1. Wetin God want for us?

GOD want good things for us. When e make the first man and woman, Adam and Eve, e put them for one fine garden. E be want make they born children, take care of all the animals and make this earth be paradise.​—Genesis 1:28; 2:8, 9, 15; check Endnote 6.

2. (a) How we know say God go do the thing wey e want? (b) Which kind people God want make they stay for this earth, and for how long?

² You think say we go ever stay for paradise? Jehovah tell us say: “Na the thing wey I want do, and I go do-am.” (Isaiah 46:9-11; 55:11) Yes, nothing fit stop Jehovah. E go do the thing wey e want. Jehovah say e get reason why e make this earth. E “no just make-am for nothing.” (Isaiah 45:18) E want make people de stay everywhere for this earth. Which kind people God want make they stay for this earth, and for how long? Bible talk say: “Na righteous people [or, people wey they obey God] go stay for this earth, and they go stay inside forever.”​—Psalm 37:29; Revelation 21:3, 4.

3. As people de sick and de die, which question you fit de ask?

³ But people de sick and de die. For different-different place, people de fight and kill each other. No be so God be want-am. So why e dey like that, and wetin cause-am? Na only Bible fit tell us.

4, 5. (a) Who use snake talk with Eve for the garden of Eden? (b) How good man fit become thief?

⁴ Bible talk say God get one enemy wey them de call “Devil and Satan.” For the garden for Eden, Satan use snake talk with Eve. (Revelation 12:9; Genesis 3:1) E do-am like say na the snake really de talk.​—Check Endnote 7.

⁵ Na God make Satan the Devil? No! Na one angel for heaven change come be Devil. This angel see when God de make the earth for Adam and Eve. (Job 38:4, 7) How e come be Devil? Okay, how good man fit change, come be thief? The time wey e be small pikin, e no be thief. But as e de grow, e start de get long-throat for things wey another person get. E continue de think about-am, sotey, the long-throat come strong. When e get small chance, e thief the thing. Na that time e come be thief.​—Read James 1:13-15; check Endnote 8.

6. How one angel come be enemy of God?

⁶ Na this thing happen to that angel. After Jehovah make Adam and Eve, e tell them say make they born children and make they “full this earth.” (Genesis 1:27, 28) Maybe that angel de think say, ‘All this people for de worship me instead of Jehovah!’ As e de think-am, na so e de get more long-throat for worship wey them de give Jehovah. But na only God people suppose de worship. So that angel talk lie, and e deceive Eve. (Read Genesis 3:1-5.) Because of this thing wey e do, they start de call this angel Satan the Devil, the enemy of God.

7. (a) Why Adam and Eve die? (b) Why we de old and de die?

 ⁷ Adam and Eve chop the fruit. They no do as God be tell them. (Genesis 2:17; 3:6) This thing wey they do na sin, and they die as Jehovah talk. (Genesis 3:17-19) The children wey Adam and Eve born de die because they get sin for body. (Read Romans 5:12.) See this example, e go help us understand why all the children of Adam and Eve get sin. Think-am say you de make bread for pan wey e get mark. The bread too go get mark like the pan. Na so e be when Adam do the thing wey God say make e no do. E come get sin for body. Since we be children of Adam, we get sin for body or that same “mark” wey Adam be get. Na this one make all of us de old and de die.​—Romans 3:23; check Endnote 9.

8, 9. (a) Wetin Satan want make Adam and Eve believe? (b) Why Jehovah no kill all of them that time?

⁸ When Satan deceive Adam and Eve, e start de make people do the thing wey Jehovah no like. E want make they believe say Jehovah de lie, say Jehovah no want good things for them, and say Jehovah na bad king. Satan de talk say people no need God to direct them. E want make Adam and Eve decide good and bad thing by theirself. Wetin Jehovah go do? E fit just kill all of them, make everything end for there. But you think say that one for show say na lie Satan de talk? No.

⁹ Jehovah no kill them that time. But e give people time make they rule theirself. This one go show-am clear say Satan de lie and say na Jehovah know the thing wey e really good for people. For Chapter 11,  we go learn more about this matter. Wetin you think about this thing wey Adam and Eve do? E good as they believe Satan and do the thing wey God say make they no do? Na Jehovah give Adam and Eve everything wey they get. Their life dey perfect, them de live for fine place, and they get work wey them de  enjoy. But Satan never ever do any good thing for them. If na you, wetin you for do?

10. Wetin all of us need to choose?

¹⁰ We too get decision wey we go make, and anything wey we choose fit affect our life. We fit choose say we go obey Jehovah as our King and show say Satan de lie. Or we fit choose Satan as our ruler. (Psalm 73:28; read Proverbs 27:11.) Plenty people for this world no de obey God. The truth be say, no be God de rule this world. So if no be God, then na who?

11, 12. (a) Wetin we learn from the thing wey Satan be want give Jesus? (b) Which place for Bible show say na Satan de rule this world?

¹¹ Jesus know who de really rule this world. E get one time wey Satan show Jesus “all the kingdom for this world and how they fine reach.” Satan come promise Jesus say: “I go give you all this things if you just bow down and worship me.” (Matthew 4:8, 9; Luke 4:5, 6) Ask yourself say, ‘Satan for talk say e go give Jesus all the kingdom, if they no be e own?’ No. So, na Satan get all the government for this world.

¹² You fit de think-am say: ‘How Satan come be the ruler for this world? No be Jehovah the Almighty God, make heaven and earth?’ (Revelation 4:11) Yes, na God, but Jesus talk-am clear say Satan na “the person wey e de control this world.” (John 12:31; 14:30; 16:11) Apostle Paul talk say Satan the Devil na “the god of this world.” (2 Corinthians 4:3, 4) And apostle John talk say “na the wicked person de control the whole world.”​—1 John 5:19.

13. Why we need new world?

¹³ Bad things just de plenty for this world everyday. People de fight war, them de pretend, they do partial, and other bad things full everywhere. No matter how people try reach, they no fit solve all this problem. But small time, God go destroy this world for the war of Armageddon. For the new world wey e go bring, people go love and trust each other.​—Revelation 16:14-16; check Endnote 10.

14. Which person Jehovah choose as King for e Kingdom? Wetin Bible be don talk about Jesus?

¹⁴ Jehovah get Kingdom or government for heaven, and e don choose Jesus Christ as King. For plenty-plenty years wey e don pass, Bible talk-am say Jesus go rule as “Prince of Peace” and e Kingdom no go ever end. (Isaiah 9:6, 7) Jesus tell e disciples make they pray for this Kingdom. E tell them make they pray say: “Make your Kingdom come. Make the thing wey you want, happen for this earth as e dey for heaven.” (Matthew 6:10) For Chapter 8, we go learn how the Kingdom of God go remove all the kingdom for this world. (Read Daniel 2:44.) This Kingdom go change this earth to paradise.​—Check Endnote 11.

15. Wetin be the “new earth”?

¹⁵ Bible promise us say: “We de wait for new heaven and new earth,” and “na for there righteous things go dey.” (2 Peter 3:13; Isaiah 65:17) Sometimes when Bible de talk about “the earth,” e de talk about the  people for inside. (Genesis 11:1) So this “new earth” na all the people wey they obey God and wey God don bless.

16. Which correct gift God go give people for the new world, and wetin we go do if we want get this gift?

¹⁶ Jesus don promise say people for the new world go get “life wey e no go end.” (Mark 10:30) Wetin we go do if we want get this gift? If you want know the answer, abeg read John 3:16 and 17:3. Make we see wetin Bible talk about how life go be for Paradise.

17, 18. How we know say peace go dey for everywhere for this earth and say we no go de fear again?

¹⁷ Wickedness, war, fight, and other bad things no go dey again. No wicked person go dey for this earth again. (Psalm 37:10, 11) God go “end all war for the whole earth.” (Psalm 46:9; Isaiah 2:4) Na people wey they love and de obey God go full this earth. Peace go dey forever.​—Psalm 72:7.

¹⁸ People wey them de serve Jehovah no go de fear. For Bible, anytime wey the Israelites obey God, e de protect them. (Leviticus 25:18, 19) For Paradise, we no go fear anything or anybody. Fear no go dey again!​—Read Isaiah 32:18; Micah 4:4.

19. Why we dey sure say food go plenty for Paradise?

¹⁹ Food go plenty. “Food go plenty for everywhere for the earth, e go plenty sotey e go de troway for ontop mountain.” (Psalm 72:16) Jehovah, “our God go bless us,” and the “earth go produce well.”​—Psalm 67:6.

20. How we know say this earth go be paradise?

²⁰ The whole earth go be paradise. People go get fine-fine house and garden. (Read Isaiah 65:21-24;  Revelation 11:18.) The whole earth go fine like the garden of Eden. Jehovah go de give us everything wey we need. Bible talk about Jehovah say: “You open your hand, and everything wey e get life, you de give them wetin they want.”​—Psalm 145:16.

21. How we know say people and animal go live as one?

²¹ People and animal go de live as one. Animals no go de cause problem for people again. Even small children no go de fear the animals wey we de fear now.​—Read Isaiah 11:6-9; 65:25.

22. Wetin Jesus go do for sick people?

²² Nobody go sick again. When Jesus be dey for this earth, e heal many people. (Matthew 9:35; Mark 1:40-42; John 5:5-9) But as King for the Kingdom of God, e go heal everybody. Person no go ever talk say: “I de sick.”​—Isaiah 33:24; 35:5, 6.

23. Wetin God go do for dead people?

²³ Dead people go live again. God promise say e go wake plenty people wey they don die. “Righteous people and people wey them no dey righteous go come back to life.”​—Read John 5:28, 29; Acts 24:15.

24. How you de feel when you think about life for Paradise?

²⁴ Na we go choose the thing wey we want. We fit choose say we go study Bible and serve Jehovah, or we fit just do anything wey we like. If we choose say we go serve Jehovah, we go get correct life for future. One man beg Jesus for help before e die. Jesus promise the man say: “You go dey with me for Paradise.” (Luke 23:43) Make we learn more about Jesus Christ and how e go do the fine-fine things wey God don promise us.