Person don ever invite you to the meeting wey Jehovah Witness people de do? If you never go before, you fit de feel somehow to go for the first time. You fit de wonder say: ‘Wetin de happen for this meetings? Why the meetings dey important? Why e good make I go?’ For this lesson, you go learn how you go fit near God if you de go meeting with other people and how that one go fit help you for your life.

1. Why Jehovah Witness people de gather together?

One of the people wey write Bible give the number one reason why we de gather together with other people. E talk say: “For inside the big congregation, I go praise Jehovah.” (Psalm 26:12) Na wetin Jehovah Witness people de do, them dey happy to gather together. For the whole world, them de meet every week to praise God, to sing, and to pray. Every year, plenty of them de gather for big groups to worship God.

2. Wetin you go learn for our meeting?

For our meeting, we de learn from Bible, we de “explain-am well and put meaning.” (Read Nehemiah 8:8.) For our meeting, you go learn about Jehovah and the fine-fine qualities wey e get. As you de know the kind love wey Jehovah get for you, na so you go de near Jehovah more-more. You go still learn how Jehovah go fit help you to get better life.—Isaiah 48:17, 18.

3. How the people wey you go meet for our meeting fit help you?

Jehovah talk say “make we de think about how we go help each other so that we go show love and do better work. Make we no de miss our meeting.” (Hebrews 10:24, 25) For our meeting, the people wey you go meet really love each other and they really want learn more about God just like you. You go hear as people de talk about the fine-fine things wey they learn from Bible and this one go encourage you. (Read Romans 1:11, 12.) For there, you go meet people. Some don marry and some never marry. And you go see say them dey happy even as them de face problems. This one na just some reasons why Jehovah want make we always de gather together!

 LEARN MORE THINGS

4. Meeting wey Jehovah Witness people de do

For the time of the apostles, Christians de always gather together to worship Jehovah. (Romans 16:3-5) Read Colossians 3:16, and talk about this question:

• How Christians for the time of the apostles worship Jehovah?

1. For our meetings, we de give talks, de show how we fit preach, and de show videos. We de start and end our meetings with song and prayer

2. For some parts, people fit raise up their hand to give answer

3.   We de welcome everybody—families, single people, old people, and children

4. Our meetings na free. Jehovah Witness people no de ask for offering

5. De try your best to go meetings

• Why e good make we always de go meetings?

 WETIN THIS LESSON TEACH

If you go meeting, e go help you to learn more about Jehovah, to be tight friend with Jehovah and to worship Jehovah with other people.

Wetin You Don Learn

• Why Jehovah de tell us make we de gather together?

• Wetin you go learn when you go meeting with Jehovah Witness people?

• Which other ways the meeting go still help you if you go?