1. Na which prayer we go talk about?

PLENTY people know the prayer wey them de call-am Our Father, or the Lord’s Prayer. Jesus be use this prayer teach e disciples how they go pray. Wetin e pray about? And why this prayer dey important for this our time?

2. Which three important things Jesus teach us to pray about?

² Jesus talk say: “Make wuna de pray like this: ‘Our Father for heaven, make your name dey holy. Make your Kingdom come. Make the thing wey you want, happen for this earth as e dey for heaven.’” (Read Matthew 6:9-13.) Why Jesus teach us make we pray about this three things?​—Check Endnote 20.

3. Wetin we go learn about the Kingdom of God?

³ We don learn say the name of God na Jehovah. And we don talk about the thing wey God want for people and for this earth. But wetin Jesus mean when e talk say: “Make your Kingdom come”? For this chapter, we go learn wetin be the Kingdom of God, wetin the Kingdom go do, and how e go make the name of God dey holy.

4. Wetin be the Kingdom of God, and who be the King?

⁴ Jehovah don form one government for heaven, and e choose Jesus make e be the King. Bible call this  government the Kingdom of God. Na Jesus be “the King of people wey de rule as king and the Lord of people wey de rule as lord.” (1 Timothy 6:15) Jesus fit do good pass any other ruler. And if they join the power of all the rulers for this world, e no go reach the power wey Jesus get.

5. Which place the Kingdom go dey? Which place e go rule over?

⁵ God resurrect Jesus and after forty days, e go back to heaven. Later, Jehovah make Jesus King for the Kingdom. (Acts 2:33) God government go rule the earth from heaven. (Revelation 11:15) Na e make Bible talk say the Kingdom of God na Kingdom for heaven.​—2 Timothy 4:18.

6, 7. Wetin make Jesus better pass any other king?

⁶ Bible talk say Jesus pass all the kings for this earth because na Jesus be “the only person wey e no fit die.” (1 Timothy 6:16) All the rulers for this earth go die one day, but Jesus no go ever die. All the good things wey Jesus go do for us go remain forever.

⁷ Bible be talk-am say Jesus na King wey e no de do partial, and e de pity for people. Bible talk say: “The spirit of Jehovah go be with him, spirit wey e de give sense and de make person understand something, spirit wey e de give advice and power, spirit wey e dey make person know something and de fear Jehovah. And e go enjoy the fear of Jehovah. E no go judge with wetin e eye see, and e no go use only wetin e ear hear correct person. E no go do partial when e de judge poor people.” (Isaiah 11:2-4) You no go like-am make this kind person be your king?

8. How we know say other people go rule with Jesus?

 ⁸ God don choose some people make they rule with Jesus for the Kingdom. For example, apostle Paul be tell Timothy say: “If we continue de endure, we go rule together as kings.” (2 Timothy 2:12) How many people go rule as king with Jesus?

9. How many people go rule with Jesus? Which time God start to de choose them?

⁹ As we be learn for Chapter 7, apostle John see one vision. For the vision, e see Jesus as King for heaven with 144,000 other kings. Who be this 144,000 people? Apostle John talk say: “For front of their head, they write [Jesus] name and e Father name.” E still talk say: “They be the people wey de follow the Lamb [wey na Jesus] no matter the place wey e go. They buy them as firstfruit from among people.” (Read Revelation 14:1, 4.) This 144,000 na Christians wey they serve God well, and God don choose them make they “rule as kings over the earth” with Jesus. When this people die, God go resurrect them go heaven. (Revelation 5:10) Since the time of the apostles, Jehovah don de choose who go dey among this 144,000 kings.

10. Why we fit talk say na love make Jehovah choose Jesus and the 144,000 make they rule us?

¹⁰ Jehovah de care for us sotey e even choose people make they rule with Jesus. Jesus go be correct King because e really understand us. E know wetin e mean to live as person for this earth, and e know wetin e mean to suffer. Apostle Paul talk say Jesus de feel for us, e de “pity us for our mistake them,” and “e don pass through all kind test like us.” (Hebrews 4:15; 5:8) The 144,000 people still know how life be for us.  The time wey them dey for earth, them be struggle with sickness and their own mistake. So we fit dey sure say Jesus and the 144,000 go understand how we de feel and the problems wey we de face.

11. Why Jesus be teach e disciples to pray make the thing wey God want happen for earth as e dey for heaven?

¹¹ Why Jesus be teach e disciples to pray make the thing wey God want happen for earth as e dey for heaven? We be learn for Chapter 3 say Satan no gree obey God and e start de strong-head. Jehovah leave Satan and the other bad angels or demons, make they stay heaven for some time. So no be all the angels for heaven be de do the things wey God want. For Chapter 10, we go learn more about Satan and the demons.

12. Na which two important things Bible talk about for Revelation 12:10?

¹² Bible talk say small time after Jesus become King for the Kingdom of God, e go fight with Satan. (Read Revelation 12:7-10.) Verse 10 show us say two important things happen. God Kingdom start de rule with Jesus Christ as King, and they troway Satan from heaven come this earth. As we go learn, this things don already happen.

13. Wetin happen for heaven after they remove Satan?

¹³ Bible talk how the angels de happy after they remove Satan and the demons from heaven. E talk say: “Make heaven and all of wuna for inside dey happy!” (Revelation 12:12) Now, everybody for heaven de do  the things wey God want, them de live as one, and peace dey.

14. Wetin don happen for this earth as they remove Satan from heaven?

¹⁴ But life for this earth really dey different. Bad-bad things de happen for people “because Devil don come down” and “e de over vex because e know say na small time e get.” (Revelation 12:12) As they remove Satan from heaven, e really de vex. Satan know say e end go soon come. E de do everything to cause trouble, pain and suffer for the whole earth.

15. Wetin God want for this earth?

¹⁵ But the thing wey God want for this earth never change. God still want make perfect people stay forever for Paradise. (Psalm 37:29) So how the Kingdom of God go make this one happen?

16, 17. Wetin Daniel 2:44 teach us about the Kingdom of God?

¹⁶ For Daniel 2:44, Bible talk say: “When those king go de rule, God for heaven go start kingdom wey nothing go fit destroy-am. And the kingdom no go de comot from one person go another person. E go destroy all other kingdom and na only that kingdom go remain forever.” Wetin this one teach us about the Kingdom of God?

¹⁷ Number one, e teach us say the Kingdom of God go start de rule “when those king go de rule.” This one mean say when the Kingdom go start de rule, other governments go still dey this earth. Number two, e show say the Kingdom of God go dey forever, and no other government go fit remove-am. Number three, the Kingdom of God go fight war with the  governments for this world. The Kingdom of God go win, and e go be the only government wey e go rule this earth. Na that time we go get the best government wey we fit ever get.

18. Wetin be the name of the war wey the Kingdom of God go fight with the governments for this world?

¹⁸ Wetin the Kingdom of God go do before e rule the earth? The demons go decieve “the kings for the whole earth, to gather them together for the war wey God wey get power pass go fight for e great day.” After this one, they go fight the last war wey Bible call-am Armageddon. True, the governments for this world go fight the Kingdom of God.​—Revelation 16:14, 16; check Endnote 10.

19, 20. Why we need the Kingdom of God make e rule this earth?

¹⁹ Why we need the Kingdom of God? Make we talk three reason. Number one, all of us na sinner, so we de sick and we de die. But Bible talk say for the Kingdom of God, we go live forever. John 3:16 talk say: “God really love this world sotey e send the only special Son wey e get, so that anybody wey e continue to get faith for him no go die, but e go get life wey e no go end.”

²⁰ Number two reason why we need God Kingdom na because we de live with wicked people. Plenty people de lie, de do partial, and them de live life wey God no like. We no get power to remove them, but God go do-am. If they no change from the bad wey them de do, God go destroy them for Armageddon. (Read Psalm 37:10.) Number three reason why we need the Kingdom of God be say, the governments for this  world dey weak, they bad, and they corrupt. They no want help people make they obey God. Bible talk say “man don rule man enter trouble.”​—Ecclesiastes 8:9.

21. How the Kingdom go make the earth be the way God want-am?

²¹ After Armageddon, God go use the Kingdom make the earth be the way e want-am. For example, the Kingdom go remove Satan and the demons. (Revelation 20:1-3) Then as time de go, people no go sick or die again. Because of the ransom, all people wey they obey God go stay Paradise forever. (Revelation 22:1-3) The Kingdom go make the name of God dey holy. Wetin this one mean? E mean say when the government of God go de rule the earth, all people go de honor the name of Jehovah.​—Check Endnote 21.

22. How we know say they no make Jesus King when e dey this earth, or as e just go back to heaven?

²² Jesus teach e disciples make they pray say: “Make your Kingdom come.” So e dey clear say the Kingdom of God go come later. Jehovah go first form the Kingdom and make Jesus the King. You think say God  make Jesus King as e just reach heaven? No, e wait for some time. After Jesus come back to life, Peter and Paul make-am clear say the thing wey e dey Psalm 110:1 happen for Jesus. Jehovah talk for that verse say: “Sit-down for my right side until I put your enemies like stool under your leg.” (Acts 2:32-35; Hebrews 10:12, 13) Na how long Jesus go wait before e go start de rule as King?

23. (a) Na which time Jesus start de rule as King for the Kingdom of God? (b) Wetin we go learn for the next chapter?

²³ Plenty years before 1914, one group of true Christians be understand say 1914 go be important year wey things wey Bible talk go happen. The things wey de happen for this world since 1914 don show say this people dey correct. Jesus start de rule as King for that year. (Psalm 110:2) Just after that one, they troway Satan come earth, and now “na small time e get.” (Revelation 12:12) For the next chapter, we go see other things wey e show say we don de near the end. We go still learn say, small time, the Kingdom of God go make the earth be as God want-am.​—Check Endnote 22.