1. Na who go tell us the correct way to worship God?

PLENTY religion de talk say na the truth them de teach about God. But that one no fit be true. Them de teach different things about God and how to worship God. How we fit know the correct way to worship God? Na only Jehovah fit tell us.

2. How we fit know the correct way to worship God?

² Na Jehovah give us Bible. And Bible tell us the correct way to worship God. So de study Bible. Because Jehovah really love you, e go help you understand the things wey Bible talk.​—Isaiah 48:17.

3. Wetin God want make we do?

³ Some people de talk say God like all religion, but no be so Jesus talk. E talk say: “No be everybody wey e de call me, ‘Lord, Lord,’ go enter the Kingdom for heaven. Na only people wey them de do the things wey my Father for heaven want.” So we need to learn the things wey God want, and do-am. This one na serious matter. Jesus talk say people wey no de obey God just be like people wey no de follow law. E talk say they “no de do the correct things.”​—Matthew 7:21-23.

4. Wetin Jesus talk about the two road?

⁴ Jesus talk say e no go easy for us if we want do the things wey God want. E talk say: “Make wuna pass through the small gate, because people wey they go destroy de pass through the big gate and the big road, and  they really plenty; but the gate wey e de make person get life wey e no de end small and the road tight, and the people wey them de pass the road no plenty.” (Matthew 7:13, 14) The tight road, or way to worship God go make person get life wey e no go end. The big road, or wrong way to worship God, no go make person get life. But Jehovah no want make anybody die. Na e make e give us time. Everybody get chance to learn about Jehovah.​—2 Peter 3:9.

5. How we fit know the people wey them de worship God for the correct way?

⁵ Jesus talk say we fit know the people wey them de worship God for the correct way. We fit do this one if we check the things wey they believe and the things wey them de do. E talk say: “Na the kind things wey them de do, go make wuna know them.” And “good tree de bear fine fruit.” (Matthew 7:16, 17) This one no mean say the people wey them de serve God dey perfect. But they go always try make they do the correct thing. We go learn things wey e go help us know the people wey de worship God for the correct way.

6, 7. Why the correct religion must teach the things wey Bible talk? Wetin we learn from the example of Jesus?

⁶ We must worship God the way Bible talk. Bible talk say: “Na God use holy spirit direct everything wey them write inside Bible. You fit use-am teach, show mistake, correct, and show person how e go live the kind life wey God want. So that the man of God go really ready and get everything wey e need for all kind of good work.” (2 Timothy 3:16, 17) Apostle Paul tell  Christians say: “When wuna hear the word of God wey we tell wuna, wuna no talk say na our word. But wuna believe-am as e really be, say na the word of God.” (1 Thessalonians 2:13) People wey them de serve God for the correct way must follow the things wey Bible talk. They no de follow any other thing wey people believe.

⁷ All the things wey Jesus teach na from Bible. (Read John 17:17.) Many times, e quote things from Bible. (Matthew 4:4, 7, 10) People wey de serve God for the correct way de follow the example of Jesus. Everything wey them de teach na from Bible.

8. Wetin Jesus teach us about how to worship Jehovah?

⁸ We must worship only Jehovah. Psalm 83:18 talk say: “You wey your name na Jehovah, na only you big pass for the whole earth.” Jesus want make people know who the true God be, and e teach people the name of God. (Read John 17:6.) Jesus talk say: “Na Jehovah your God you must worship, and na only him you go serve.” (Matthew 4:10) So as we de serve God, we de follow the example of Jesus. Na only Jehovah we de worship, we de use e name, and we de teach other people about that name and the things wey God go do for us.

9, 10. How we de show love for each other?

⁹ We must love people from our heart. Jesus teach e disciples make they love each other. (Read John 13:35.) We love our brothers and sisters no matter the place wey they come from, their culture, or whether them dey rich or poor. Na this love de bring us together. (Colossians 3:14) So we no de fight war or kill  people. Bible talk say: “Children of God and children of Devil dey different: Anybody wey e no de do good thing and e no love e brother, no be child of God.” Then e talk say: “Make we love each other; Make we no be like Cain, wey e be child of Devil. E kill e brother.”​—1 John 3:10-12; 4:20, 21.

¹⁰ We de use our time, power and the things wey we get to help each other. (Hebrews 10:24, 25) We de “do good things for everybody.”​—Galatians 6:10.

11. Why e good make we obey Jesus?

¹¹ We must obey Jesus because e be the way to God. Bible talk say: “No other person dey wey go fit save us, because e no get any other name under heaven wey they don give among people wey go fit save us.” (Acts 4:12) For Chapter 5, we be learn say Jehovah send Jesus make e use e life as ransom for people wey de obey. (Matthew 20:28) Jehovah don choose Jesus as King and e go rule this earth. Na e make Bible talk say we must obey Jesus if we want live forever.​—Read John 3:36.

12. Why we no de join hand for politics?

¹² We no go join hand for politics. Jesus no put hand for politics. For the time wey them de judge Jesus, e tell Pilate wey be governor say: “My Kingdom no dey part of this world.” (Read John 18:36.) Like Jesus, we de support the Kingdom of God. So no matter the place wey we de stay, we no de join hand for politics. But Bible talk say make we obey “the high authority them,” and this one mean government. (Romans 13:1) We de obey the law for the country wey we de stay. But if any of the law no agree with the thing wey God talk, wetin we go do? We go follow the example of the  apostles. They talk say: “Na God we go obey as ruler, no be people.”​—Acts 5:29; Mark 12:17.

13. Wetin we de preach about the Kingdom of God?

¹³ We believe say na only the Kingdom of God go fit remove all the problem for this world. Jesus talk say they go preach the “good news about the Kingdom” for everywhere for this earth. (Read Matthew 24:14.) No government for this world go fit do the things wey the Kingdom of God go do for us. (Psalm 146:3) Jesus teach us make we pray for this Kingdom when e talk say: “Make your Kingdom come. Make the thing wey you want, happen for this earth as e dey for heaven.” (Matthew 6:10) Bible tell us say the Kingdom of God go destroy all the government for this world and na “only that kingdom go remain forever.”​—Daniel 2:44.

14. Which people you believe say them de serve God for the correct way?

¹⁴ As you don study this things, make you ask yourself say: ‘Which people de teach only the things wey Bible talk? Which people de tell other people about the name of God? Which people de love each other from their heart and believe say God send Jesus make e save us? Which people no de join hand for politics? Which people de preach say na only the Kingdom of God fit remove our problems?’ Na only Jehovah Witness.​—Isaiah 43:10-12.

15. Wetin we go do if we want make God like our worship?

¹⁵ The only thing wey we need na just to believe say God dey? No. Even the demons believe say God dey,  but they no de obey God. (James 2:19) If we want make God like our worship, we must do the things wey e talk.

16. Why e good make we comot hand from lie-lie religion?

¹⁶ If we want make God like our worship, we must comot hand from lie-lie religion. Prophet Isaiah talk say: “Comot from where e dey, make wuna dey clean.” (Isaiah 52:11; 2 Corinthians 6:17) So we suppose comot hand for anything wey e concern lie-lie religion.

17, 18. Wetin be “Babylon the Great,” and why e dey important make you comot for there quick-quick?

¹⁷ Wetin be lie-lie religion? Na any religion wey e de teach people to worship God for way wey Bible no support. Bible call all lie-lie religion “Babylon the Great.” (Revelation 17:5) Why? Plenty things wey lie-lie religion de teach start for Babylon, after the heavy rain wey e fall for the time of Noah. This lie-lie things come spread reach everywhere for the world. For example, the people for Babylon de worship gods wey they be three in one. For this our time, plenty religion de teach say God na three in one (Trinity). But Bible make-am clear say Jehovah na the only true God, and Jesus na the Son of God. (John 17:3) People for Babylon still believe say when person die, e soul or spirit de go live for another place, and e fit suffer for hellfire. But that na big lie.​—Check Endnote 14, 17, and 18.

¹⁸ Jehovah don talk say small time, e go destroy all lie-lie religion. (Revelation 18:8) You see why e dey important make you comot for lie-lie religion quick-quick? Jehovah want make you do-am now wey time still dey.​—Revelation 18:4.

19. If you choose say you go serve Jehovah, wetin e go do for you?

¹⁹ When you choose say you go leave lie-lie religion  and start to serve Jehovah, some of your friend or family member fit no understand the thing wey you de do. They fit start de cause trouble for you. But Jehovah no go leave you. You go come dey among the plenty people for the whole world wey de serve Jehovah together. You go get hope to live forever for Paradise. (Mark 10:28-30) E fit be say later, some of the people wey de cause trouble for you fit choose say they go study Bible.

20. Why e dey important make you worship God for the correct way?

²⁰ Small time, God go remove all wicked things and e Kingdom go rule this earth. (2 Peter 3:9, 13) Life go really sweet that time! Everybody go de worship Jehovah for the correct way wey e want. So e dey important make you choose say you go worship God for the correct way now.