LESSON 06
How Life Start?
“Na [God] de give life.” (Psalm 36:9) You believe-am? Some people de talk say no be God make life. If wetin they talk na true, then e mean say, this life just appear like that. But if na Jehovah make life, then e mean say e get reason why e make-am, no be so? a Check wetin Bible talk about how life start and see why we fit believe say wetin Bible talk na true.
1. Na where the earth and stars come from?
Bible talk say: “For the beginning God make heaven and earth.” (Genesis 1:1) Plenty science people gree say the earth and stars get time when they start. How God make the earth and stars? God use e holy spirit to make everything, the stars, the earth, and other planets.—Genesis 1:2.
2. Why God make this earth?
Jehovah “no just make [the earth] for nothing, e want make people de stay for inside.” (Isaiah 45:18) God make this earth to be fine place so that we fit get everything wey we need to live forever. (Read Isaiah 40:28; 42:5.) Science people talk say this earth dey special and e dey different from other planets. This earth na the only planet wey people fit live inside.
3. Wetin make people dey different from animals?
After Jehovah make this earth, e make things to live for inside. The first thing wey Jehovah make to live for this earth na plants and animals. After, “God make the man for e image.” (Read Genesis 1:27.) Wetin make people dey different? Since God make us for e image, we no de do partial and we de show love like God. E still make us to fit learn different-different language, to like fine-fine things, and to enjoy music. And na only people fit worship God, this one na something wey animals no fit do.
LEARN MORE THINGS
Learn about the proof say na God make life and say wetin Bible talk about how God make life really make sense. Learn about wetin the fine-fine qualities wey we get de teach us about God.
4. Na God make life
When people copy things for this earth to make other things, people de praise them. So who we go praise for the things wey we de see for this earth? Play the VIDEO, and talk about the question for under.
-
Wetin people don copy from this earth to make things?
Na person de draw plan for house and build-am. But who draw plan and make things for this earth? Read Hebrews 3:4, and talk about this questions:
-
Which things wey God make for this earth you like pass?
-
E make sense to believe say na God make the earth, the stars, and every other thing? Why you talk like that?
You know?
You fit see things wey them write and videos about this topic for jw.org under “They Make-Am or E Just Appear?” and “Wetin People Think About How Life Take Start.”
“True-true, every house wey we see na person build-am but na God make everything”
5. We get good reasons to believe say wetin Bible talk about how God make things na true
For Genesis chapter 1, Bible tell us where the earth come from and how life start for this earth. You fit trust wetin Bible talk, or na lie-lie story? Play the VIDEO, and talk about the questions for under.
-
You think say Bible de teach say God make this earth and life for just six days, wey each day na 24 hours?
-
You think say wetin Bible talk about how God make things make sense? Why you answer like that?
Read Genesis 1:1, and talk about this question:
-
Science people gree say the earth and the stars get beginning. How wetin science people talk agree with wetin you just read for Bible?
Some people de wonder if God make just one thing and this thing change to different-different other things. Read Genesis 1:21, 25, 27, and talk about this questions:
-
Bible de teach say God make one small cell and the cell change to animals and people? Or God make all the different kinds of life? b
6. God make people for special way
Jehovah no make us the way e make animals. Read Genesis 1:26, and talk about this question:
-
Since God make us for e image, we de show love and pity. Wetin this one de teach us about God?
SOME PEOPLE DE TALK SAY: “Wetin Bible talk about how God make things na lie-lie story.”
-
Wetin you think? Why you talk like that?
WETIN THIS LESSON TEACH
Na Jehovah make the earth, the stars, and everything with life.
Wetin You Don Learn
-
Wetin Bible talk about where the earth and stars come from?
-
God make just one cell and the cell change to different-different other kinds of life, or e make all of them?
-
Wetin dey special about people?
LEARN OTHER THINGS
See examples of things for this earth to prove say na God make things.
“Wetin Things for This Earth De Teach Us?” (Awake!, September 2006)
See how one papa de explain to e small pikin wetin Bible talk about how God make things.
Learn whether Bible agree with wetin them de teach say things just appear like that.
Check whether the bones wey science people dig from ground and other things wey they don do, de show say na God make life or e just appear like that.
a For Lesson 25, we go discuss the reason why God make us.
b When Bible use the word “kind,” e de talk about one big group of different-different things wey get life.
You May Also Like
QUESTIONS WEY PEOPLE DE ASK
How the Bible Study Wey Jehovah Witness De Do With People De Be?
You fit use any Bible translation when you de do free Bible study with Jehovah Witness. You fit tell all your family or friends to join you for the study.
