1, 2. (a) You fit talk say you know person if you only know e name? Explain. (b) Wetin people believe about Jesus?

SOME people dey wey plenty people know them for this world. You fit even know their name. But because you know their name no mean say you really know them. E no mean say you know everything about their life and the kind people wey they really be.

² You fit don hear about Jesus even though say na about 2,000 years ago e live for this earth. But plenty people no know the kind person wey Jesus really be. Some de talk say e be good man, other people talk say e be prophet and some still believe say e be God. Wetin you think?​—Check Endnote 12.

3. Why e good make you learn about Jehovah God and Jesus Christ?

³ Why e good make you know the truth about Jesus? Because Bible talk say: “Them go live forever, when them de know you, the only true God, and Jesus Christ, wey you don send.” (John 17:3) Yes, if you know the truth about Jehovah and Jesus, you fit live for paradise for this earth. (John 14:6) Another thing be say, if you de learn about Jesus, e go help you now, because na Jesus be the best example to follow if we want live fine life and treat other people well. (John 13:34, 35) For Chapter 1, we be learn the  truth about God. Now we go learn the things wey Bible de teach about Jesus.

4. Wetin “Messiah” and “Christ” mean?

⁴ Plenty years before they born Jesus, Jehovah be don promise for Bible say e go send the Messiah, or Christ. The word “Messiah” come from Hebrew language, and the word “Christ” come from Greek. Messiah or Christ mean say Jehovah don choose Jesus and e go give Jesus this special position. The Messiah go make all the things wey God don promise us happen. But before they born Jesus, plenty people de wonder say: ‘Na who go be the Messiah?’

5. Who the disciples believe say Jesus be?

⁵ The disciples of Jesus no get any doubt say na Jesus be the Messiah wey God don promise them. (John 1:41) For example Simon Peter be tell Jesus say: “You be the Christ.” (Matthew 16:16) Wetin help us know say Jesus na the Messiah?

6. Wetin help people wey they love God to know say na Jesus be the Messiah?

⁶ Long time before they born Jesus, many prophet of God don write plenty things wey go help people know who the Messiah go be. How this one help those people? Imagine say you want go pick person for motor park and you never see the person before. Wetin fit help you find the person? Na if they tell you plenty things about the person. Na the same thing Jehovah do. God use prophets tell us the things wey the Messiah go do and the things wey e go happen for e life. All the things wey Bible  talk about the Messiah happen to Jesus. And this one help people wey they love God, to know say na Jesus be the Messiah.

7. Which two example Bible talk wey e show say na Jesus be the Messiah?

⁷ Make we see two example wey Bible talk about. Number one, 700 years before they born Jesus, prophet Micah be talk say, they go born the Messiah for one small town wey e be Bethlehem. (Micah 5:2) And na for there they born Jesus! (Matthew 2:1, 3-9) Number two, prophet Daniel talk say the person go be Messiah for the year 29 C.E. (Daniel 9:25) This na just two example for Bible wey e show say Jesus na the Messiah.​—Check Endnote 13.

8, 9. The time wey Jesus de baptize, wetin show say e be the Messiah?

⁸ Jehovah be don show-am clear say na Jesus be the Messiah. God promise to give John the Baptist sign. This sign go show who the Messiah be. For the year 29 C.E., Jesus go meet John for Jordan River. After John baptize Jesus, na that time John see the sign. Bible talk say: “After they baptize Jesus finish, e no waste time come out of the water and see! heaven open, and e see the spirit of God as e de come down like dove ontop him. Look! One voice still talk from heaven say: ‘Na my Son be this, the one wey I love. E de make me happy.’” (Matthew 3:16, 17)  When John see this sign and hear this voice, e come know say Jesus na the Messiah. (John 1:32-34) Na that day wey the spirit of God come ontop Jesus, e become the Messiah, the Leader and King wey Jehovah don choose.​—Isaiah 55:4.

⁹ The things wey Bible talk, the voice of Jehovah, and the sign wey John see for the time wey Jesus de  baptize, show say Jesus na the Messiah. But which place Jesus come from, and which kind person e be? Make we see-am for Bible.

10. Wetin Bible talk about Jesus before e come this earth?

¹⁰ Bible tell us say Jesus don live for heaven for long time before e come this earth. Prophet Micah talk say the Messiah don dey “for long time.” (Micah 5:2) Jesus be talk plenty times say e don first stay for heaven before e come this earth. (Read John 3:13; 6:38, 62; 17:4, 5.) Even before Jesus come this earth, e and Jehovah na tight friend.

11. Wetin make Jesus dey special to Jehovah?

¹¹ Why Jesus dey special to Jehovah? Na because Jehovah make Jesus before e make any other person or thing. Na e make them de call Jesus “the firstborn for everything wey God make.” * (Colossians 1:15) Another reason why Jesus dey special, na because Jesus na the only person wey Jehovah use e own hand make. Na this one make they call Jesus “the only special Son.” (John 3:16) Every other thing wey Jehovah make, na Jesus e use. (Colossians 1:16) Bible call Jesus “the Word” because e de tell people and angels the things wey Jehovah talk.​—John 1:14.

12. How we know say Jesus and God no be the same person?

¹² Some people believe say God and Jesus na the  same person. But no be so Bible talk. Bible talk say God make Jesus, e mean say Jesus get start. But na Jehovah make everything, and e no get time wey e own life start. (Psalm 90:2) Jesus na Son of God and e no ever try to be God. Bible talk say the Father big pass the Son. (Read John 14:28; 1 Corinthians 11:3.) Na only Jehovah be “Almighty God.” (Genesis 17:1) Na e big pass, and e get power pass everybody for heaven and earth.​—Check Endnote 14.

13. Wetin make Bible talk say Jesus “be like the God wey we no fit see”?

¹³ Plenty years before they make heaven and earth, Jehovah and Jesus don work together. And they really love each other. (John 3:35; 14:31) Jesus de really do things like Jehovah sotey Bible talk say: “E be like the God wey we no fit see.”​—Colossians 1:15.

14. How they fit born Jesus for this earth?

¹⁴ This special Son of God ready to leave heaven come earth as person. How that one fit happen? Jehovah do miracle. E transfer e Son life from heaven enter the belle of one woman. The woman name na Mary and e be virgin. So Jesus no get papa for this earth. The pikin wey Mary born dey perfect. And they call e name Jesus.​—Luke 1:30-35.

15. How you fit know more about Jehovah?

¹⁵ If we read the Bible book of Matthew, Mark, Luke, and John, we go learn plenty things about Jesus, the kind life wey e live, and the character wey e get. Them de call this four book the Gospels. The  things wey you de read about Jesus fit help you know Jehovah, because Jesus be like e Father. Na that one make Jesus talk say: “Anybody wey don see me don see the Father.”​—John 14:9.

16. Wetin Jesus teach people? Who get the things wey Jesus teach?

¹⁶ Plenty people de call Jesus “Teacher.” (John 1:38; 13:13) Jesus teach people many important things. One of them na “the good news about the Kingdom.” Wetin be this Kingdom? Na the government of God wey e go rule people from heaven. And e go bring plenty blessing for people wey they obey God. (Matthew 4:23) All the things wey Jesus teach people come from Jehovah. Jesus talk say: “Things wey I de teach no be my own, but na the person wey send me get-am.” (John 7:16) Jesus know say Jehovah want make people hear the good news say the Kingdom of God go rule the earth.

17. Na for which place Jesus teach people? Why Jesus work hard and use plenty time teach them?

¹⁷ Na for which place Jesus teach people? Any place wey e see them. E de teach people for farm, city, village, market, their house or place wey them de worship God. Jesus no de wait make people come the place wey e dey. Instead e de go meet them. (Mark 6:56; Luke 19:5, 6) Why Jesus work hard and use plenty time teach people? Na because e know say Jehovah want make e do like that, and e de obey Jehovah. (John 8:28, 29) Jesus still de preach because e de pity for people. (Read Matthew 9:35, 36.) Jesus see-am say leaders for Jew religion no de teach people the correct thing about God and e Kingdom.  So e want make plenty people hear the good news.

18. Which character Jesus get wey you like pass?

¹⁸ Jesus love people and e want help them. E get soft-heart and e dey easy for people to talk with Jesus. Even small children de like dey with Jesus. (Mark 10:13-16) Jesus de always do the correct thing. E hate partial and anything wey e bad. (Matthew 21:12, 13) The time wey Jesus dey this earth, people no de treat women with respect and women no really dey free to do the thing wey they want. But Jesus value women and e respect them. (John 4:9, 27) E de put body down. For example, one evening, Jesus wash the feet of e apostles. This na work for servant, but Jesus do-am.​—John 13:2-5, 12-17.

19. Which example show say Jesus know the thing wey people need and e ready to help them?

¹⁹ Jesus know the thing wey people need, and e ready to help them. E show-am clear the time wey e use the power of God heal people. (Matthew 14:14) For example, one man wey e get leprosy come beg Jesus say: “If you want, you fit make me clean.” Jesus feel sorry for the man as e de suffer and e want help the man. So Jesus stretch e hand, touch the man, and e talk say: “I want do-am! Make you dey clean.” And e heal the sick man. (Mark 1:40-42) How you think say the man go feel?

20, 21. How Jesus be show fine example as e obey God?

²⁰ Jesus show us the best example of how person fit obey God. Even when life hard or people do Jesus  bad, e no ever leave Jehovah. For example, the time wey Satan tempt Jesus, e no sin. (Matthew 4:1-11) Some of the family member of Jesus no believe say e be the Messiah. So they talk say: “E don de craze.” But Jesus continue de do God work. (Mark 3:21) When people do Jesus bad, e no stop to serve Jehovah, and e no try to do them bad.​—1 Peter 2:21-23.

²¹ Before Jesus die, e really suffer but e still hold Jehovah tight. (Read Philippians 2:8.) Just think about the things wey Jesus endure before e die. They catch Jesus, they lie say e de teach people lie about God. The bad judge them say make they kill Jesus. Plenty people laugh Jesus, soldiers beat Jesus and  they even nail-am for stake. As e de die e shout say: “I don do everything wey you say make I do!” (John 19:30) Three days after Jesus die, Jehovah resurrect Jesus with spirit body. (1 Peter 3:18) After some weeks, Jesus go heaven, e sit-down for the right hand of God and e wait until God talk say make e be King.​—Hebrews 10:12, 13.

22. Wetin be the chance wey we get now as Jesus hold Jehovah tight?

²² As Jesus hold Jehovah tight till e die, e don give us chance to live forever for Paradise just as Jehovah want-am. How this one fit help us live forever? We go talk about-am for the next chapter.