1, 2. Why you think say prayer na special gift, and why e good make we know wetin Bible talk about prayer?

IF WE look everything wey Jehovah make, we go see say the earth really small. When Jehovah de look this earth, e de see the people for the earth like one drop of water for bucket. (Psalm 115:15; Isaiah 40:15) Even though we small, Psalm 145:18, 19 talk say: “Jehovah no dey far from all the people wey de call e name. E no dey far from all the people wey de call e name with true heart. People wey them de fear God de get wetin they want from God; God de hear as them de beg make e help them, and e go save them.” Jehovah don give us this special honor! This one show say Jehovah, the God wey make us, want make we be e friend. And e want hear our prayer. Yes, prayer na big honor, na special gift wey Jehovah don give all of us.

² But Jehovah go hear our prayer only if we pray for the way wey e want-am. How we fit do this one? Make we see wetin Bible tell us about prayer.

3. Why e good make you pray to Jehovah?

³ Make you pray or talk to Jehovah, na wetin e want be that. Why we talk so? Abeg read Philippians 4:6, 7. Think about this invitation. The God wey de rule  heaven and earth really love you and e want make you tell-am all your problem and how you de feel.

4. If you de pray everytime, how e fit make you and Jehovah be tight friend?

⁴ Prayer de make we and Jehovah be tight friend. When two friends de talk all the time about how them de feel, their problem, and other things, their friendship go de tight more-more. Na so e still be with our prayer. Jehovah don tell us for Bible how e de feel and wetin e de think about you. E don still tell you the things wey e go do for future. You fit tell Jehovah the thing wey e de worry you if you de pray all the time. As you de do like this, you and Jehovah go be tight friend.​—James 4:8.

5. How we know say Jehovah no de answer all prayer?

⁵ Jehovah de answer all prayer? No! For the time of prophet Isaiah, Jehovah tell people for Israel say:  “Even if wuna de make plenty prayers, I no go listen; because wuna hand full with blood.” (Isaiah 1:15) So if we no dey careful, we fit do things wey go make us comot for Jehovah side and e no go answer our prayer.

6. Why faith dey important? How you fit show say you get faith?

⁶ We must get faith, if we want make Jehovah answer our prayer. (Mark 11:24) Apostle Paul talk say: “If faith no dey, e no dey possible to serve God well, because anybody wey e want near God must believe say e de exist and na e de reward the people wey them de use all their heart look for God.” (Hebrews 11:6) Make we no just de talk say we get faith, but make we show say we get faith as we de obey Jehovah.​—Read James 2:26.

7. (a) Why e good make we dey humble and de talk with respect when we de pray? (b) How we fit show say we de talk from our heart when we de pray?

⁷ When we de pray to Jehovah, make we dey humble and make we talk with respect. Why? If we want talk with king or president, we go do-am with respect. When we de pray, make we dey more humble and show Jehovah plenty respect, because na e be the Almighty God. (Genesis 17:1; Psalm 138:6) Make we talk from our heart, and make we tell Jehovah all the things wey de worry us. E no good make we de talk the same word everytime.​—Matthew 6:7, 8.

8. Wetin we go do if we pray about something?

⁸ Another thing be say, make we do everything wey we fit do so that Jehovah go answer our prayer. For example, if we pray make Jehovah give us wetin we need, make we no lazy. We no fit expect say Jehovah  go give us something when we no work for-am. We go work hard and do any work wey we fit do. (Matthew 6:11; 2 Thessalonians 3:10) Or if we pray make Jehovah help us stop bad habit, make we no do anything wey fit put us for temptation. (Colossians 3:5) Make we see some question wey plenty people de ask about prayer.

9. Who we go pray to? Wetin John 14:6 teach us about prayer?

⁹ Who we go pray to? Jesus teach e disciples make they pray to “our Father for heaven.” (Matthew 6:9) E still talk say: “I be the road, the truth, and the life. Nobody fit come meet the Father if e no pass through me.” (John 14:6) Na only Jehovah we go pray to, and we go pray through Jesus. Wetin e mean to pray through Jesus? If we want make Jehovah answer our prayer, we go show respect for the special work wey Jehovah give Jesus. We don learn say Jesus come this earth make e free us from sin and death. (John 3:16; Romans 5:12) Jehovah still make Jesus High Priest and Judge.​—John 5:22; Hebrews 6:20.

10. When we de pray, we need to dey for any special way? Explain.

¹⁰ When we de pray, we need to dey for any special way? No, Jehovah no talk say make we kneel down, sit-down, or stand up when we de pray. Bible teach us say we fit pray for any position wey e go show respect. (1 Chronicles 17:16; Nehemiah 8:6; Daniel 6:10; Mark 11:25) The thing wey dey important to Jehovah no be the position wey we dey, but make we dey humble and pray with respect from our heart. We fit talk loud or we fit pray inside our heart. We fit pray  anytime, even for night. When we de pray, make we get-am for mind say Jehovah de hear us even if other people no hear us.​—Nehemiah 2:1-6.

11. Wetin be some of the things wey we fit tell Jehovah?

¹¹ Wetin we fit pray about? We fit pray about anything wey Jehovah like. Bible talk say: “Anything wey we beg God, and the thing na wetin e want, e go answer.” (1 John 5:14) We fit pray about things wey they concern us? Yes. When we de pray, make e be like when we de talk with our tight friend. We fit tell Jehovah anything wey dey our mind and heart. (Psalm 62:8) We fit pray make Jehovah give us holy spirit so that we go do the correct thing. (Luke 11:13) We fit beg Jehovah make e give us sense to choose well, and power to face problem. (James 1:5) Make we beg Jehovah make e forgive our sin. (Ephesians 1:3, 7) E good make we pray for other people like our family members, and our brothers and sisters for congregation.​—Acts 12:5; Colossians 4:12.

12. Which things go dey important pass for our prayer?

¹² Which things go dey important pass for our prayer? Na Jehovah and the things wey e want. We go thank Jehovah with all our heart for everything wey e don do for us. (1 Chronicles 29:10-13) We know this one because, when Jesus dey this earth, e teach e disciples how they go pray. (Read Matthew 6:9-13.) E talk say make they first pray make the name of God dey holy, make the Kingdom of God come, and make the thing wey Jehovah want happen for this earth. After Jesus don teach them this things wey e dey important pass, e come talk say make they tell Jehovah  wetin they need. When we first pray about Jehovah and the thing wey e want before other things, e go show wetin really dey important pass for us.

13. How long our prayer go be?

¹³ How long our prayer go be? Bible no talk about-am. Different condition fit make our prayer long or short. For example, we fit pray for short time before we chop, but e fit long when we want praise Jehovah  or talk the things wey e de worry us. (1 Samuel 1:12, 15) For the time of Jesus, some people de talk long prayer make other people praise them. Make we no do like that. (Luke 20:46, 47) Jehovah no like that kind prayer. Wetin e like pass na prayer wey come from our heart.

14. How many times we go de pray, and wetin this one teach us about Jehovah?

¹⁴ How many times we go de pray? Jehovah want make we de pray all the time. Bible talk say make we “continue de pray,” make we “no tire to de pray,” and make we “de pray every time.” (Matthew 26:41; Romans 12:12; 1 Thessalonians 5:17) Jehovah always dey ready to hear our prayer. We fit thank Jehovah  every day for the love and the things wey e de give us. We fit beg Jehovah make e guide us, give us power and comfort us. If we really see prayer as special gift wey God give us, we go pray any time.

15. Why we go talk “amen” for the end of prayer?

¹⁵ Why we go talk “amen” for the end of prayer? “Amen” mean “I agree” or “make e be so.” Na the way we fit show say we mean the thing wey we talk for our prayer. E still mean say e come from our heart. (Psalm 41:13) When we gather together and one person de pray, Bible teach us say e good if we say “amen” when the prayer end. We fit talk-am inside our heart or we fit talk-am loud. E go show say we agree with the prayer.​—1 Chronicles 16:36; 1 Corinthians 14:16.

16. Jehovah de really answer prayer? Explain.

¹⁶ You think say Jehovah de really answer prayer? Yes. Bible call Jehovah the person wey e “de hear prayer.” (Psalm 65:2) Plenty-plenty people de pray with all their heart, and Jehovah de hear and answer them for different way.

17. How Jehovah de use angels and e servants for this earth answer our prayer?

¹⁷ Jehovah de use angels and e servants for this earth answer our prayer. (Hebrews 1:13, 14) Some people don pray say they want understand Bible and e no take time, one Jehovah Witness come help them. This one show say angels de help us as we de preach the “good news.” (Read Revelation 14:6.) Many of us don pray make Jehovah help us and  one brother or sister come help us.​—Proverbs 12:25; James 2:16.

18. Na how Jehovah de use e holy spirit and Bible answer our prayer?

¹⁸ Jehovah de use e holy spirit answer our prayer. When we get problem, make we beg Jehovah for help. Jehovah fit give us e spirit, wey go guide us and give us power to bear the problem. (2 Corinthians 4:7) Jehovah still de use Bible answer our prayer and help us choose well. If we de study Bible, we fit see some verse wey go help us. For meeting, Jehovah fit do-am make person talk something wey e go help us. And e fit still use elder for congregation show us something for Bible wey we really need.​—Galatians 6:1.

19. Why e fit be like say Jehovah never answer our prayer?

¹⁹ But sometimes we fit de wonder say, ‘Why Jehovah never answer my prayer?’ Remember say e know the correct way and the correct time to answer our prayer. And e know the thing wey we really need. We fit continue de pray for some time to show say we really dey serious for the thing wey we ask, and say we get faith for Jehovah. (Luke 11:5-10) Sometimes, Jehovah fit answer our prayer for way wey we no expect. For example we fit de pray about serious problem wey de worry us. Instead make Jehovah remove-am, e fit give us power to endure-am.​—Read Philippians 4:13.

20. Why e good make we de pray to Jehovah everytime?

²⁰ Prayer na really special gift from Jehovah! And we fit dey sure say e go hear us. (Psalm 145:18) As we de pray everytime from our heart, na so our friendship with Jehovah go de tight more-more.