1. Wetin you fit de think as you don de study this book?

AS YOU de study this book, you don learn many things from Bible. Things like, the promise say we go live forever, the things wey Bible talk about dead people, and the hope say they go live again. (Ecclesiastes 9:5; Luke 23:43; John 5:28, 29; Revelation 21:3, 4) Maybe you don start de go meeting with Jehovah Witness, and you believe say them de worship God for the correct way. (John 13:35) Maybe you don start de get tight friendship with Jehovah, and you fit  don choose say na Jehovah you go serve. So you fit de think say, ‘If I really want serve God, wetin I go do?’

2. Why one Ethiopia man want baptize?

² For the time of the apostles, na so one man from Ethiopia be de think. Some time after Jesus resurrect, one of e disciples wey e name na Philip preach to this Ethiopia man. Philip help the man know say na Jesus be the Messiah. Wetin this man learn really touch e heart, and quick-quick e talk say: “See water! Wetin de hold me make I no baptize?”​—Acts 8:26-36.

3. (a) Which command Jesus give e disciples? (b) Wetin be the correct way to baptize person?

³ Bible talk say if you want serve God, you must baptize. Jesus tell e disciples say: ‘Make wuna go make disciples of people for the whole world, and make wuna baptize them.’ (Matthew 28:19) Jesus show us good example as e baptize. They no just pour water for e head, but na all e body they dip inside water. (Matthew 3:16) For this our time, if any Christian want baptize, they must dip all e body inside water.

4. Wetin your baptism de show people?

⁴ When you baptize, you de show people say you really want make God be your friend and say you really want serve God. (Psalm 40:7, 8) So you fit de think say, ‘Wetin I need to do if I want baptize?’

5. (a) Wetin you go first do before you baptize? (b) Why e good make you de go meeting with Jehovah Witness?

⁵ Before you fit baptize, you need to know who Jehovah and Jesus really be. You don already start de learn about God as you de study Bible. (Read John  17:3.) But that one no be all wey you need. Bible talk say you must “know the correct truth well” about wetin Jehovah want. (Colossians 1:9) The thing wey you go learn for the meeting wey Jehovah Witness de get go help you be tight friend with Jehovah. This na one reason why e good make you always de go their meeting.​—Hebrews 10:24, 25.

6. Why you no need to know everything for Bible before you baptize?

⁶ True, Jehovah no de expect say before you baptize, you must know everything for Bible. E be no expect the Ethiopia man make e know everything before e baptize. (Acts 8:30, 31) We go continue de learn about God forever. (Ecclesiastes 3:11) But before you baptize, you need to know and believe the main things wey Bible de teach.​—Hebrews 5:12.

7. As you de study Bible, how that one don help you?

⁷ Bible talk say: “If faith no dey, e no dey possible to serve God well.” (Hebrews 11:6) So you need faith before you fit baptize. Bible tell us something wey e happen for the time of the apostles. E talk say when some people for Corinth hear wetin the disciples of Jesus de teach, they “start to believe and baptize.” (Acts 18:8) Na so e be with you, as you de study Bible, e don help you get faith for the things wey God promise, and for the sacrifice of Jesus, wey e fit save us from sin and death.​—Joshua 23:14; Acts 4:12; 2 Timothy 3:16, 17.

8. Wetin go move you to tell other people the things wey you de learn?

⁸ As you de learn more from Bible, and de see how  e de help you, na so your faith go de strong. You go want tell other people about the things wey you de learn. (Jeremiah 20:9; 2 Corinthians 4:13) But which people you go tell?

9, 10. (a) Which people you fit start de tell the things wey you don learn? (b) Wetin you go do if you want preach with the congregation?

⁹ Maybe you want tell your family, your friends, your neighbors, or people for your workplace the things wey you de learn. E good, but make you de do-am with love and respect. After some time, you go fit de preach with the congregation. When you feel say you don ready, tell the Jehovah Witness wey de teach you Bible say you go like join the congregation de preach. If the person feel say you don ready, and if you de live your life as God want-am, you and the person go meet two elders for the congregation.

¹⁰ Wetin go happen when wuna meet the elders? The elders go talk with you. They go check if you understand and believe the main things for Bible, if you de live your life as Bible talk, and if you really want be Jehovah Witness. Remember say the elders de care for you and all the people for congregation, so make you no fear to talk with them. (Acts 20:28; 1 Peter 5:2, 3) After wuna don meet the elders, they go tell you if you fit start de preach with the congregation.

11. Why e dey important make you change some things before you fit start de preach with the congregation?

¹¹ The elders fit tell you say you need to change some things for your life before you fit start de preach with the congregation. Why e good make you change  those things? Because when we de preach, we de tell people about Jehovah, so the way we de live our life must honor Jehovah.​—1 Corinthians 6:9, 10; Galatians 5:19-21.

12. Why all of us need to repent?

¹² Another thing dey wey you must do before you fit baptize. Apostle Peter talk say: “Make wuna repent and turn back so that they go wipe all wuna sin.” (Acts 3:19) Wetin e mean to repent? E mean say you go feel sorry for the bad things wey you don do. For example, if you be de join for sex wey Jehovah no like, then you go need to repent. And even if for all your life, you don try your best to de do the correct thing, you still need to repent, because all of us de sin and we need to beg God make e forgive us.​—Romans 3:23; 5:12.

13. Wetin e mean to “turn back”?

¹³ The only thing wey you need na to feel sorry for the bad things wey you don do? No. Apostle Peter talk say you need to “turn back.” This one mean say you go stop any bad thing wey you de do before and start de do the correct things. For example, think-am say you de travel go one place wey you never go before. After some time, you see say na wrong road you de pass. Wetin you go do? You go slow down, stop, turn back, and follow the correct road. Na so e still be, as you de study Bible, you fit start de see say you get some character or some bad things wey you de do. You need to change all those things. Dey ready to change and start de do the correct things.

14. Wetin you go do if you want give Jehovah your life?

¹⁴ Another important thing wey you go do before you baptize na to promise say you go serve Jehovah. When you want give Jehovah your life, you go promise Jehovah for prayer say na the thing wey e want go dey important pass for your life and say e be the only God wey you go serve.​—Deuteronomy 6:15.

15, 16. Wetin go move person make e promise to serve Jehovah?

¹⁵ When you promise to serve Jehovah, e just be like when you promise say you no go ever leave the person wey you love. Think-am say one man and one woman de try know each other before they marry. As the man de learn about the woman, e go start de love the woman and e go want make they marry. Even as this na serious matter, the man dey ready to do-am because e love the woman.

¹⁶ As you de learn Bible, your love for Jehovah go de grow more-more, and you go want do your best to serve Jehovah. E go make you promise Jehovah say you go serve-am. Bible talk say if anybody want follow Jesus, the person must “disown e self.” (Mark 8:34) Wetin this one mean? E mean say to obey Jehovah go be the first thing for our life. Na the things wey Jehovah want go dey important pass the things wey you want.​—Read 1 Peter 4:2.

17. Why some people no want promise to serve Jehovah?

¹⁷ Some people no want promise to serve Jehovah because them de fear say they no go fit do the thing wey they promise. They no want make Jehovah feel  bad. They fit even de think say if they no promise to serve Jehovah, e no go judge them for anything wey they do.

18. Wetin go help you no fear say you no go fit do wetin you promise Jehovah?

¹⁸ If you love Jehovah, you no go de fear say you no go fit do the thing wey you promise. Your love for Jehovah go make you do your best to do everything wey you don promise-am. (Ecclesiastes 5:4; Colossians 1:10) You no go think say e too hard to do the things wey Jehovah want. Apostle John talk say: “If we want show say we love God, we go follow all e law; and the laws no hard.”​—1 John 5:3.

19. Why you no need to fear as you want give Jehovah your life?

¹⁹ Even though say you de sin, you fit still give Jehovah your life. Jehovah no de expect make we do the thing wey e pass our power. (Psalm 103:14) E go help you so that you go fit de do the correct thing. (Isaiah 41:10) Trust Jehovah with all your heart, and “e go make your road dey straight.”​—Proverbs 3:5, 6.

20. After you don promise Jehovah for prayer, wetin be the next thing?

²⁰ You think say you don ready to give Jehovah your life? After you don promise Jehovah for prayer, then you go baptize.

21, 22. How you go show everybody say you don give Jehovah your life?

²¹ Tell the coordinator for the body of elders for your congregation say you don promise to serve Jehovah and you want baptize. E go tell some elders  make they talk with you about some main things from Bible wey you don learn. If the elders agree say you don ready, they go tell you say you fit baptize for the next assembly or convention. For there, you go hear one talk about wetin e mean to baptize. The person wey go give the talk go ask the people wey want baptize two questions. As you answer  that question, you de show everybody say you don give Jehovah your life.​—Romans 10:10.

²² After this one, you go baptize. They go dip you inside water. Na this one go show everybody say you don give Jehovah your life and you don be Jehovah Witness.

23. Wetin e mean to baptize “in the name of the Father, the Son, and the holy spirit”?

²³ Jesus talk say e disciples go baptize “in the name of the Father, the Son, and the holy spirit.” (Read Matthew 28:19.) Wetin that one mean? E mean say you know the high position wey Jehovah get and the work wey Jesus de do, so that wetin Jehovah want go happen. E still mean say you know how Jehovah de use e holy spirit do the things wey e want.​—Psalm 83:18; Matthew 28:18; Galatians 5:22, 23; 2 Peter 1:21.

24, 25. (a) Wetin baptism mean? (b) Wetin we go learn for the last chapter?

²⁴ Baptism de show something wey e really dey important. When they dip you inside the water, e mean say you don troway the old life wey you de live, and all the things wey you de do before. When you come out from the water, e mean say you don start new life, and from that time, you go de serve Jehovah and de do the things wey e want. Remember say na Jehovah you give your life, no be any work, person, or organization.

²⁵ As you give Jehovah your life, e go be your tight friend. (Psalm 25:14) But this one no mean say God go save anybody just because e baptize. Apostle Paul talk say: “Make wuna continue to de fear God and de do things wey go save wuna.” (Philippians 2:12) Baptism na just the beginning. But how you fit remain near Jehovah? The last chapter for this book go answer that question.