Jehovah want make we learn about e family for heaven. The angels na part of this family and Bible call them “sons of God.” (Job 38:7) Wetin Bible talk about the angels? How wetin them de do de affect people? And na all angels be part of the family of God?

1. Who be angels?

Jehovah make angels before e make the earth. Just like Jehovah, angels na spirit wey we no fit see and them de live for heaven. (Hebrews 1:14) Na millions of angels dey and each of them get their different qualities. (Revelation 5:11) Them “de hear [Jehovah] voice and de do the things wey e talk.” (Psalm 103:20) For Bible time, sometimes Jehovah de send e angels to give message, support, and help e people. Today, angels de direct Christians to people wey want learn about God.

2. Who be Satan and e demons?

Some angels stop to obey Jehovah. The first angel wey stop to obey Jehovah na “the one wey them de call Devil and Satan, wey de deceive the whole world.” (Revelation 12:9) E want rule other people, so e make Adam and Eve and later other angels to stop to obey Jehovah. Bible call this bad angels demons. Jehovah drive them comot from heaven to this earth, and e go destroy them.—Read Revelation 12:9, 12.

3. How Satan and the demons de try deceive us?

Satan de make plenty people do things with demons to deceive them. To do things with demons na when people de try talk with spirits. For example, some people de meet people wey de read signs for stars, people wey de talk wetin go happen for future, native doctors and other people like this. Some de try cure sickness with medicine wey get connection with demons. Some believe say they fit talk with dead people. But Jehovah warn us say: “No go meet people wey de take message from people to spirit and from spirit to people, and no go meet people wey de talk wetin go happen for future.” (Leviticus 19:31) Jehovah de warn us to protect us from Satan and the demons. They be enemies of God and they want do us bad.

 LEARN MORE THINGS

6. You fit win the fight against Satan and e demons

Na Satan de rule the demons. But na Michael the leader of the angels de direct the faithful angels for heaven. Michael na another name for Jesus. Which kind power Michael get? Read Revelation 12:7-9, and talk about this questions:

• Who get power pass? Michael and e angels or Satan and e demons?

• You think say disciples of Jesus need to fear Satan and e demons?

You fit win the fight against Satan and e demons. Read James 4:7, and talk about this question:

• How you fit protect yourself from Satan and the demons?

 WETIN THIS LESSON TEACH

Faithful angels de help us. Satan and e demons na enemies of Jehovah, and them de make people do things with demons to deceive them.

Wetin You Don Learn

• How faithful angels de help people learn about Jehovah?

• Who be Satan and e demons?

• Why you no go like to do anything wey fit connect you with the demons?