LESSON 16

Wetin Jesus Do When E Dey This Earth?

PLAY

Plenty people today de think of Jesus as small baby, as prophet wey get sense, or as man wey de die. E dey possible to learn about Jesus for the way e live e life when e dey this earth? For this lesson, we go talk about some of the things wey dey important pass wey Jesus do when e dey this earth, and how this one go fit help you.

1. Wetin be the number one work wey Jesus do?

The number one work wey Jesus do na to “preach the good news about the Kingdom of God.” (Read Luke 4:43.) E preach the good news say God go start one Kingdom, or government wey go solve all the problems wey people de face. a For three and half years, Jesus do e best to tell people about this fine message.—Matthew 9:35.

2. Why Jesus do miracles?

Bible talk about plenty “big-big things and wonderful things and signs” wey God use Jesus do. (Acts 2:22) God give Jesus power to control weather, to feed plenty people, to make sick people well, and even bring dead people back to life. (Matthew 8:23-27; 14:15-21; Mark 6:56; Luke 7:11-17) The miracles wey Jesus do show say na God send Jesus. This miracles still de show say na Jehovah get the power to solve all our problems.

3. Wetin we fit learn from how Jesus live e life?

Jesus de always obey Jehovah. (Read John 8:29.) When Jesus dey this earth, e do everything wey e Papa say make e do, even though say people de try stop Jesus make e no obey God. As Jesus do this one, “e show [us] example so that [we] go fit follow e example well.”—1 Peter 2:21.

LEARN MORE THINGS

Learn about how Jesus do miracles and preach the good news.

4. Jesus tell people good news

Jesus waka go far place for road wey dust dey to preach the good news to plenty people. Read Luke 8:1, and talk about this questions:

Na only people wey gather to listen to Jesus e preach to?
Wetin Jesus do to find people?

God don talk-am before say the Messiah go preach about the good news. Read Isaiah 61:1, 2, and talk about this questions:

How this thing wey Bible talk about Jesus really happen?
You think say people for this our time need to hear this good news?

5. Jesus teach people important lessons

Apart from the preaching work wey Jesus do about the Kingdom of God, e still teach important lessons and this lessons fit help people. Make we see some examples from the Sermon on the Mount wey plenty people know wey Jesus give. Read Matthew 6:14, 34, and 7:12, and talk about this questions:

Which better advice Jesus give for this verses?
You think say this better advice fit help people today?

6. Jesus do plenty miracles

Jehovah give Jesus power to do plenty miracles. To see one example, read Mark 5:25-34 or play the VIDEO. Then talk about the questions for under.

VIDEO: Jesus Cure One Sick Woman (5:10)

For the video, wetin the sick woman believe?
Wetin you like about this miracle?

Read John 5:36, and talk about this question:

Wetin the miracle wey Jesus do de show about Jesus?

You know?

Plenty of the things wey we know about Jesus dey for this four books of the Bible, Matthew, Mark, Luke, and John. Each of this people wey write this Bible books talk some different things about Jesus. When we read all this four Bible books, e go help us understand the kind life wey Jesus live.

MATTHEW

first write e own book. E tell us about plenty things wey Jesus teach especially about the Kingdom of God.
MARK

write the book wey short pass. This Bible book tell us plenty fine-fine things wey happen.
LUKE

tell us how prayer be dey important to Jesus and the better way wey Jesus treat women.
JOHN

tell us plenty things wey Jesus talk about with e tight friends and other people. This one de help us learn the kind person wey Jesus be.