1-4. Why Paul de go Jerusalem, and wetin go happen to-am for there?

 WHEN Paul and Luke de comot from Miletus, e no really easy for them and the elders to leave each other because of the love wey them get for theirself. Paul and Luke stand for the boat. Them don carry things wey them go need as them de travel. Them still carry the money wey the brothers contribute for the Christians wey dey poor for Judea and them really want make this money reach the brothers hand.

² Cool breeze come de blow and the ship start to move comot from the place wey them tie-am put before. Paul, Luke, and the seven brothers wey de travel with them, just de look the brothers as them dey sad. (Acts 20:​4, 14, 15) And them just de wave their hand de tell the brothers bye-bye until them no see them again.

³ E don reach about three years wey Paul de work with the elders for Ephesus. But now, Jehovah holy spirit don direct-am and e de go Jerusalem. E get idea about wetin go happen to-am for Jerusalem. Before now, e don tell this elders say: “As the spirit de move me, I de travel go Jerusalem even though say I no know wetin go happen to me for there. Except say from city to city, the holy spirit continue to warn me say prison and suffer-suffer de wait for me.” (Acts 20:​22, 23) Even with this one, Paul feel say e must go Jerusalem as the holy spirit de move-am. Paul value im life, but wetin dey important pass for-am, na to do wetin Jehovah want.

⁴ Na so you self de feel? When we dedicate ourself to Jehovah, we de promise Jehovah say we go do wetin e want and say na that one go be the number one thing for our life. For this chapter, we go learn more about apostle Paul and this one go help us fit copy im example.

5. Where the brothers pass reach Tyre?

⁵ The boat wey Paul and the seven brothers enter, “go straight.” This  one mean say the kind breeze wey blow, help the boat fit move well and them quick reach Cos for the same day. (Acts 21:1) E be like say the boat stay for Cos that night before them go Rhodes and Patara the next day. For Patara wey dey the south side of the sea of Asia Minor, the brothers enter one big ship wey de carry load and e carry them straight to Tyre, wey dey Phoenicia. As them de go, them pass “the island of Cyprus” for their left side. (Acts 21:3) Wetin make Luke talk about this island?

6. (a) Why e go don encourage Paul as e see the Island of Cyprus? (b) When you think about how Jehovah don help and bless you, wetin this one fit make you dey sure of?

⁶ E fit be say Paul tell the brothers wey dey with-am wetin happen to-am for that island. About nine years before this time when Paul travel as missionary for the first time, Paul, Barnabas, and John Mark, meet Elymas wey de do magic for this Island and Elymas dey against their preaching. (Acts 13:​4-12) When Paul see this island and remember wetin happen to-am for there, e go don help-am fit face wetin de wait-am for Jerusalem. E really good for us to de remember and think about how Jehovah don help us endure before. E fit make us feel like David wey talk say: “Righteous person get  plenty problem, but Jehovah de save the person from all of them.”​—Psalms 34:19.

7. Wetin Paul and the brothers wey travel with-am do when them reach Tyre?

⁷ Paul know say e dey important to dey with the brothers and sisters and e de really hungry-am to dey with them. When them reach Tyre, Luke write say, “we find the disciples and see them.” (Acts 21:4) Them know say brothers dey for Tyre, so them go find them and them see the brothers. E fit be say them even stay with the brothers. One blessing wey we get as Jehovah people na say, we get Christian brothers and sisters no matter where we go, and them go always welcome us well. People wey love Jehovah and wey de worship-am for the correct way, de get friends for the whole world.

8. Wetin be the meaning of Acts 21:4?

⁸ When Luke de talk about wetin happen when them stay for Tyre for seven days, e talk something wey fit surprise person. E talk say: “The spirit move [the brothers for Tyre] to continue to tell Paul say make e no go Jerusalem.” (Acts 21:4) Jehovah don change im mind? E don de tell Paul make e no go Jerusalem? No. The spirit make-am clear say Paul go suffer for Jerusalem but e no show say make e no go Jerusalem. E fit be say, holy spirit help the brothers understand say Paul go face danger for Jerusalem. So because them de worry about Paul, them tell-am make e no go. Them really want save Paul from danger. But because Paul want do wetin Jehovah want, e continue to travel go Jerusalem.​—Acts 21:12.

9, 10. (a) Wetin Paul fit don remember as the brothers de beg-am make e no go Jerusalem? (b) Which character many people get today, and how this one dey different from wetin Jesus teach us?

⁹ When the brothers de beg Paul make e no go Jerusalem, e fit don remember say Jesus disciples do the same thing when Jesus tell them say e must go Jerusalem, suffer well-well, and people go kill-am. Because wetin Jesus talk really touch Peter, Peter talk say: “Lord, pity yourself. This thing no go happen to you at all.” But Jesus tell-am say: “Comot from my front Satan! You de block my way, because you de think the way people de think, no be the way God de think.” (Matt. 16:​21-23) Jesus ready to do wetin Jehovah want, and to sacrifice im life. Paul ready to do the same thing. The brothers for Tyre really get good mind for Paul, but them no understand say wetin Jehovah want, na for Paul to go Jerusalem.

¹⁰ Many people today, no de like to do important things wey hard to do. Many people de like religion wey them dey free to do anything wey them like and wey no go stress them at all. But Jesus teach us say make we no be like this. E tell im disciples say: “If anybody want follow me, make e deny imself  and carry im torture pole and continue to follow me.” (Matt. 16:24) E make sense to follow Jesus and na the correct thing to do, but e no easy.

11. How the disciples for Tyre show say them really love Paul?

¹¹ Now time don reach for Paul, Luke, and the brothers wey travel with them to continue the journey. The way Bible talk about how them take comot show the kind strong love wey the brothers for Tyre get for Paul and say them want make e continue im work. The men, women, and children follow Paul and the brothers wey travel with-am go the beach. All of them kneel down for the beach and pray together and them tell each other bye-bye. After, Paul, Luke, and the other brothers wey dey with them enter another boat and them continue their journey. When them reach Ptolemais, them meet the brothers for there and stay there for one day.​—Acts 21:​5-7.

12, 13. (a) Which better things Philip do? (b) How Philip take be better example for brothers wey get children today?

¹² The next thing wey Luke write be say, Paul and the people wey de travel with-am come go Caesarea. When them reach there, them enter the house of “Philip wey be person wey de preach.” a (Acts 21:8) Them go really happy to see Philip. About 20 years before this time, the apostles appoint Philip to share food for the congregation wey just de start that time for Jerusalem. Philip na person wey don de preach for long time. Remember say when Christians run comot from Jerusalem because people de suffer them, Philip go Samaria and e start to preach for there. After, e still preach and baptize the man wey come from Ethiopia. (Acts 6:​2-6; 8:​4-13, 26-38) Philip really serve Jehovah well for many years!

¹³ Philip never stop to put body for the preaching work. Now wey e dey Caesarea, e still continue to preach. This one dey clear as Luke call-am “person wey de preach.” We still learn say Philip get four daughters wey de talk message from God and this one show say them follow their Papa example. b  (Acts 21:9) We dey sure say Philip really work hard to help im family make them love and serve Jehovah. If we be papa and we de serve Jehovah, e good make we copy Philip example. Make we dey front for the preaching work and help our children make them love to de preach.

14. Which better thing come happen as Paul visit the brothers, and how this one fit still happen today?

¹⁴ For the different-different place wey Paul go, e make sure say e look for other Christians and e spend time with them. The brothers really happy to welcome and care for Paul and the people wey dey with-am. This one na better chance for them to “encourage each other.” (Rom. 1:​11, 12) We fit still do this kind thing today. Even if we no de stay for big house, e go really encourage us if we welcome circuit overseer and im wife for our house.​—Rom. 12:13.

15, 16. Which message Agabus carry come, and how e affect the people wey hear-am?

¹⁵ Agabus come Philip house when Paul dey there. The people wey gather for Philip house know say Agabus na prophet. When Claudius de rule, na Agabus talk about the time wey food go really scarce. (Acts 11:​27, 28) Them fit de think for their mind say, ‘Wetin make Agabus come? Which message e carry come?’ As them de look-am, e carry Paul belt wey Paul de wear for waist. This belt na long cloth and them fit keep money and other things inside. Agabus use the belt tie im own leg and hand. Then e start to talk. Wetin e talk about really serious. E talk say: “The holy spirit talk say, ‘Na like this Jew people go tie the man wey get this belt for Jerusalem and them go give this man to people of the nations.’”​—Acts 21:11.

¹⁶ Wetin Agabus talk show say Paul go go Jerusalem. E still show say Jew people go carry Paul give “people of the nations.” The people wey hear the message come  de worry. Luke talk say: “Now when we hear this one, we and the people wey dey there start to beg Paul make e no go up to Jerusalem. Then Paul answer say: ‘Wetin una de do as una de cry and de try to change my mind? I want make una know say I no only ready make them chain me, but I still ready to die for Jerusalem for the name of the Lord Jesus.’”​—Acts 21:​12, 13.

17, 18. How Paul show say e really put im mind to do wetin Jehovah want, and wetin the brothers come do?

¹⁷ Think about how e happen that day. Luke and the brothers de beg Paul make e no go Jerusalem and some people de cry. Because of the love wey them show for Paul, Paul come sofri talk say, them “de try to change [im] mind,” or as some Bible translate-am, them de ‘break im heart.’ Even with this one, Paul no ready to change im mind because the brothers de cry and de beg-am. Na so e still do when the brothers for Tyre beg-am. Paul come explain to them why e need to go. Paul show say e get strong heart. Just like Jesus do, Paul really put im mind to go Jerusalem. (Heb. 12:2) No be say Paul like to die, but if e happen like that, e go see-am as better thing say e die as disciple of Jesus Christ.

¹⁸ Wetin the brothers come do? Them respect wetin Paul decide. Bible talk say: “When e no gree change im mind, we stop to beg-am and talk say: ‘Make the thing wey Jehovah want happen.’” (Acts 21:14) The brothers wey de beg Paul no continue to talk say Paul must do wetin them want. Them listen to Paul and accept wetin e talk. Even though say e no easy for them, them still accept say na wetin Jehovah want. Paul fit die for this journey wey e don start. E go better say the people wey love Paul no try to stop-am, na this one go make-am dey easy for Paul.

19. Which important lesson we learn from wetin happen to Paul?

¹⁹ We learn one important lesson from wetin happen to Paul: Make we no ever try to stop anybody wey want do something wey no easy because e want serve Jehovah. This lesson concern many things for our life, no be only things wey concern life and death. For example, e no easy for many papa and mama wey de serve Jehovah to allow their children go far-far place because them want do more for Jehovah. Even with this one, them no de try stop them. Phyllis, wey de stay for England, remember how e feel when im only daughter go serve as missionary for Africa. Phyllis talk say: “E no easy for me that time, I no happy to know say my pikin go dey far place. But even as I dey sad, I still de happy. I pray well-well about-am. But na wetin my pikin don decide and I no ever try to change-am. After all, na me teach-am to put Jehovah first for im life! E don reach 30 years now, wey my pikin de serve for other countries, and na every day I de thank Jehovah because e hold Jehovah tight.” To de encourage our brothers and sisters wey de do more for Jehovah, na really better thing!

20, 21. Wetin show say Paul really like to dey with brothers and sisters, and why Paul de like to dey with them?

²⁰ After Paul ready, Paul comot and the brothers from Caesarea follow-am. This one show say them be better friends wey de support each other. For the whole journey, Paul and the brothers wey follow-am, use every chance wey them get to dey with their Christian brothers and sisters. For Tyre, them go find the disciples and them stay with them for seven days. For Ptolemais, them greet the sisters and brothers and them stay with them for one day. For Caesarea, them stay for Philip house for some days. And after, some of the disciples for Caesarea escort Paul and the brothers wey follow-am, go Jerusalem. And for there, Mnason wey be one of the first disciple, welcome them for im house. When Luke de talk about when them reach Jerusalem, e talk say: “the brothers welcome us with joy.”​—Acts 21:17.

²¹ E clear say Paul really like to dey with im brothers and sisters. The brothers and sisters really encourage Paul, just as our brothers de encourage us today. This one na one thing wey go help Paul to fit endure the suffer from the people wey go try to kill-am.