The name of God na Jehovah, and we understand-am to mean “E De Make to Become.” Jehovah na the God wey get power pass, and na e make everything. E fit do anything wey e want do.

They write the name of God with four letters for Hebrew language. For English, this letters na YHWH or JHVH. For the part of Bible wey they write with Hebrew, they write the name of God for almost 7,000 times. People for different-different place de call the name Jehovah for different way.

▸ Chap. 1, par. 15

Na God get Bible, but e use people write-am. E just be like when one mama tell e pikin make e write letter and e tell the pikin the things wey e go write. God direct the people wey write Bible with e holy spirit so that they go write the things wey e want. The spirit of God direct them for many ways. Sometimes, e use vision or dream show them things wey they go write.

▸ Chap. 2, par. 5

This one na things for Bible wey de teach us important truth. For example, when Bible talk say “bad friends de spoil fine character,” e de teach us say our friends fit make us be good people or bad people. (1 Corinthians 15:33) And when Bible talk say “anything wey person plant, na that thing e go harvest,” e teach us say anything wey we do get reward.—Galatians 6:7.

▸ Chap. 2, par. 12

This one na message from God. The message fit talk the things wey God want, things wey e want make we de do, how e want make we de live our life, or things wey go happen for bad people. E fit still tell us things wey go happen for future, and many of this things don already happen.

▸ Chap. 2, par. 13

Bible be talk plenty things about the Messiah and this things happen to Jesus. Check the box “ Things Wey Bible Talk About the Messiah.”

▸ Chap. 2, par. 17, ftn.

Jehovah make the earth so that e go be paradise wey good people go stay. The thing wey e want never change. Small time, e go remove all bad things and all the people wey love God go live forever.

▸ Chap. 3, par. 1

Satan na the angel wey start de strong-head for God. The name Satan mean “person wey e dey against another person,” na so Satan be, because e like to fight against Jehovah. The name Devil mean “person wey e de talk bad about another person.” Them de call-am this name because e de talk lie about God and e de deceive people.

▸ Chap. 3, par. 4

Jehovah make angels long time before e make the earth. E make them so that they go stay for heaven. They plenty pass hundred million. (Daniel 7:10) All of them get name, and they get different-different character. The angels de obey Jehovah, them de put body down, and they no want make people worship them. Angels get different position and work wey God give them. For example, some of them de worship Jehovah for front of e throne, some de tell people wetin God talk, some de direct and protect the people of God, some de punish wicked people, and other ones de support the preaching work. (Psalm 34:7; Revelation 14:6; 22:8, 9) For future, they go join Jesus for the war of Armageddon.—Revelation 16:14, 16; 19:14, 15.

▸ Chap. 3, par. 5; Chap. 10, par. 1

Sin na anything wey Jehovah hate wey we de feel, think, or do. Sin de spoil our friendship with Jehovah. Na e make Jehovah give us law and advice wey go help us run from sin. All the things wey Jehovah make dey perfect. But when Adam and Eve no obey God, they sin and they troway their perfect life. They old and they die. We too de old and de die because we be children of Adam and Eve.

▸ Chap. 3, par. 7; Chap. 5, par. 3

Na the war wey God go use destroy this wicked world and all bad things.

▸ Chap. 3, par. 13; Chap. 8, par. 18

The Kingdom of God na government wey Jehovah don arrange for heaven. Jesus Christ de rule as King for that Kingdom. Small time, Jehovah go use e Kingdom remove all bad things. The Kingdom go rule the earth.

▸ Chap. 3, par. 14

God make Jesus before e make all other things. Jehovah send Jesus make e die for all of us. Jehovah resurrect Jesus after e die. Now, Jesus de rule as King for the Kingdom of God wey e dey heaven.

▸ Chap. 4, par. 2

Bible be talk the time wey people go know who the Messiah be. E talk say e go happen after some time wey be 69 weeks. This 69 weeks start for the year 455 B.C.E. and e end for the year 29 C.E.

How we know say e end for 29 C.E.? The 69 weeks start for the year 455 B.C.E. when Nehemiah go Jerusalem and start de build the city again. (Daniel 9:25; Nehemiah 2:1, 5-8) Just as the word “dozen” de make us think about 12, na so the word “week” de make us think about 7. The weeks wey Bible talk for here no be normal week of seven days but na week of seven years. This one agree with wetin Bible talk when e talk say “one day na one year.” (Numbers 14:34; Ezekiel 4:6) This one mean say one week mean seven years. So 69 weeks go be 483 years (69 x 7). If we start de count 483 years from 455 B.C.E., we go end for the year 29 C.E. Na that same year Jesus baptize and come be Messiah!—Luke 3:1, 2, 21, 22.

 Bible still talk about another week wey e mean another seven years. For inside this time, they go kill the Messiah. This one happen for the year 33 C.E. And for the year 36 C.E., they go start de preach the good news about the Kingdom of God for everywhere, so that people wey no be Jew go still hear-am.—Daniel 9:24-27.

▸ Chap. 4, par. 7

Bible talk say na Jehovah God make all things, and na Jesus e make first. (Colossians 1:15, 16) Jesus no be Almighty God. E no ever talk say e dey equal with God. Instead, e talk say: “My Father big pass me.” (John 14:28; 1 Corinthians 15:28) But some religion de teach say God na three in one. They talk say the Father, the Son, and the holy spirit na one God. The word “Trinity” no dey for Bible. This na lie-lie wey some religion de teach.

Holy spirit na the power wey God de use do anything wey e want do. So, holy spirit no be person and we no fit see-am. For example, “holy spirit enter” the Christians for the time of the apostles. And Jehovah talk say: “I go pour some of my spirit on top all kind of people.”—Acts 2:1-4, 17.

▸ Chap. 4, par. 12; Chap. 15, par. 17

Why true Christians no de use cross when them de worship God?

1.  Lie-lie religion don de use cross for long time. Before Jesus come this earth, people de use cross worship things wey God make, and pagan people de use-am for sex worship. For the first 300 years after Jesus die, Christians no de worship God with cross. After many years, Emperor Constantine wey be rule for Rome talk say make Christian de use cross. E do-am so that people wey no de worship God go start de go church. But cross no get anything to do with Jesus Christ. One book wey they call-am New Catholic Encyclopedia talk say people don de use cross before Jesus come this earth and people wey no be Christian still use-am.

2.  Jesus no die for cross. The Greek word wey they translate as cross mean “straight stick,” “big long wood,”  or “tree.” The Companion Bible talk say for the part of Bible wey they use Greek write, they no talk anything about two big wood wey they join together. Jesus die for one straight stick.

3.  Jehovah no want make we de use image or any sign for our worship.—Exodus 20:4, 5; 1 Corinthians 10:14.

▸ Chap. 5, par. 12

Jesus tell e disciples make them de remember the day wey e die. Them de do-am every year for Nisan 14, na for this same day people for Israel be de celebrate Passover. For Memorial, they go pass bread and wine for everybody. The bread mean the body of Jesus and the wine mean e blood. People wey go rule with Jesus go chop the bread and drink the wine. People wey they go stay this earth forever no de chop the bread or drink the wine. Them de come the Memorial and de behave well to show say they value wetin God and Jesus do for them.

▸ Chap. 5, par. 21

For New World Translation wey they write for English, they use the word “soul” to talk about (1) person, (2) animal, or (3) the life of person or animal. See some example:

• Person. “For the time of Noah . . . God . . . save small number of people, wey they be only eight [soul]. They no die when the rain fall.” (1 Peter 3:20) For here “soul” mean people—Noah, e wife, their three sons, and their wife.

• Animal. “God talk say: ‘Make plenty things wey get life [“soul,” footnote] full the water, and make animal wey de fly, start de fly for sky.’ And God talk say: ‘Make plenty  things wey get life [“soul,” footnote] full the earth, make different-different animal dey, the ones wey de stay with people, the ones wey de stay for bush and the ones wey de creep for ground.’ And e happen like that.”—Genesis 1:20, 24.

• The life of person or animal. Jehovah tell Moses say: “All the people wey be want kill you [“take your soul,” footnote] don die.” (Exodus 4:19) When Jesus be dey this earth, e talk say: “I be the fine shepherd, and the fine shepherd ready to die [“give e soul,” footnote] for e sheep.”—John 10:11.

  If they talk say person de do something with ‘all e soul,’ e mean say e de do-am with all e heart and with all e power. (Matthew 22:37; Deuteronomy 6:5) They fit still use the word “soul” when they want talk about something wey person or animal de like or want. When person die, they fit talk say e be dead soul.—Numbers 6:6; Proverbs 23:2; Isaiah 56:11; Haggai 2:13.

▸ Chap. 6, par. 5; Chap. 15, par. 17

The Hebrew and Greek word wey they translate as “spirit” for English New World Translation fit mean different things. Even so, e de always talk about something wey we no fit see, like breeze or air wey people and animal de breathe. E fit still mean angel or the holy spirit wey be the power of God. Bible no talk say after person die, some part for e body de go stay for another place.—Exodus 35:21; Psalm 104:29; Matthew 12:43; Luke 11:13.

▸ Chap. 6, par. 5; Chap. 15, par. 17

Gehenna na name of one place near Jerusalem wey people be de burn dirty. Bible no talk say them de suffer  or burn people and animal wey dey alive for this place. So Gehenna no mean place wey them de suffer people forever after they don die. When Jesus talk say they go troway some people for Gehenna, e de talk about people wey they go destroy and they no go ever live again.—Matthew 5:22; 10:28.

▸ Chap. 7, par. 20

Jesus talk this prayer when e de teach e disciples how they go pray. They still de call this prayer Our Father. Jesus teach us make we pray say:

• “Make your name dey holy”

  We de pray make Jehovah remove all the lie wey people de talk about e name. This one go make everybody for heaven and earth de honor and respect that name.

• “Make your Kingdom come”

  We de pray make the Kingdom of God destroy this wicked world, make e rule the earth and make-am paradise.

• “Make the thing wey you want, happen for this earth”

  We de pray make the thing wey God want happen so that perfect people wey de obey God go stay forever for Paradise, and na so Jehovah be want-am when e make people.

▸ Chap. 8, par. 2

Jehovah give us the ransom so that e go save us from sin and death. Na this ransom pay for the perfect life wey Adam lost, and e repair our friendship with Jehovah. God send Jesus come this earth so that e go die for our sin. Because Jesus die for us, all of us get chance to live forever and get perfect life.

▸ Chap. 8, par. 21; Chap. 9, par. 13

The thing wey Bible talk for Daniel chapter 4 teach us say the Kingdom of God go start de rule for 1914.

The thing wey Bible talk: Jehovah show King Nebuchadnezzar dream about one big tree wey they cut. For the dream, they tie the part of the tree wey dey ground with iron and copper. This one no go make-am grow again until after “seven times” don pass. After that time, the tree go grow again.—Daniel 4:1, 10-16.

Wetin this one mean for us? The tree de stand for the rulership of God. For plenty years, Jehovah be use kings for Jerusalem make they rule the people for Israel. (1 Chronicles 29:23) But the kings no continue to obey God, so they no fit rule again. They destroy Jerusalem for the year 607 B.C.E. Na that time the “seven times” start. (2 Kings 25:1, 8-10; Ezekiel 21:25-27) Jesus talk about this “seven times” when e say they go “suffer Jerusalem until the time wey they give the people don complete.” (Luke 21:24) So the “seven times” no end for the time of Jesus. Jehovah promise say e go choose one King when the “seven times” end. Na Jesus be this new King. As Jesus de rule, people for earth go de enjoy plenty blessing forever.—Luke 1:30-33.

How long the “seven times” go be? The “seven times” na 2,520 years. If we start de count 2,520 years from the year 607 B.C.E., we go end for the year 1914. Na that year Jehovah make Jesus, wey be Messiah, King for e Kingdom for heaven.

 How we get 2,520? Bible talk say three and a half times na 1,260 days. (Revelation 12:6, 14) So “seven times” go be times two, or 2,520 days (1260 x 2). The 2,520 days mean 2,520 years because Bible talk say “one day na one year.”—Numbers 14:34; Ezekiel 4:6.

▸ Chap. 8, par. 23

The word “archangel” mean “chief of angels.” Na only one archangel Bible talk about, and e name na Michael.—Daniel 12:1; Jude 9.

Michael na the Leader of all the good angels. Revelation 12:7 talk say: “Michael and e angel them fight with the dragon . . . and e angel them.” The book of Revelation talk say Jesus na Leader of the army of God. So, Michael na another name for Jesus.—Revelation 19:14-16.

▸ Chap. 9, par. 4

The last days na the time wey some big things go de happen before the Kingdom of God go destroy this wicked world. When Bible talk say “the end for this world don near” and when e talk about the ‘time when the Son of man go come,’ na last days e de talk about. (Matthew 24:3, 27, 37) The “last days” start for 1914 when the Kingdom of God start de rule for heaven. E go end when God go destroy this wicked world for Armageddon.—2 Timothy 3:1; 2 Peter 3:3.

▸ Chap. 9, par. 5

God go wake people wey they don die. Bible talk about nine people wey they bring back to life. Elijah, Elisha, Jesus, Peter, and Paul wake people from death. Na God give them power wey they use do this miracle. Jehovah promise say “righteous people and people wey them no dey righteous go come back to life” for earth. (Acts 24:15) Bible still talk say God go wake some people go heaven. When person wey God don choose die, God go wake the person go heaven make e rule with Jesus.—John 5:28, 29; 11:25; Philippians 3:11; Revelation 20:5, 6.

▸ Chap. 9, par. 13

Na bad thing for person to talk with demons. Some people de talk with demons or they fit go meet people like native doctor wey go help them talk with demon. People wey de do this things believe say when person die, e spirit go become ghost. Demons de fool people make they no obey God. Na demon de give people power to see sign for star, to see things wey go happen, to do magic, witchcraft and other things. Plenty book, magazine, film, poster, and song de talk things wey de make people think say to do things with demon no bad. People still de do some kind things wey concern demons when their person die. For example, them de do things like sacrifice for dead people, wake keeping, remembrance, and second burial. Sometimes, people de use drug when they want use the power of demons.—Galatians 5:20; Revelation 21:8.

▸ Chap. 10, par. 10; Chap. 16, par. 4

Jehovah na the Almighty God wey make heaven and earth. (Revelation 15:3) That na the reason why all things na e own. E get all the right to rule everything wey e make. (Psalm 24:1; Isaiah 40:21-23; Revelation 4:11) Jehovah give law wey go guide all the things wey e make. E still get right to choose people wey go rule. If we love Jehovah and we de do the things wey e talk, we de show say we support the right wey Jehovah get to rule.—1 Chronicles 29:11.

▸ Chap. 11, par. 10

To remove belle na when person kill pikin wey dey inside belle. This one no be something wey accident or sickness cause. From the day the pikin start de form inside belle, e don become person. The pikin na separate person from the mama.

▸ Chap. 13, par. 5

Blood get four main part wey they be plasma, red blood cells, white blood cells, and platelets. Doctors de collect blood or some part of blood from one person and give-am to another person. They fit even give the person blood wey they don keep. When this kind thing happen, e mean say the person don take blood.

▸ Chap. 13, par. 13

For Bible, correction no only mean punishment. To correct person mean to teach person, train-am, and help-am know the correct thing wey e go do. Jehovah no de ever correct person for wicked way. (Proverbs 4:1, 2) Jehovah de show fine example for papa and mama them. The way Jehovah de correct person fit even make the person like correction. (Proverbs 12:1) Jehovah love e people, and e de train them. E de give them advice wey go help them remove bad things for their heart. And this one go make them de think and behave for the way wey Jehovah like. When papa and mama de correct their pikin, make they help them understand why e good make them de obey. Make they teach their children to love Jehovah and e Word wey be Bible. And make they help them understand the advice wey Bible de give.

▸ Chap. 14, par. 13

Demons na wicked spirits. They get power pass people and we no fit see them. They be good angels before, but as they strong-head for God, they come change to wicked angels, and they become enemy of God. (Genesis 6:2; Jude 6) They join Satan wey de strong-head for Jehovah.—Deuteronomy 32:17; Luke 8:30; Acts 16:16; James 2:19.

▸ Chap. 16, par. 4