1. Wetin Paul, Luke, and Aristarchus know wey give them strong heart?

 THE YEAR na around 59 C.E. One ship wey get the sign “Sons of Zeus,” wey fit be ship wey them de use carry big load of food, de move from the Mediterranean island of Malta de go Italy. Apostle Paul na prisoner wey them de escort. E and im Christian brothers Luke and Aristarchus dey for this ship. (Acts 27:2) Them no do like the people wey de work for the ship wey de beg Castor and Pollux, the twin children of the Greek god Zeus to protect them. (Check study note of Acts 28:​11, nwtsty.) Paul and im friends de serve Jehovah and Jehovah don make them know say Paul go preach for Rome and e go stand for Caesar front.​—Acts 23:11; 27:24.

2, 3. The ship wey Paul enter, which way e pass, and who support Paul all this time?

² Syracuse na one fine city for Sicily wey nearly dey important reach Athens and Rome. Three days after them reach there, the ship come move go Rhegium wey dey for the south side of Italy. Breeze from there come help move the ship quick-quick. E move 320 km go where ship de park for Puteoli inside Italy (this place dey near Naples for this our time) and e reach here the second day after them leave Rhegium.​—Acts 28:​12, 13.

³ Now Paul dey the last part of im travel to Rome and for there, e go defend imself for front of Emperor Nero. For the whole time wey Paul de travel “the God wey de give all kind of comfort” dey with-am. (2 Cor. 1:3) We go learn say Jehovah continue to support Paul, and Paul continue to really put body for im missionary work.

4, 5. (a) Wetin the brothers for Puteoli do for Paul and im friends, and why the guards allow Paul to stay with the brothers? (b) Even when them dey prison, how Christians fit gain from their good character?

⁴ For Puteoli, Paul and im friends ‘see brothers for there and the brothers advice them to stay with them for seven days.’ (Acts 28:14) The brothers for Puteoli na better example of people wey de use all their mind care for their brothers no matter wetin happen! We dey sure say  this brothers gain pass wetin them give because Paul and im friends really encourage them. But why the Roman guards give person wey be prisoner this kind chance? E fit be say them trust Paul because of the way e de behave.

⁵ Today too, many times them de allow Jehovah servants wey them put for prisons and concentration camps to do things wey them no de allow prisoners do because them trust the brothers. For example, one man for Romania wey get 75 years to stay for prison because e be thief, start to study Bible and really change im character. The guards for the prison come trust-am sotey them de send-am go buy things wey them go use for the prison, and nobody de escort the man. Wetin dey important pass be say our character de bring praise to Jehovah.​—1 Pet. 2:12.

6, 7. How the Roman brothers show say them really love Paul?

⁶ To go Capua from Puteoli, Paul and im friends trek 50 km for the Appian Way wey de go Rome. Them use big flat blocks of rock do this road. People wey de pass this road travel de fit see the fine countryside of Italy and for some places them go even de see the Mediterranean Sea. For this road, people wey de travel go reach the Pontine Marshes, wey be one area wey get poto-poto and wey plenty water gather wey dey about 60 km from Rome and na there the Market of Appius dey. Luke talk say when the brothers for Rome ‘hear the news about them,’ the brothers come from far to meet them for the Market of Appius and some wait for them for the place wey them de call Three Taverns. Three Taverns na where people wey de travel de stop to rest and e dey about 50 km from Rome. Wetin the brothers do show say them love Paul well-well no be small.​—Acts 28:15.

⁷ Person wey don tire from travel no fit rest well for the Market of Appius. Horace na person wey de write poem, e come from Rome. E describe how the Market place  be. E say: “people wey full the place na people wey de work for ship and the hotel people wey get bad character.” E say: “the water dirty well-well.” And e no gree eat for there. Even as this place no be where person fit enjoy to stay rest, the group of brothers from Rome happy to stay here wait for Paul and im friends so that them go escort them for the last part of their travel.

8. Why Paul thank God “as Paul see” im brothers?

⁸ Bible tell us say: “As Paul see” im brothers, “e thank God and im heart strong.” (Acts 28:15) Yes, as apostle Paul just see this brothers, e come get power and im mind come down. E fit be say, e know some of them before. Why Paul thank God? E know say one of the fruit wey the spirit de produce na the kind love wey no de think of only imself. (Gal. 5:22) Today too, holy spirit de move Christians to do things for each other and to make the mind of their brothers and sisters come down.​—1 Thess. 5:​11, 14.

9. How we fit copy the brothers wey meet Paul?

⁹ For example, holy spirit de move brothers to care for circuit overseers, missionaries, and other brothers wey dey full-time work. Many of this brothers don abandon many things to fit get the time to work for Jehovah. Ask yourself say: ‘I fit do more to support circuit overseer when e visit, or to care for-am and for im wife if e don marry? I fit arrange to work with them for preaching?’ You fit gain well-well if you do like that. For example, think about how the Roman brothers feel as them de listen when Paul and the brothers wey follow-am travel de talk about some of the many experience wey them get. This one make the brothers faith strong.​—Acts 15:​3, 4.

10. Which condition Paul dey for Rome, and wetin e do as e reach Rome?

¹⁰ When Paul and the people wey travel with-am come reach Rome, “them allow Paul make e stay alone with the soldier wey de watch-am.” (Acts 28:16) Na normal thing for them to chain prisoner wey dey under house arrest join the guard wey de watch-am so that e no go run. But chain no fit stop Paul preaching work. So after e don use three days rest from the travel, e call the leaders of Jew people together so that e go know them and preach to them.

11, 12. When Paul de talk to the Jew people for Rome, wetin e talk wey fit make them agree to listen to-am?

¹¹ Paul talk say: “Men, my brothers, even though say I no do anything against the people or the tradition of our papa-papa them, them put me for the hand of Rome people as prisoner from Jerusalem. And after them don check the case, them be want release me because them no see any reason to kill me. But when the Jew people no gree, the only thing wey I fit do na to talk say I want make Caesar hear my case, but no be because I get anything to talk against my nation.”​—Acts 28:​17-19.

¹² Paul call the Jew people wey de listen to-am “brothers,” to show them say  e be one of them and to remove any bad idea wey them fit don get. (1 Cor. 9:20) E make-am clear to them say e no come to accuse Jew people, but e come because e want make Caesar hear im case. The Jew people wey dey for Rome never even hear about Paul case before. (Acts 28:21) But why Jew people for Judea never tell the ones for Rome about Paul? One book talk say: “The ship wey Paul enter fit dey among the first ones wey reach Italy after their cold season, and as e be say ship dey hardly travel for cold season, the leaders of Jew people for Jerusalem never fit send anybody go Rome to deliver letter wey for tell them about Paul case.”

13, 14. How Paul take start im message about the Kingdom, and how we fit copy im example?

¹³ Paul start im message about the Kingdom with something wey go make them listen more. E talk say: “So because of this one, I talk say I want see una and talk to una. This chain dey around me because of the thing wey Israel don de hope for.” (Acts 28:20) The hope wey Christians de preach about na the Messiah and im Kingdom. The elders of the Jew people answer-am say: “We think say e go dey fine to hear from you wetin you get for mind, because true-true, as for this new group, we know say them de talk against-am for everywhere.”​—Acts 28:22.

¹⁴ When we get any chance to preach the good news, we fit copy Paul if we ask questions or talk things wey go make people want learn more from Bible. We go see better suggestions for books like Reasoning From the Scriptures, Benefit  From Theocratic Ministry School Education, Put All Your Heart for How You De Read and Teach, and Our Christian Life and Preaching Meeting Workbook. You fit be better teacher if you de use them well.

15. Which four things we fit learn from the way Paul take preach?

¹⁵ For the day wey the Jews arrange to meet Paul, “the number of people wey come the place wey e de stay even plenty pass the first ones.” Paul explain the matter to them “from morning to evening . . . with the way e really preach well about the Kingdom of God, as e use the Law of Moses and the things wey the Prophets don write to make them believe Jesus.” (Acts 28:23) We fit learn four things from the way Paul take preach. One, im message na about God Kingdom. Two, e talk for way wey the people wey de listen to-am go agree with wetin e de talk. Three, e use the scriptures to prove wetin e de talk. Four, e care for wetin the people need first before im own, as e preach “from morning to evening.” This one na better example for us! Wetin come happen? Luke talk say: “Some start to believe,” but some no believe. Because them no agree with each other, “them start to comot.”​—Acts 28:​24, 25a.

16-18. Why e no surprise Paul as the Jew people for Rome reject im message, and how we suppose feel if people reject our message?

¹⁶ Wetin the people do no surprise Paul because from Bible, Paul know say e fit happen like this and e don happen to-am before. (Acts 13:​42-47; 18:​5, 6; 19:​8, 9) As people wey reject im message de comot, Paul tell them say: “Holy spirit dey correct when e tell una papa-papa them through Isaiah the prophet, say, ‘Go meet this people and tell them say: “True-true una go hear but una no go ever understand wetin una hear, and una go really look but una no go ever see anything. Because this people heart don strong like stone.” ’ ” (Acts 28:25b-27) The Hebrew word wey them from translate “strong like stone” de show heart wey dey “thick,” or “fat,” wey no fit allow the Kingdom message to pass enter-am. (Acts 28:​27, ftn.) E bad say them reject the truth!

¹⁷ Paul talk say, “the nations . . . true-true . . . go listen.” Them no go do like the Jew people wey e de talk to. (Acts 28:28; Ps. 67:2; Isa. 11:10) Apostle Paul really dey sure of wetin e de talk because e don see many people wey no be Jew wey listen to the Kingdom message!​—Acts 13:48; 14:27.

¹⁸ Like Paul, make we no vex if people reject the good news. After all, we know say many people no go gree follow the road wey de lead to life. (Matt. 7:​13, 14) And we de happy and de use open mind welcome people wey really decide to start to worship Jehovah.​—Luke 15:7.

19. Wetin Paul do as e dey for house arrest?

¹⁹ Wetin Luke write last for the book of Acts de encourage person. E say:  “[Paul] continue to dey there for two full years for im own house wey e rent and e de welcome everybody well wey come visit-am. E de preach about the Kingdom of God to them and de teach about the Lord Jesus Christ, and as e de do this one, e really dey free to talk no be small, with nothing to stop-am.” (Acts 28:​30, 31) Paul na better example of person wey get faith, wey really put body for the preaching work, and wey care for wetin other people need.

20, 21. Mention some example of people wey gain from Paul preaching work for Rome.

²⁰ One of the people wey Paul welcome well, na one man wey im name na Onesimus. E be slave wey run comot from Colossae. Paul help Onesimus become Christian, and Onesimus become “faithful and dear brother” to Paul. Because of the way Paul love-am, e call-am, “my pikin Onesimus, wey I don be like im papa.” (Col. 4:9; Philem. 10-12) Onesimus go don really encourage Paul. a

²¹ Other people too gain from Paul better example. Paul write to the Christians for Philippi say: “My condition don even help to spread the good news more-more. As I dey for prison because of Christ, this one don spread among all the palace guard and all the other people. Now because I dey prison, plenty of the brothers wey de do the work of the Lord don strong more. Them de show say them get strong heart more-more and them no de fear to talk about the word of God.”​—Phil. 1:​12-14.

22. Wetin Paul still do as e dey house arrest for Rome?

²² Even though say Paul dey house arrest for Rome, e still use that time write important letters wey be part of the Christian Greek Scriptures today. b The Christians for the time of the apostles wey e write this letters to, gain from them. We too fit gain from this letters wey Paul write, because wetin e write de work today as e work for that time.​—2 Tim. 3:​16, 17.

23, 24. Like Paul, how Christians today de show say them no lose their joy even when them put them for prison because of their faith?

²³ Even though the book of Acts no talk about-am, but them free Paul after e don dey prison reach about four years​—two years for Caesarea and two years for Rome for house arrest. c (Acts 23:35; 24:27) But e no lose im joy and e continue to do everything wey e fit do to serve Jehovah. Today too, many of Jehovah servants wey them put for prison because of their faith never lose their joy and them de continue to preach. One example na Adolfo, wey them put for prison for Spain because e no gree join army because of im faith. One officer tell-am say: “You surprise us, we no make life easy for you inside this prison,  and the more we de make-am hard, the more you de smile and still dey kind when you de talk to us.”

²⁴ After some time, the soldiers come trust Adolfo sotey them no de lock im cell door. Sometimes soldiers go visit-am to ask about things for Bible. One of the guards de always go inside Adolfo cell to read Bible, then Adolfo go de look to make sure say nobody see the guard. So na the prisoner come de “guard” the guard! Make the fine example of this faithful brothers move us to show ‘say we get strong heart more-more and make e move us no fear to talk about the word of God,’ no matter how the condition hard.

25, 26. Which prophecy Jesus talk wey Paul see as e happen, and how this prophecy still de happen for this our time?

²⁵ The book of Acts talk about the sweet story them of Christians wey do everything wey them fit do to preach the good news. And e end with the better example of apostle Paul wey continue to “preach about the Kingdom of God” to everybody wey visit-am when e still dey for house arrest. For the first chapter, we read about the assignment wey Jesus give im followers when e talk say: “Una go get power when una receive holy spirit, and una go tell people about me for Jerusalem, for everywhere for Judea and Samaria, and for every corner for the earth.” (Acts 1:8) E never even complete 30 years, but them don “preach for everywhere under heaven.” d (Col. 1:23) This one show the power of God holy spirit!​—Zech. 4:6.

²⁶ Today too, God spirit de give anointed ones and the other sheep power to continue to “preach well about the Kingdom of God” for 240 lands! (John 10:16; Acts 28:23) You de do everything wey you fit do for this work?