1, 2. How Jehovah want make family be?

NA JEHOVAH arrange the first marriage. Bible talk say e make the first woman and “e bring the woman come meet the man.” Adam happy sotey e talk say: “At last, see the bone wey e comot from my bone and the flesh wey e comot from my flesh.” (Genesis 2:22, 23) This one show say Jehovah want make family dey happy.

² The bad thing na say, plenty people no get family wey e dey happy. But Bible get plenty advice for family, and if everybody for family follow-am , their family go dey happy.​—Luke 11:28.

3, 4. (a) How husband go de treat e wife? (b) Why e dey important make husband and wife de forgive each other?

³ Bible talk the thing wey good husband de do. E de treat e wife with love and respect. Abeg read Ephesians 5:25-29. Husband go de treat e wife with love everytime. E go protect and care for e wife. E no go talk wetin go pain e wife and e no go beat e wife.

⁴ But wetin husband go do when e wife make mistake? Bible tell husbands say: “Make wuna continue de love wuna wife and make wuna no de over vex with them.” (Colossians 3:19) If you be husband, make you remember say you de make mistake too. And if you  want make God forgive you, you must forgive your wife. (Matthew 6:12, 14, 15) When husband and wife dey ready to forgive each other, they go get happy marriage.

5. Why e good make husband de treat e wife well?

⁵ Jehovah want make husband de treat e wife well. E good make husband de think about the things wey e wife need. This one na serious matter. If husband no de treat e wife well, Jehovah fit no answer e prayer. (1 Peter 3:7) If people love Jehovah, e de value them. E no matter whether they be man or woman.

6. Wetin e mean make husband and wife be “one flesh”?

⁶ Jesus talk say husband and wife “no be two person again but one flesh.” (Matthew 19:6) The love wey they get for each other no de fail, and they no go ever sleep with another person. (Proverbs 5:15-21; Hebrews 13:4) Husband and wife no go de deny sex for each other. (1 Corinthians 7:3-5) Make husband remember say “person no de hate e own body, but e de chop and sofri take care of e body.” So make husband de show love and make e de sofri take care of e wife. Every woman de like make their husband de carry them like egg.​—Ephesians 5:29.

7. Why family need person wey e go be the head?

⁷ Family need person wey e go be the head, person wey e go guide the family so that everybody go fit de work together. For 1 Corinthians 11:3, Bible talk say: “The head for every man na Christ, the head for woman na man, and the head for Christ na God.”

8. How wife go show say e get deep respect for e husband?

 ⁸ Every husband de make mistake. But when wife de support and use all e heart work with e husband, the whole family go benefit. (1 Peter 3:1-6) Bible talk say: “Make wife respect e husband well-well.” (Ephesians 5:33) What if the husband no de join the wife de serve God? E good make the wife still get deep respect for the husband. Bible talk say: “Wuna wey be wife, make wuna de put wunaself under wuna husband, so that if any of them no de obey God, wuna fine character fit make them change, even if wuna no talk anything, because they don see say wuna de live clean life and wuna get deep respect.” (1 Peter 3:1, 2) If wife de follow the advice for Bible, e go help the husband know say the things wey e wife believe dey important, and e go respect those things.

9. (a) Wetin wife go do if e no agree with the thing wey e husband talk? (b) Which advice for wife dey for Titus 2:4, 5?

⁹ Wetin wife go do if e no gree with the thing wey e  husband talk? E good make e talk with respect. For example, Sarah talk something wey Abraham no like, but Jehovah tell Abraham make e listen to e wife. (Genesis 21:9-12) E hard for husband wey e de serve Jehovah to choose something wey Jehovah no like. So make wife de support their husband. (Acts 5:29; Ephesians 5:24) Good wife go take care of e family. (Read Titus 2:4, 5.) When wife de work hard, e go get more love and respect from e husband and e children.​—Proverbs 31:10, 28.

10. Wetin Bible talk about husband and wife wey they want end their marriage or leave each other?

¹⁰ Sometimes, some husband and wife fit decide say they want end their marriage, or say they no go stay together again. Bible talk say “make wife no leave e husband” and “make husband no leave e wife.” (1 Corinthians 7:10, 11) E get some things wey e fit make husband and wife leave each other, but this one na serious decision. What if they want end their marriage? Bible talk say the only thing wey e fit make them end their marriage na if the husband or wife go sleep with another person.​—Matthew 19:9.

11. Wetin be the thing wey children need pass?

¹¹ Papa and mama, make wuna de spend plenty time with wuna children. They need wuna. The thing wey they really need pass na say make wuna teach them about Jehovah.​—Deuteronomy 6:4-9.

12. Wetin papa and mama go do to protect their children?

¹² This world wey Satan de control de spoil everyday. Some people want do bad thing to wuna children,  they fit even rape them or spoil them. E dey hard for some papa and mama make they teach their children about sex. But they need to warn their children about people wey want spoil them and teach them how they go run from them. Papa and mama, make wuna de protect wuna children. *​—1 Peter 5:8.

13. How papa and mama go de teach their children?

¹³ Another work wey papa and mama get na to teach their children make them de behave well. How you go  teach your children? E good make you correct your children, but no be with vex or for wicked way. (Jeremiah 30:11) No ever correct your pikin when you still de vex. E no good to de talk word wey e be “like when they use knife chuk person.” (Proverbs 12:18) Teach your children make they understand why e good make them de obey.​—Ephesians 6:4; Hebrews 12:9-11; check Endnote 30.

14, 15. Why e good make children de obey their papa and mama?

¹⁴ Jesus de always obey e Father, even when e hard. (Luke 22:42; John 8:28, 29) Jehovah want make children de obey their papa and mama.​—Ephesians 6:1-3.

¹⁵ Even if e hard for you to obey, remember say if you de obey your papa and mama, they go dey happy, and even Jehovah go dey happy with you. *​—Proverbs 1:8; 6:20; 23:22-25.

16. (a) How Satan de try make young people do bad things? (b) Why e dey important make you choose friends wey love Jehovah?

¹⁶ Satan fit use wuna friends or other young people make they tempt wuna. E know say e fit hard for you to say no if your friends want make you do something. For example, Jacob daughter wey e name na Dinah, get friends wey no love Jehovah. This one cause plenty trouble for Dinah and e family. (Genesis 34:1, 2) If your friends no love Jehovah, they fit tempt you make you do something wey Jehovah hate. If you do-am, you fit cause serious problem for you and your family and God no go dey happy. (Proverbs 17:21, 25) Na e  make e dey important make you get friends wey love Jehovah.​—1 Corinthians 15:33.

17. Wetin everybody for family need to de do?

¹⁷ When everybody for family de follow wetin God talk, they go dey free from many problems. So if you be husband, de love and treat your wife well. If you be wife, respect your husband, put yourself under your husband and copy the example of the wife wey Bible talk about for Proverbs 31:10-31. If you be papa or mama, teach your children make they love God. (Proverbs 22:6) If you be papa, make you manage your family well. (1 Timothy 3:4, 5; 5:8) Children, make wuna de obey wuna papa and mama. (Colossians 3:20) Remember say anybody for family fit make mistake. If e happen like that, make the person put body down, and make e beg other people for the family. Na true, for inside Bible, Jehovah get advice for everybody for family.