Satan do be say, e do-am make people thief the animals wey Job get and kill the ones wey e remain. E still kill some of the servant wey Job get. Job lose everything. The last thing be say, Satan use strong breeze kill the ten children wey Job get. But Job no leave Jehovah. “As all this things de happen, Job no sin, and e no talk say God don do thing wey e no correct.”​—Job 1:12-19, 22.

11. (a) Which other problem Satan cause for Job? (b) Wetin Job do?

¹¹ Satan still continue. E tell God say: “Touch e flesh and e bone, and e go really curse you for your front.” So Satan give Job one bad sickness. (Job 2:5, 7) Even with this one, Job still hold Jehovah tight. E talk say: “Until I die, I no go stop to do the correct thing!”​—Job 27:5.

12. How Job show-am say the things wey Satan be talk na lie?

 ¹² Job be no know all this things wey Satan don talk, and e no know why e de suffer. E be de think say na Jehovah de cause-am. (Job 6:4; 16:11-14) But even as e be like that, Job continue de serve Jehovah. So e dey clear say Job really love God. E no de serve God because of the things wey e go gain. So all the things wey Satan talk na lie!

13. Which better thing happen as Job no leave Jehovah?

¹³ Job no know about the things wey e de happen for heaven, but e no stop to serve God and e show-am say Satan na wicked person. Job get blessing as e continue to serve Jehovah.​—Job 42:12-17.

14, 15. Wetin Satan de talk about all of us?

¹⁴ You fit learn important lessons from the things wey e happen to Job. For this our time, Satan still de talk say we de serve God because of the things wey we want gain. For Job 2:4, Satan talk say: “Na everything wey person get e go give because of e life.” So Satan de talk say all of us de serve Jehovah because of the things wey we go gain. No be only Job e de talk about. Plenty years after Job die, Satan still de talk bad about Jehovah and e servants. For Proverbs 27:11, Bible talk say: “Show say you get sense my pikin, and my heart go glad, so that I go fit answer the person wey e de insult me.”

¹⁵ How you go show say the thing wey Satan talk na lie? Choose say you go obey God and make you be e friend. E fit mean say you go change some big things for your life. But make you know say na the best thing  wey you fit ever do! This one na serious matter. Satan de talk say you go stop to serve God when you get problem. E want fool us make we stop to be friend with God. How e de do-am?

16. (a) Na which things Satan de do to stop people make they no be friend of God? (b) Na how Satan fit try to stop you make you no serve Jehovah?

¹⁶ Satan get different-different ways wey e de use so that we no go be friend of God. E de attack “like lion wey e de shout. E de find person wey e go chop.” (1 Peter 5:8) Make e no surprise you if your friends, family members or other people de try to stop you make you no de study Bible. They fit no even want make you do the correct thing. And you fit de feel say them de attack you. * (John 15:19, 20) Satan still de pretend “like angel of light.” So e fit de try to fool us make we no obey Jehovah. (2 Corinthians 11:14) Another thing wey Satan de do be say, e de make us think say God no go ever love us.​—Proverbs 24:10.

17. Why we de obey Jehovah?

¹⁷ When we de obey Jehovah, we de show say Satan de lie. Wetin go help us make we de obey? Bible tell us say: “You must use all your heart, soul, and power love Jehovah your God.” (Deuteronomy 6:5) Na love de make us de obey Jehovah. As the love wey we get for Jehovah de grow, we go de like to do everything wey e  tell us. Apostle John talk say: “If we want show say we love God, we go follow e laws; and the laws no hard.”​—1 John 5:3.

18, 19. (a) Wetin be some things wey Jehovah say e bad? (b) How we know say the things wey Jehovah tell us na things wey we fit do?

¹⁸ But wetin be some of the things wey Jehovah say make we no do? Some examples dey for the box wey get the topic: “ Hate the Things Wey Jehovah Hate.” You fit de think say some of this things no really bad. But if you read the Bible verse and you think-am well, you go see say e good to obey the laws wey Jehovah don give us. You fit even see say you need to change some things for your life. Sometimes, e no dey easy for person to change, but if you change, you go be friend of Jehovah. E go make you get peace, and you  go dey happy. (Isaiah 48:17, 18) Wetin make us know say we fit change our life?

¹⁹ Jehovah no go ever tell us make we do something wey we no fit do. (Deuteronomy 30:11-14) Jehovah na correct friend so e know us pass as we know ourself. E know the things wey we de do well and the things wey e dey hard for us. (Psalm 103:14) Apostle Paul talk say: “God no de fail, e no go let anything wey pass wuna power tempt wuna. But as the temptation de come, e go help wuna make wuna fit endure-am.” (1 Corinthians 10:13) We fit trust Jehovah say e go always give us power to do the correct thing. E go give you “power wey e pass normal power.” This one go help you to endure big problems. (2 Corinthians 4:7) After Jehovah help Paul when e face serious problem, e talk say: “For  everything I de get power from the person wey e de give me power.”​—Philippians 4:13.

20. Which character we go copy, and why?

²⁰ If we want be friend with Jehovah, we must stop to do the things wey Jehovah hate. But we still need to do other things. (Romans 12:9) People wey they love God de do the things wey God love. Bible talk about this people for Psalm 15:1-5. (Read.) This people de copy the character wey Jehovah get. Them de show “love, joy, peace, patience, kindness, goodness, faith, mildness, self-control.”​—Galatians 5:22, 23.

21. How you fit learn to show fine character wey God like?

²¹ How you fit learn to show all this fine character? Make you de read and de study Bible. That one go make you do the things wey Jehovah like. (Isaiah 30:20, 21) As you de do-am, you go de get strong love for Jehovah. As this love de grow, e go make you de do the things wey e want.

22. Why e good make you obey Jehovah?

²² As you want change some things for your life, e just be like when you de remove old cloth and you de wear new one. Bible talk say you need to “remove the old character” and “wear the new character like cloth.” (Colossians 3:9, 10) Sometimes, e no de easy make person change, but when we change our life and obey Jehovah, e promise say e go give us “plenty blessing.” (Psalm 19:11) So choose say you go obey God, make you show-am say Satan de lie. Serve Jehovah because of love. No serve God because of the things wey you want gain. Then you go really be friend with God!