1, 2. Why Bible na fine gift wey God give us?

HOW you de feel when your friend surprise you with gift? You go like to open-am quick-quick, and you go dey happy say your friend de think about you. You go really thank your friend.

² Bible na gift from God. E de teach us things wey we no fit learn from any other book. For example, Bible tell us say God make heaven and earth. E still make the first man and woman. Bible de give us advice. This advice de help us anytime wey we get problem. For Bible, we learn how God go make the earth fine just as e be want-am. Bible na really fine gift!

3. Wetin you go learn as you de study Bible?

³ As you de study Bible, you go see say you fit be friend of God. Na so God even want-am. And as you de learn, na so your friendship with God go de tight.

4. Wetin de surprise you about the Bible?

⁴ They don translate Bible for more than 3,000 language, and they don print plenty-plenty copy. Plenty people for the world fit read Bible for their own language. Every week, more than one million people de collect Bible! Na true, no other book dey like Bible.

5. Why we fit talk say Bible na the word of God?

 ⁵ Na “God use holy spirit direct everything wey them write inside Bible.” (Read 2 Timothy 3:16.) But some people fit think say, ‘Since na people write Bible, how e fit be book from God?’ Bible talk say: Na “God de use holy spirit tell them wetin they go talk.” (2 Peter 1:21) E just dey like when one mama tell e pikin make e write letter and e tell the pikin the things wey e go write. Na who get the letter? Na the mama, no be the pikin. Na so Bible be too. Na God get-am even though say e use people write-am. God direct them when them de write-am. So,  Bible na really “the word of God.”​—1 Thessalonians 2:13; check Endnote 2.

6, 7. Why we fit talk say all the books for Bible de agree?

⁶ E pass 1,600 years before they write Bible finish. The people wey write-am live for different-different time. Some of them go school, and some no go. For example, one na doctor. Other ones na farmer, fisherman, shepherd, prophet, judge, and king. Even though say na plenty people write-am, all the books for Bible de agree. Bible no de talk one thing for one chapter and talk different thing for another chapter. *

⁷ The first chapters for Bible talk how the problems for this world start. The last chapters de tell us how God go solve the problems and make this earth paradise. Bible talk about the life wey people de live since the time wey God make man. And e teach us say wetin God want go always happen.

8. Give example wey show say Bible dey correct when e de talk about science.

⁸ They no write Bible to use-am teach science, and no be textbook. But wetin Bible talk about science de always dey correct. Na so book from God suppose be. For example, for the book of Leviticus, we see the advice wey God give the Israelites, make sickness no spread. The time wey they write-am, people never know the things wey de cause sickness. Bible  still talk true say the earth no dey ontop anything. (Job 26:7) Before, plenty people think say the earth dey flat, but Bible talk say the earth dey round.​—Isaiah 40:22.

9. As people wey them write Bible talk true, wetin that one teach us?

⁹ When Bible talk about history, e de always correct. Many history book no de talk everything correct because when the people de write-am, they fit hide some things. For example, if they win their country for war, they no de write about-am. But people wey them write Bible talk true even when they win Israel for war. They still write their own mistakes. For example, inside the book of Numbers, Moses write the big mistake wey e make and the punishment wey God give-am. (Numbers 20:2-12) As the people wey they write Bible talk true, e show say Bible come from God. So we fit trust Bible.

10. Why the advice for Bible de help us for this our time?

¹⁰ ‘Na God use holy spirit direct everything wey them write inside Bible. You fit use-am teach, show mistake, and correct something.’ (2 Timothy 3:16) Na true, advice for Bible de help us for this our time. Jehovah know how e make us, so e understand how we de feel and how we de think. E know us pass as we know ourself. And e want make we dey happy. God know the things wey e good for us and things wey e no good.

11, 12. (a) Which good advice Jesus give us for Matthew chapter 5 go reach 7? (b) Which other things we fit learn from Bible?

¹¹ For Matthew chapter 5 go reach 7, Jesus give  us good advice. This advice go make us happy. E go help us live fine with people, know how to pray, and correct the way we de see money. E don reach 2,000 years wey Jesus give this advice, but e still de help us now.

¹² For Bible, Jehovah still teach us how our family go dey happy, how we go de do our work well, and how we fit live fine with people. No matter who we be, where we come from, or the problem wey we get, the advice for Bible fit help us.​—Read Isaiah 48:17; check Endnote 3.

13. Wetin Isaiah talk say go happen for Babylon?

¹³ Plenty things wey Bible talk don happen. For example, Isaiah be talk say they go destroy Babylon. (Isaiah 13:19) E explain how this one go happen. The city get big gates and river wey be de protect-am. But Isaiah talk say they go make the water dry and the gates go dey open. When the people go attack the city, they go win-am and they no go even fight. Isaiah even talk who go win Babylon. E talk say the man name na Cyrus.​—Read Isaiah 44:27–45:2; check Endnote 4.

14, 15. How the thing wey Isaiah be talk happen?

¹⁴ Two hundred years after Isaiah write this things, plenty soldiers come attack Babylon. You know who be their leader? Just as Isaiah don talk, na Cyrus, the king for Persia. Time don reach for the thing wey Bible talk to happen.

¹⁵ For the night wey the soldiers attack Babylon,  the people de do party. Them de feel say nothing fit happen because big fence and water de protect them. Cyrus and the soldiers dig one place for outside the city so that the water go come down. The water come down sotey the soldiers fit waka pass-am. But how they go fit pass the big fence? Just as  Isaiah talk-am before, they no close the gates. So the soldiers win the city and they no even fight.

16. (a) How Isaiah talk say Babylon go be after them don destroy-am? (b) Wetin show say the thing wey Isaiah talk really happen?

¹⁶ Isaiah still talk say time de come when person no go stay for Babylon again. E talk say: “Nobody go ever live for there and nobody go ever stay there again.” (Isaiah 13:20) Na so e happen? Yes. If you go where Babylon be dey, about 50 miles for south of Baghdad, Iraq, you go see as the place scatter. Till today, nobody de stay there. Jehovah destroy Babylon finish.​—Isaiah 14:22, 23. *

17. Why we fit trust all the promise wey God don make?

¹⁷ As plenty things wey Bible talk don happen, e mean say we fit trust the things wey e talk about the future. We dey sure say Jehovah go make the earth  paradise just as e don promise-am. (Read Numbers 23:19.) Yes, we get “hope for life wey e no go end, wey God wey e no fit lie, don promise for long time.”​—Titus 1:2. *

18. Wetin Paul talk about “the word of God”?

¹⁸ We don learn say no other book dey like Bible. All the part for Bible de agree. And Bible de always talk correct things when e de talk about science and history. Bible de give us better advice. And many things wey e talk don happen. But e still get other things wey Bible fit do. Apostle Paul talk say: “The word of God dey alive and e get power.” Wetin this one mean?​—Read Hebrews 4:12.

19, 20. (a) How Bible fit help you know the kind person wey you be? (b) How you go show say you like this book wey God give us?

¹⁹ Bible fit change your life. E fit help you know the kind person wey you really be. E fit help you check how you de feel and the things wey you de think. For example, we fit de think say we love God. But if we want show say we really love God, we must do wetin Bible talk.

²⁰ Bible na book wey God give us. E want make you de read-am, study-am, and make you love-am. De thank God for this fine book, and continue de study-am. That one go help you understand wetin God want for us. For the next chapter, we go learn more about wetin God want for us.