1, 2. Which questions people de ask?

CHILDREN de ask plenty question. Sometimes, when you explain something for them, they go ask you say, ‘Why?’ Even when you don try answer them, they go still ask you say, ‘But why?’

² Whether we young or we don old, we de ask question. We fit ask about wetin we go chop, cloth wey we go wear or wetin we go buy. We fit even get important question about life and how the future go dey. But if we no get correct answer, we fit stop to de ask this important questions.

3. Why plenty people de think say they no fit get answer for their questions?

³ Bible get answer for all the important question wey people de ask? Some people go say yes, but they feel say Bible too hard and they no fit understand-am. They fit de feel say na only teachers for religion fit tell them the answer. And because some people de shame, they no want talk say they no know the answer. Wetin you think?

4, 5. Which important questions you get? Why e good make you no stop to de find the answer?

⁴ You fit de find answer for questions like: Why I dey this earth? Wetin go happen to person when e die? Which kind person God be? Jesus na correct Teacher wey plenty people know. E talk say: “Continue de ask, and they go give wuna; continue  de find-am, and wuna go see-am; continue de knock, and they go open-am for wuna.” (Matthew 7:7) So, make you no tire until you find the correct answer.

⁵ Yes, if you “continue de find-am,” you go see the answers inside Bible. (Proverbs 2:1-5) They no too hard and you fit understand-am. The things wey you go learn go make life sweet you and e go give you hope. One question de confuse many people. Make we talk about-am.

6. Why some people feel say God no really love them?

⁶ Plenty people de think say God no love us. They talk say if e love us, this world no for be like this. Problem full everywhere, war dey, and people hate each other. People de sick, de suffer and de die. Some people de think say, ‘If God really love us, why e no stop all this problem?’

7. (a) How teachers for religion de teach people say God wicked? (b) Why we dey sure say no be God de cause bad things?

⁷ Sometimes, teachers for religion de make people believe say God wicked. When bad thing happen, they go say na so God want-am. When they talk like this, na God them de blame. But Bible teach us say bad thing no fit ever come from God. James 1:13 talk say God no de use bad thing test person. E say: “When problem dey, make nobody talk say: ‘Na God de test me.’ Because nobody fit test God with bad thing and God no de use bad thing test person.” E mean say God de allow bad things happen, but e no de cause-am. (Read Job 34:10-12.) Make we see one example.

8, 9. Why e no good make we de blame God for our problems? Give example.

 ⁸ Think about one young man wey e de live with e papa and mama. The papa really love the son. E don teach this boy how to choose good things. But the boy come de get strong-head, and e pack comot for house. E start de do bad things. Small time, e enter trouble. As this boy enter trouble, you go blame the papa because e allow the boy comot for house? No! (Luke 15:11-13) God be like that papa. When people choose say na bad things they go de do, God no de stop them. So when bad things happen, make we remember say no be God cause-am. E no good make we de blame God.

⁹ God get reason why e never stop bad things. For Chapter 11, you go learn wetin Bible talk about this matter. But no ever forget say God love us and e no de cause problem for us. The truth be say, na only God fit solve all our problem.​—Isaiah 33:2.

10. Why we dey sure say God go remove all the problem wey we de get from bad people?

¹⁰ God dey holy. (Isaiah 6:3) Everything wey e de do dey clean and good. We fit trust God. No be so people be. Sometimes, people de do bad things. Na this bad things de cause problem. Person fit de rule with good heart, but even so, e no get power to remove all this problem. Nobody get power pass God. And e go remove all the problem wey bad people don cause. E go remove all bad things forever.​—Read Psalm 37:9-11.

11. How God de feel as you de suffer?

¹¹ How God de feel when e see bad things for this world? How e de feel when e see you de suffer? Bible teach us say God “like correct things.” (Psalm 37:28) God like-am when people de do good, e no like-am when people de do bad. E hate-am when people de suffer. E get one time wey bad things full the earth. Bible talk say that time, God “really feel pain for heart.” (Genesis 6:5, 6) God never change. (Malachi 3:6) E really care about you.​—Read 1 Peter 5:7.

12, 13. (a) Why we get love and de care for people, and how we de feel about the suffer for the world? (b) Why we dey sure say God go remove suffer and partial?

¹² Bible still tell us say God make us like e self. (Genesis 1:26) This one mean say God make us to get the fine-fine character wey e get. So if you de feel bad say good people de suffer, know say God de feel bad pass you. How we know this one?

¹³ Bible teach us say “God na love.” (1 John 4:8) Na love de make God do everything wey e de do. Na God make us get love. Think-am: If you get power, you no go remove all the suffer and partial for this world? Yes, you go do-am, because you love people. God fit do-am? Yes. Because e get power and e love us, e go remove all the suffer and partial for this world. So, dey sure say all the promise wey we learn for page four and five for this book, God go do-am for us. But to really trust this promise, you need to know more about God.

14. Wetin be the name of God, and how we know say we suppose de use-am?

¹⁴ If you want make person be your friend, wetin be the first thing wey you go tell the person? Na your name. God get name? Plenty religion de talk say e name na God or Lord. All this one no be name, they be title, just like “king” or “president.” God tell us say e name na Jehovah. Psalm 83:18 talk say: “Make people know say you wey your name na Jehovah, na only you big pass for the whole earth.” When people de write Bible, they use the name of God plenty times. Jehovah want make you know this name and de use-am. E tell you this name so that you go be e friend.

15. Wetin the name Jehovah mean?

¹⁵ The name of God, Jehovah, get big meaning. E mean say God fit do anything wey e promise and e fit do anything wey e want do. Nothing fit stop God. Na only Jehovah fit get this name. *

16, 17. Wetin this titles mean? (a) “The Almighty” (b) “King wey e dey forever” (c) “Creator.”

 ¹⁶ We don see wetin Psalm 83:18 talk about Jehovah, say: “Na only you big pass.” And Revelation 15:3 talk say: “Jehovah God, the Almighty, all your work big and them really good. King wey e dey forever, all your ways correct and them dey righteous.” Wetin this title “the Almighty” mean? E mean say na Jehovah get power pass for heaven and earth. This  title “King wey e dey forever” mean say God no get start and e no go ever die. Psalm 90:2 explain-am say God don dey for long time. The time no get start and e no get end. This one no surprise you?

¹⁷ Na only Jehovah be the Creator. Revelation 4:11 talk say: “Jehovah our God, na only you suppose to get honor, praise, and power because na you make everything. Everything dey because you want-am make e be like that.” Yes, na Jehovah make everything. E make angels for heaven, stars for sky, fruit for trees, and even fish for water.

18. Why some people de feel say they no fit be friend of God? Wetin Bible talk about this matter?

¹⁸ When some people read about the fine-fine character wey Jehovah get, this one fit make them de fear, and de think say, ‘God really get plenty power, nobody big reach God, and e dey far. So why e go care about me?’ God no want make we de feel like that. Jehovah want near us. Bible talk say “e no dey far from any of us.” (Acts 17:27) God want make you draw near e side, and e don promise say ‘e go draw near you.’​—James 4:8.

19. (a) How you fit be friend of God? (b) Which one you like pass for all the fine-fine character wey Jehovah get?

¹⁹ How you fit be friend of God? Jesus talk say: “Them go live forever, when them de know you, the only true God, and Jesus Christ, wey you don send.” (John 17:3) No stop to de learn, and you go know Jehovah and Jesus. Na this one go make you live forever. For example, we don learn say “God na love.” (1 John 4:16) But God still get other fine-fine character. Bible tell us say Jehovah “get pity, e get soft-heart, e no de vex quick-quick, na only truth e de talk and e love no de fail.” (Exodus 34:6) Jehovah dey ‘good and e ready to forgive.’ (Psalm 86:5) Jehovah dey patient and e love dey strong. (2 Peter 3:9; Revelation 15:4) As you de read Bible, you go learn more about the fine-fine character wey Jehovah get.

20-22. (a) How you fit near God wey you no de see? (b) Wetin you go do if people want stop you as you de study Bible?

²⁰ How you fit near God wey you no de see? (John  1:18; 4:24; 1 Timothy 1:17) You go really know Jehovah well if you de read Bible. (Psalm 27:4; Romans 1:20) As you de learn more about God, na so your love for God go de grow. And you go come see say you de near God pass before.

²¹ You go know say Jehovah na our Father. (Matthew 6:9) E give us life, and e want make we really enjoy-am. Na wetin any good papa go want be that. (Psalm 36:9) Yes, Bible teach us say you fit be friend of Jehovah. (James 2:23) Just think-am. Jehovah, the God wey e make heaven and earth, want be your friend!

²² Some people fit want stop you as you de study Bible. They fit de fear say you go change your religion. But no allow anybody stop you as you de try make you be friend of Jehovah. Na Jehovah be the best friend wey you fit ever get.

23, 24. (a) Why e good make you continue de ask question? (b) Wetin we go learn for the next chapter?

²³ As you de study Bible, you go see some things wey you no understand. No shame, ask questions, ask make they help you. Jesus talk say make we be like children, make we no de carry shoulder up. (Matthew 18:2-4) Children de ask plenty questions. God want make you get the answers. So take your time study Bible, and make sure say the thing wey you de learn na the truth.​—Read Acts 17:11.

²⁴ If you want learn about Jehovah, the best way na to study Bible. For the next chapter, we go learn why Bible dey different from other books.