1-3. Which question people de ask about people wey don die, and which answer different religion de give?

BIBLE promise us say time de come wey people “no go die again.” (Revelation 21:4) For Chapter 5, we learn say we fit live forever because Jesus don die for us. But people still de die. (Ecclesiastes 9:5) So one important question wey we de ask be say: Wetin de happen to person when e die?

² The answer for that question dey important, especially when our person die. We fit de wonder say: ‘Which place e don go? E de see us? E fit help us? We fit ever see the person again?’

³ Plenty religion de give different-different answer for this questions. Some de teach say, if na good person, e go go heaven, but if na bad person, e go burn for hellfire. Other people talk say if person die, e go become spirit and e go join e family people wey don already die. And some still talk say after person die, they go judge the person, and they go born-am again, or e go come back to life as another person or even as animal.

4. Wetin be one thing wey plenty religion de teach?

⁴ All religion no de teach the same thing. But one thing dey wey plenty of them de teach. Them de teach say when person die, e soul or spirit go still de live. That one na true?

5, 6. Wetin de happen to person when e die?

⁵ Jehovah know the thing wey de happen when person die, and e don tell us say when person die, e life don end. This one mean say the person no de go live for another place. * And e no de feel or remember anything again. When person die, e no de fit see, hear or even think.

⁶ King Solomon write say, people wey they don die “no de know anything at all.” Dead people no fit love or hate, and they “no fit work, plan, learn, or think inside Grave.” (Read Ecclesiastes 9:5, 6, 10.) And for Psalm 146:4, Bible tell us say when person die, e no de think anything at all.

7. Wetin Jesus talk about person wey e die?

⁷ Lazarus na friend of Jesus. When Lazarus die, Jesus tell e disciples say: “Lazarus our friend don go sleep.” But Jesus no de talk say Lazarus de rest. Jesus later talk say: “Lazarus don die.” (John 11:11-14) So, wetin Jesus mean be say, person wey e die be like person wey e de sleep. Jesus no talk say Lazarus don go heaven, or e don go meet e family people wey they don die. And e no still talk say Lazarus de suffer for hellfire, or e don come life again as another person or animal. Instead, e just be like say Lazarus dey for deep sleep. Other place for Bible still talk the same thing. For example, when Jesus resurrect the daughter of Jairus, e talk  something wey show say death be like sleep. E talk say: “Make wuna no cry again, the girl no die but e de sleep.”​—Luke 8:52, 53.

8. How we know say God want make people live forever?

⁸ You think say God make Adam and Eve so that they go die after some time? No! Jehovah want make they enjoy life forever. E no want make they sick or old. They like to live forever because na so Jehovah put-am for their heart. (Ecclesiastes 3:11) No papa or mama go like-am if they see their children de sick or  die. Na so Jehovah still de feel. But if God make us to live forever, why we de die?

9. Why we fit talk say the command wey Jehovah give Adam and Eve no dey hard to obey?

⁹ Jehovah be tell Adam for garden of Eden say: “You fit chop from every tree wey e dey the garden, make you belleful. But make you no chop from the tree wey de make person know good and bad, because the day wey you chop-am, you must die.” (Genesis 2:9, 16, 17) The command wey Jehovah give Adam dey clear and e no hard to obey. Jehovah get the right to tell Adam and Eve the thing wey e good or bad. If they be obey Jehovah, e for show say they respect Jehovah as their ruler. They for show Jehovah say them dey glad for all the things wey e give them.

10, 11. (a) Wetin Satan do to fool Adam and Eve? (b) Why they no fit talk say the thing wey they do na mistake?

¹⁰ The bad thing be say, Adam and Eve no obey Jehovah. Satan tell Eve say: “God really talk say make wuna no chop fruit from any tree for the garden?” Eve answer say: “We fit chop fruit from the trees for the garden. But for the fruit of the tree wey dey middle of the garden, God talk say: ‘Make wuna no chop-am, no, make wuna no touch-am, if wuna chop-am, wuna go die.’”​—Genesis 3:1-3.

¹¹ Satan come talk say: “Wuna no go die at all. Because God know say the day wey wuna chop-am, wuna eye go open and wuna go be like God, wuna go know good and bad.” (Genesis 3:4-6) Satan want make Eve think say e get right to choose good and  bad thing. And Satan still lie about the thing wey go happen if Eve no obey God. Satan talk say Eve no go die. So Eve come chop the fruit and e give Adam too. Adam and Eve know say Jehovah tell them make they no chop the fruit. As they chop the fruit, e show say they no obey the clear and simple command wey God give them. And e still show say, they no respect their Papa for heaven wey e really love them. They no fit talk say the thing wey they do na mistake!

12. Why e really bad as Adam and Eve no obey God?

¹² E really bad as our first papa and mama, Adam and Eve no respect God wey e make them. How you go feel if you work hard to train two children, and they come de strong-head for you, them de do their own thing instead of the things wey you tell them. E no go pain you?

13. Wetin Jehovah mean when e tell Adam say “you go turn to dust”?

¹³ When Adam and Eve no obey God, they lost their chance to live forever. Jehovah be tell Adam say: “You be dust and when you die, you go turn to dust.” (Read Genesis 3:19.) That one mean say when Adam die, e go turn to dust, like say e no ever live  before. (Genesis 2:7) After Adam sin, e die. E no go live for another place.

14. Why we de die?

¹⁴ If Adam and Eve be obey God, they for still de live till now. But they no obey God, they sin and they die. Sin be like bad sickness wey we carry from our first papa and mama. All of us de die because they born us inside sin. (Romans 5:12) But no be the thing wey God want for us be that. God no ever want make people de die, and Bible talk say death na “enemy.”​—1 Corinthians 15:26.

15. How the truth about death de free us?

¹⁵ The truth about death de free us from the wrong things wey people believe. Bible tell us say dead people no fit vex or feel pain. We no fit talk with them, and they no fit talk with us. We no fit help them, and they no fit help us. They no fit do us bad, so we no need to de fear them. But plenty religion de teach say dead people de live for some place. And they still de talk say we fit help them if we pay money for priest or people wey other people de call men of God. But if we know the truth about death, we no go believe all this lie.

16. Na which lie plenty religion de teach about dead people?

¹⁶ Satan de use lie-lie religion to fool people. E want make we de think say dead people still de live. For example, many religion de teach say when we die, our soul or spirit de go live for another place. Na so your religion de teach you, or them de teach you the truth for Bible? Satan de teach people lie so that they no go serve Jehovah.

17. Why hellfire belief na insult for Jehovah?

 ¹⁷ The thing wey plenty religion de teach no fine at all. For example, some de teach say bad people go burn for hellfire forever. This lie na insult for Jehovah. Jehovah no go allow people suffer like that! (Read 1 John 4:8.) How you go feel if you hear say one man burn e pikin hand because e do bad? You no go talk say the man wicked? You go want make this kind person be your friend? Na so Satan want make we de feel about Jehovah!

18. Why we no suppose fear dead people?

¹⁸ Plenty religion de teach say people de become spirit when they die. Them de talk say we must respect, or even fear this spirits because they fit be our tight friend or strong enemy. Many people believe this lie. So them de fear and worship people wey they don die, instead of Jehovah. Remember say dead people no know anything, we no suppose de fear them. Na Jehovah make us. Na e be the true God, and na only Jehovah we go worship.​—Revelation 4:11.

19. If we know the truth about death, how that one fit help us?

¹⁹ When we know the correct thing wey de happen when person die, e go free us from the things wey lie-lie religion de teach. And e go help us understand the wonderful things wey Jehovah don promise about our life and our future.

20. Wetin we go learn for the next chapter?

²⁰ For Bible time, one servant of God be ask say: “If person die, e go fit live again?” (Job 14:14) Person wey e don die fit really live again? The answer for Bible go touch you for heart. We go talk about-am for the next chapter.